ءومىردىڭ عاجايىپ ساتتەرى
سەيسەنبى, 29 مامىر 2012 7:47
قۋانىشباي قۇرمانعالي اعامىزدى ارقاشان ءبىر قالىپتان جازباس قاراپايىم دا قاعىلەز, سىپايى دا شىنايى كۇيىندە كورەمىز. سونداي جايشىلىقتا ول كىسىنىڭ جانىنداعى قوڭىر كۇزدىڭ كۇمبىرى قۇلاعىمىزعا شالىنا بەرمەسى دە انىق. ەندى قايتەمىز, ءبارىمىز بىردەي ءار نارسەنى اڭعارىمپاز قادىر مىرزا-ءالى ەمەسپىز عوي. «قۋانىشباي-اۋ, باياعىدا مەن بالالارعا تاقپاق جازىپ جۇرگەنىمدە سەنىڭ كول-كوسىر ليريكالىق ولەڭدەرىڭ «لەنينشىل جاسقا» ءجيى جاريالانىپ تۇراتىن ەدى عوي, سولاردى جيناقتاپ نەگە شىعارمايسىڭ؟!»
سەيسەنبى, 29 مامىر 2012 7:47
قۋانىشباي قۇرمانعالي اعامىزدى ارقاشان ءبىر قالىپتان جازباس قاراپايىم دا قاعىلەز, سىپايى دا شىنايى كۇيىندە كورەمىز. سونداي جايشىلىقتا ول كىسىنىڭ جانىنداعى قوڭىر كۇزدىڭ كۇمبىرى قۇلاعىمىزعا شالىنا بەرمەسى دە انىق. ەندى قايتەمىز, ءبارىمىز بىردەي ءار نارسەنى اڭعارىمپاز قادىر مىرزا-ءالى ەمەسپىز عوي. «قۋانىشباي-اۋ, باياعىدا مەن بالالارعا تاقپاق جازىپ جۇرگەنىمدە سەنىڭ كول-كوسىر ليريكالىق ولەڭدەرىڭ «لەنينشىل جاسقا» ءجيى جاريالانىپ تۇراتىن ەدى عوي, سولاردى جيناقتاپ نەگە شىعارمايسىڭ؟!» دەپ ونىڭ اقىندىعىنا اعالىق جاناشىرلىقپەن دەن قويعان قاداعاڭ بولاتىن. گازەت جۇمىسىنىڭ مايىن ىشكەن مايتالماندىعىنا قازاق رۋحانياتىنىڭ قۇتتى شاڭىراعى «لەنينشىل جاستىڭ» باسشىلارى شەرحان مۇرتازا, سەيداحمەت بەردىقۇلوۆ قۇرمەتپەن قارادى. جۋرناليستىك قارىمى «قازاقستان كوممۋنيسى» (كەيىنگى «اقيقات») جۋرنالىندا جاۋاپتى حاتشى ءھام باس رەداكتوردىڭ ورىنباسارلىعىنا دەيىن جەتىپ ۇزارا ءتۇستى. مۇندا ونىڭ بەساسپاپتىعىن باعالاعاندار ءباسپاسوز ساردارلارى قۇرمانبەك ساعىندىقوۆ, كاكىمجان قازىباەۆ, كامال سمايىلوۆ ەدى. قۋاعاڭنىڭ بيپاز باسپاگەرلىگى مەن بىلىمدارلىعى ءوزى باس رەداكتورلىعىنا دەيىن جوعارىلاعان «جالىن» باسپاسى مەن قازاق ەنتسيكلوپەدياسىندا كورىندى. مۇندا دا وعان سەنىم ارتقاندار وسال ەمەس, قالداربەك نايمانباەۆ پەن رىمعالي نۇرعاليەۆ سەكىلدى نارلاردىڭ ءوزى-ءتىن. ودان كەيىن اقسەلەۋ سەيدىمبەك دوسىنىڭ وڭ جاعىنان شىعىسىپ ى.التىنسارين اتىنداعى قازاق ءبىلىم اكادەمياسىنىڭ ۆيتسە-پرەزيدەنتى, سوسىن «عىلىم» باسپا ورتالىعىنىڭ باس ديرەكتورى بولعان جىلداردا دا قازاق رۋحانياتىنا ادال تەر توگۋدەن جازعان ەمەس. سونىڭ ءبىر ايعاعى – سول تۇستاعى مەملەكەتتىك حاتشى يمانعالي تاسماعامبەتوۆتىڭ قولداۋىمەن 200 جىلدىعىنا وراي جەدەل شىعارىلعان ماحامبەتتىڭ تاماشا ءتورت تومدىعى. ءار جىلدارى «ارمان ارالى», «قوش, قالقاتاي», «قوڭىر كۇز كۇمبىرى» سىندى جىر جيناقتارى شىققان ايشىقتى اقىندىعىنان, جۋرناليستىك قالامگەرلىگىنەن باسقا ق.قۇرمانعالي شىعارماشىلىعىنىڭ شىرايلى ءبىر سالاسى – ءتارجىمە. سولاردىڭ ىشىندە توگىلتە قوتارىلىپ قازاق وقىرمانىنىڭ كوزايىمىنا اينالعان ورىس حالىق ەرتەگىلەرى مەن اندەرسەن ەرتەگىلەرىن, يرينا سترەلكوۆانىڭ «شوقانىن», فلوبەردىڭ «بوۆاري حانىمىن» ايتار ەدىك. البەتتە, وسى جىپكە تىزىلگەندەردىڭ ءبارىن ءبىزدىڭ سۇحباتتاس ءومىرىنىڭ وزىندىك عاجاپ ورنەكتەرى, كەيىنگى تولقىنعا ۇسىنار تاعىلىمى دەمەسكە دە ءاددىمىز جوق.
– قۋانىشباي اعا, ءسىز سوعىس جىلدارى تۋعاندار ساناتىنانسىز. وسىدان پەشەنەڭىزگە بۇيىرعانى نە؟
– سوعىستان پەشەنەمە جازىلعانى سول, جارىق دۇنيەگە كەلمەي جاتىپ اكەمنەن ايىرىلىپپىن. 1941 جىلدىڭ كۇز ايلارىندا كىل قازاق جىگىتتەرىنەن اقمولادا ەكى اتتى اسكەر ديۆيزياسى جاساقتالعان. بۇلار گەنەرال دوۆاتوردىڭ كاۆالەريا بولىمدەرى قۇرامىندا 1942 جىلدىڭ قاڭتار-اقپانىندا موسكۆا ءتۇبىندەگى شايقاستارعا ءتۇسىپ, قان قاساپتىڭ ارانىنا جۇتىلىپ كەتكەن. سول بەيباقتاردىڭ ىشىندە اكەم سەرىكباي دا بار. كورەر كوزگە تىرىدەي ولىمگە ايدالعان عوي. ايتپەسە, قارۋسىز, قۇر اتپەن زەڭبىرەك پەن تانككە قارسى شاۋىپ قانداي قاۋقار قىلماق؟ ءبىر تاڭعالارلىعى, «زەڭبىرەك جەمىنە» اينالعان سول ەكى ديۆيزيانىڭ تاعدىر-تالايى تۋرالى ارحيۆتەردە دە ەشبىر مالىمەت جوق.
– سوعىستان كەيىنگى بالالىق شاقتان ەستە قالعان نەلەر بار؟
– مۇڭىم كوبىرەك بولعاسىن با, وقۋشى كەزىمنەن ولەڭ جازا باستادىم. ۇلكەن بالالارعا, ءوز قۇرالپىلاستارىما, قىزدارعا ارناعان ماحاببات حاتتارىن ولەڭدەتىپ جازىپ بەرەمىن. ونداي «ەڭبەك» ءۇشىن ولاردىڭ ءۇيلەرىنەن كەلگەن سارى مايدى ءبولىسىپ جەيمىز. سەگىزىنشى سىنىپتان باستاپ ينتەرناتتامىن. قازىرگى اۋليەكول. ول كەزدە سەميوزەرسك دەيدى. قوستانايدىڭ ۇلكەن ءبىر اۋدانى عوي. ءبىر عاجاپ جاعداي, سول ۋاقىتتاردا قاسىم امانجولوۆتىڭ ءۇش تومدىعى شىعىپ, سونىڭ جالعىز داناسى اۋداندىق كىتاپحاناعا ءتۇستى. كەزەككە تۇرىپ, جاستانىپ وقىدىق. قاسىم جىرلارى سۇرەڭسىزدەۋ, كوڭىلسىزدەۋ ومىرىمىزگە جارق ەتىپ شاشىلعان ءبىر جارىق ساۋلە سياقتى بولدى. ماحاببات جايلى مۇڭداي ولەڭدەردى بۇرىن وقىپ كورمەگەن, ءتىپتى, ىنتىق-زاردى وسىنشا تەبىرەنە تولعاپ ايتۋ مۇمكىن دەپ بىلمەگەن ءبىز قاسەكەڭ شۋماقتارىنان قىزدارعا جازعان حاتتارىمىزعا قوسىپ-قوسىپ جىبەرۋشى ەدىك. ودان سوڭ سول كەزدە «لەنينشىل جاس» گازەتىندە ىستەپ جۇرگەن سالىق مولداحمەتوۆ دەگەن ءبىزدىڭ اۋىلدىڭ جىگىتى وسىنىڭ الدىندا اقتالعان بەيىمبەت, ساكەن, ءىلياستىڭ ءبىر-ءبىر توم كىتاپتارىن سالىپ جىبەردى. تاعى جىرلاپ, مەيىرىم قانىپ, راحاتقا باتتىم.
– تاماشا بولعان ەكەن-اۋ!..
– ءبارى بىردەي تاماشا دەپ ويلاما. 9-شى سىنىپتى بىتىرەتىن كوكتەمدە ءبىر جايسىزدىققا تاپ بولدىم. ەكى سىنىپتىڭ 50-دەن استام وقۋشىسى 70 شاقىرىم جەردەگى «تسەليننىي» سوۆحوزىندا تۇقىم سەبۋ كەزىندە سەيالكاشى بولىپ جۇرگەنبىز. كۇن سۋىق. جۇمىس اۋىر. تاماق ناشار. قيىن جاعدايعا شىداماي 20 بالا جۇمىستى تاستاپ قاشتىق. سودان پەدسوۆەتتە ءتارتىبىمىزدى قاراپ, 5 بالانى وقۋدان شىعاردى. 6-شى ەتىپ مەنى ءارى وقۋدان شىعارىپ, ءارى سىنىبىمدا قالدىرىپتى. جاي قورقىتقانى بولار دەپ جۇرسەك, ولاي ەمەس. شىن. 1 قىركۇيەكتە سىنىبىما كىرگىزبەدى. مەكتەپ ديرەكتورى دا, اۋداندىق وقۋ ءبولىمىنىڭ باستىعى دا ءسويلەسپەك تۇگىلى, جولاتپاي قويدى. ايتەۋىر وسپانوۆ دەگەن سىنىپ جەتەكشىم جانى اشىپ, كەلەسى سىنىپقا كوشتى دەگەن تابەل تولتىرىپ, زاۆۋچتىڭ تۋعان كۇيەۋ بالاسى ەدى, ءمورىن سوقتىرتىپ بەردى. سونىمەن, 10-شى سىنىپتى كورشىلەس تاران اۋدانىنىڭ قورجىنكول اۋىلىنداعى قازاق ورتا مەكتەبىنەن بىتىرۋگە تۋرا كەلگەن.
– حوش. اتتەستات الدىڭىز. الماتىعا كەلدىڭىز؟..
– بۇل 1959 جىلدىڭ جازى عوي. قىزىعى, سول جىلدان باستاپ كازمۋ-ءدىڭ جۋرفاگىنا 2 جىل ستاجسىز قابىلدامايتىن ءتارتىپ شىعىپتى. ەندى نە ىستەدىم؟ ەلگە قايتسام, الماتىعا ەندى ورالمايتىنىمدى ويلاپ, قالايدا قالادا قالۋعا بەكىندىم. قاپىلىپ تۇرعاندا كازمۋ-ءدىڭ باس كورپۋسى الدىندا «قارعالى كووپەراتيۆتىك تەحنيكۋمىنا وقۋعا شاقىرامىز» دەگەن حابارلاندىرۋعا كوزىم ءتۇسكەنى. كوزدى جۇمىپ, سوعان قويدىم دا كەتتىم. جاتاقحاناسى بار, ستيپەندياسى بار. زاۋقىم سوقپاسا دا وقىدىم.
بولاشاق جەزدەم سالىق مولداحمەتوۆ «لەنينشىل جاستا» حات ءبولىمىنىڭ مەڭگەرۋشىسى. سول قولىڭ جاتتىعىپ, ءتىلىڭ ۇستارا بەرسىن دەپ, ءارى تيىن-تەبەن, اپن-نىڭ قىزىقتى ماتەريالدارىن اۋدارۋعا بەرىپ تۇرادى. ءوزىم ۇيىنە تۇسكەن, جۇماعالي ىسماعۇلوۆپەن قاتار قۇربى ەرتاي ارىسوۆ دەگەن بولە اعام راديوجۋرناليست. كەيىن قازاق راديوسىنىڭ ديرەكتورى بولدى. ءبىر كۇنى سالىق ايتتى: «بىزدە حات تىركەۋشىنىڭ ورنى بوس. ەرەكەڭ رەداكتوردىڭ ورىنباسارى راحمەتوللا ىدىرىسوۆقا ايتسىن, سوندا سول ورىنعا سەنى الادى», دەدى. ەرەكەڭ شىنىمەن-اق راحمەتوللا اعاعا ويلانباستان تەلەفون شالدى. بىرگە وقىعان دوستار ەكەن. سونىمەن, 1960 جىلعى شىلدەنىڭ 20-سى كۇنى رەداكتور ساتتار بولدەكباەۆتىڭ بۇيرىعىمەن «لەنينشىل جاس» گازەتىنە حات تىركەۋشى بولىپ جۇمىسقا قابىلداندىم.
– ءسىزدى «لەنينشىل جاستىڭ» «پولك بالاسى» بولعان دەگەن اڭگىمەلەردى ەستىپ قالامىز.
– بۇل ءسوز دە شىندىققا سايادى. سول كەزدەردە ۇجىمداعى دوستىق ءراۋىش, پەيىل مەن مەيىر كەرەمەت ەدى. حات تىركەۋشى عانا بولىپ قازديىپ وتىرۋعا مۇرشا بەرمەدى. رەداكتسيانىڭ قايناعان تىرلىگىنە, گازەت جۇمىسىنىڭ قاۋىرت قاربالاسىنا ميداي ارالاستىرىپ جىبەردى. بۇل ماعان ۇلكەن تاربيە ورتاسى, كادىمگى ءبىر ۋنيۆەرسيتەتتەي بولدى. ءتىلالعىشپىن. قولدى-اياققا تۇرمايمىن. قايدا جۇمساسا, سوندا بارامىن. ورىسشادان اۋدارامىن. جاڭالىق حابارلار جازدىرتادى. كوبىنە-كوپ باسپاحانادا جۇرەمىن. بالاسى اۋىرىپ قالعان جاس كوررەكتور كەلىنشەكتەردى اۋىستىرامىن.
ءسويتىپ جۇرگەندە 1961 جىلدىڭ اقپان ايىندا مەنى كىشى ادەبي قىزمەتكەر ەتىپ ءوسىردى. توبەم كوككە جەتتى. ۋنيۆەرسيتەتتىڭ سوڭعى كۋرسىندا وقيتىن قالداربەك نايمانباەۆ, كەيىن «جەتىسۋ» گازەتىنىڭ رەداكتورى بولعان بايمولدا مۋسين جانە مەن – ءۇش ادام قاتار قابىلداندىق.
– سول جىلدارداعى جۋرناليستىك ورتا تۋرالى ايتىڭىزشى؟
– گازەتتى حالىق ءسۇيىپ وقىپ, جاقسى شىعىپ جاتقانى ءوز الدىنا. سول تۇستاعى ساپار بايجانوۆ, كامال سمايىلوۆ, حايروللا تىلەمىسوۆ, كاكىمجان قازىباەۆ, باقىتجان ماديەۆ سياقتى اتاقتى جۋرناليستەر جوعارىراق, باسقا باسىلىمدارعا اۋىسىپ, ولاردىڭ ورنىنا وڭشەڭ سەن تۇر, مەن اتايىن جاڭا تولقىن, جاس جىگىتتەر كەلىپ, «لەنينشىل جاستى» ودان سايىن دۇرىلدەتىپ, دۇركىرەتىپ جاتقان كەز. ءابدىساتتار بولدەكباەۆ, راحمەتوللا ىدىرىسوۆ, ءابىلفايىز ىدىرىسوۆ, تەلمان جانۇزاقوۆ. ۇيلەنگەندەر وسى تورتەۋى عانا. ول ۋاقىتتا سەنبى جۇمىس كۇنى. «لەنجاستىڭ» قىز-جىگىتتەرى ءبىر ءۇيدىڭ بالاسىنداي, ءبىر قولدىڭ سالاسىنداي بولىپ بىرگە جۇرەمىز. سەيداحمەت بەردىقۇلوۆ ءبولىم مەڭگەرۋشىسى. گازەتكە العاش جاريالانعان ولەڭدەرىمە ادەبيەت ءبولىمىنىڭ باستىعى قاليحان ىسقاقوۆ قول قويدى.
تەلمان مەن قاليحان اعالاردىڭ دوستىعىنا قىزىعاتىنبىز. تەلاعاڭ «پراۆدانىڭ» ءتىلشىسى كەزىندە نوۆوسيبيرسكىدە جۇرەگىنە وپەراتسيا جاساتقاندا ايەلى فاريدادان دا بۇرىن بارىپ جەتكەن وسى قالەكەڭ بولاتىن. دوستىقتىڭ كەرەمەتى دە, قۇدىرەتى دە سوندايدا, باسقا ءىس تۇسكەندە عوي. دوستىق پەن دوستار شاراپاتىن كەيىن ءوزىمىز دە تالاي كوردىك تە, سەزىندىك تە.
– «لەنجاستىڭ» اتاقتى «جەتى جەتىمىنىڭ» دوستىعى دا ەلگە اڭىز بولىپ تاراعان جوق پا؟
– ايتقانداي, وسى ارادا ءبىر قىزىعى بار. 1965 جىلدىڭ قاراشاسىندا اسكەردەن ورالسام, «لەنينشىل جاسقا» رەداكتور بولىپ شەرحان مۇرتازاەۆ كەلىپتى. جىگىتتەر مەن تۋرالى ايتسا: «ونداي ءجۋرناليستى مەن ءبىلمەيمىن», دەپ بەتتەتپەپتى. اقىرى, نە كەرەك, ول كىسىگە دەمالىستا جۇرگەن ورىنباسارى تەلمان تەلەفون سوعىپ: «شەرحان-اۋ, ونىڭ نە؟ ول جىگىتتى سەن بىلمەسەڭ, ءبىز بىلەمىز. جازىعى اسكەرگە كەتكەنى مە؟ قىزمەتىنە الۋ كەرەك» دەيدى. وسى قاتال شەرحان ارادا از جىل وتكەندە مەنى جاۋاپتى حاتشىلىققا ۇسىنىپ, بىراق كومسومولدىڭ ورتالىق كوميتەتى: «ۋنيۆەرسيتەتتى كۇندىز ءبىتىرگەن بىرەۋ تاپپادىڭدار ما؟» دەپ ول ۇسىنىستى وتكىزبەي تاستاعان-دى. ءيا, شەراعاڭدار تامىر-تانىستى ەمەس, كاسىبي ءبىلىكتىلىكتى, قارىم-قابىلەتتى ءبىرىنشى ورىنعا قوياتىن.
شەراعاڭنىڭ تۇسىندا, 1967 جىلدان شىعارماشىلىق ۇجىم قايتادان جاڭارا باستادى. «لەنينشىل جاسقا» كادىربەك سەگىزباەۆ, اقسەلەۋ سەيدىمبەكوۆ, ورالحان ءبوكەەۆ, كارىباي احمەتبەكوۆ, ماعيرا قوجاحمەتوۆا, سەرىك ءابدىرايىموۆ, مۇحتار شاحانوۆ, ساكەن يماناسوۆ, كەڭشىلىك مىرزابەكوۆ, جومارت ءابدىحالىقوۆ, فاريزا وڭعارسىنوۆا, سەرىك تۇرعىنبەكوۆ, مەرعالي ىبىراەۆ سياقتى قۋاتتى جاڭا تولقىن كەلىپ قوسىلدى. اتاۋىن ورالحان ۇسىنىپ, «جەتى جەتىم» دەگەن «ۇيىم» قۇرىپ, بىرگە ءجۇرىپ, بىرگە تۇرىپ داۋرەندەگەن كەزىمىز وسى جىلدار بولدى. ءبىر-ءبىرىمىزدىڭ جازعانىمىزدى وقىپ, پىكىرلەسىپ, سىرلاسىپ, دۋلاسىپ, ويناپ-ك ۇلىپ, شىن مانىسىندە ءبىر ءۇيدىڭ بالاسىنداي بولىپ, راحات عۇمىر كەشتىك.
– كىمدەر ولار؟
– ورالحان, اقسەلەۋ, كارىباي, سەرىك ءابدىرايىموۆ, كادىربەك, كومسومولدىڭ ورتالىق كوميتەتىنىڭ سەكتور مەڭگەرۋشىسى بەكسۇلتان نۇرجەكەەۆ جانە مەن. ءالى ەسىمدە, ورالحان كەلگەن كۇنى كەشكە بىزدە حات تىركەۋشى بولىپ ىستەيتىن كەلىنشەگى ءۇرنيسا تولەگەن ايبەرگەنوۆتىڭ جىلىن بەردى. سوندا بىرگە باردىق. سودان اۋىلدان كەلىنشەگى ايماندى الدىرتىپ, ءپاتەرگە شىققانشا ءبىزدىڭ ۇيدە تۇردى. سول كۇنى ءتۇننىڭ ءبىر ۋاعىنا دەيىن اڭگىمەلەستىك. وسى كۇننەن ورالحان ەكەۋمىزدىڭ دوستىعىمىز باستالدى. مەن ونى «دوستاردىڭ ىشىندەگى دوسىم» دەيتىنمىن». اۋىلىنا دا تالاي باردىق. بىردە قايعى, بىردە قۋانىش. ورالحاننىڭ ادەبي قىزمەتكەرلەرى جاراسقان ابدىراشەۆ, ساعات اشىمباەۆ سياقتى سايدىڭ تاسىنداي تالانتتى ءجىگىتتەر بولدى. ۇجىمعا مارات قابانباەۆ, جاقاۋ داۋرەنبەكوۆ, جانبولات اۋپباەۆ كەلىپ قوسىلدى. وسى جىگىتتەردىڭ قاي-قايسىسىمەن دە توننىڭ ىشكى باۋىنداي ارالاستىم. جەتىمدىكتەن جەتىلىپ, قازاقتىڭ وسىنداي ايتۋلى ادامدارىمەن بىرگە ءجۇرۋدى ءناسىپ ەتكەن اللاعا مىڭ راحمەت.
– باسىڭىزعا قيىندىق تۇسكەن كەزدەر دە بولعان شىعار؟
– 1986 جىل عوي دەيمىن, «جالىن» باسپاسىنان شىققان ب.نۇرجەكەەۆتىڭ «وزەندەر ورنەكتەگەن ولكە», ج.شاشتاي ۇلىنىڭ «قىزىل قار», ت.ب. تاريحي كىتاپتارعا قاتتى سىندار ايتىلدى. باس رەداكتور نۇرجەكەەۆتى قىزمەتىنەن بوساتتى. مەنى وسى كىتاپتارعا قول قويعان باسپا باسشىلارىنىڭ ءبىرى رەتىندە بىرەسە مينيسترلىككە, بىرەسە ورتالىق كوميتەتتىڭ ناسيحات بولىمىنە شاقىرىپ, ورنىمدى بوساتۋىمدى تالاپ ەتىپ, قۋعىنداي باستادى. وسى تۇستاعى بۇرىن «لەنينشىل جاستا» ءارىپتەس بولعان اعا دوسىم رىمعالي نۇرعاليەۆتىڭ ەرەكشە جاقسىلىعى جادىمنان كەتپەيدى. جاقىندا قازاق سوۆەت ەنتسيكلوپەدياسىنا باس رەداكتور بولىپ بارعان رەكەڭ: «بۇلار ەندى سەنى ءبارىبىر وتىرعىزبايدى. ماعان كەل», دەپ قامقور بولدى. ايتايىن دەگەنىم, سەنىسكەن, دوس ادامدار اراسىندا وسىنداي قولداسۋ, قولۇشىن بەرۋ بولىپ تۇرادى.
– شىعارماشىلىق ۇستانىم-ماقسات جايىندا نە ايتار ەدىڭىز؟
– ءبىزدىڭ قۇرالپاس تولقىن شىعارماشىلىعىنىڭ شىڭى «لەنينشىل جاس» تارالىمىنىڭ 70-80 مىڭنان 350 مىڭعا جەتۋى دەپ ەسەپتەيمىن. كەزىندە تيراجىمىز 100 مىڭعا جەتسە دەپ ارمانداعانبىز. ال وزىمە كەلەر بولساق, گازەت پەن باسپانىڭ قارا جۇمىسىنا كوبىرەك جەگىلدىك. ءۇش جىل اسكەردە, ودان ءابىش كەكىلباەۆ اعامىزبەن بىرگە ەكى جىل وفيتسەرلىك قىزمەتتە بولۋ دا اسەر ەتپەي قويمادى. دەگەنمەن, جىر جيناقتارىم ادەبي ورتادا ءوز باعاسىن الدى. ەلەۋلى دەگەن تۋىندىلارىم «انا ءتىلى» باسپاسىندا «اۋليەكول اۋەندەرى» دەگەن اتپەن شىعىپ جاتىر. سوڭعى جىلدارى بەلگىلى اقىندارىمىزدىڭ شىعارماشىلىق كەلبەتتەرىن كەستەلەپ, ادەبي تولعاۋلار جازۋ ۇستىندەمىن. ولاردىڭ ءبىرسىپىراسى «اتامۇرا» باسپاسىنان شىققان «ادەبيەت الەمىنە ساياحات» كىتابىنا توپتاستىرىلدى. ءبىر قاعيدام, مەن ەشكىمگە ءسىلتەمە جاسامايمىن, ءبىر اقىندى ەكىنشىسىمەن سالىستىرمايمىن. ءبىر ءسوز ايتسام دا ءوز ءسوزىمدى ايتۋدى مۇرات تۇتىپ كەلەمىن. كەزىندە «لەنينشىل جاستا» قالىپتانعان قازاقتىعىما شۇكىرلىك ەتەمىن. اڭسارلى ازاتتىققا جەتۋىمىزدى باستى ارماننىڭ ورىندالۋى دەپ بىلەمىن.
– اڭگىمەڭىزگە راحمەت!
اڭگىمەلەسكەن قورعانبەك امانجول,
«ەگەمەن قازاقستان».
