كوزگە ىستىق بەينە
سەنبى, 21 ءساۋىر 2012 7:46
سۋرەتشى ورال تاڭسىقباەۆقا الماتىدا ەسكەرتكىش ورناتىلدى
«ەلدىڭ مادەنيەتىن, سالت-ءداستۇرىن, ادەت-عۇرپىن جان-جاقتى زەرتتەپ بىلگەندە عانا عاجايىپ ۇلتتىق ونەر تۋىنداۋى مۇمكىن», دەگەن اتاقتى قىلقالام شەبەرى ورال تاڭسىقباەۆتىڭ تاستان قاشالعان ەسكەرتكىشى وڭتۇستىك استانادان ءوز ورنىن تاپتى.
سەنبى, 21 ءساۋىر 2012 7:46
سۋرەتشى ورال تاڭسىقباەۆقا الماتىدا ەسكەرتكىش ورناتىلدى
«ەلدىڭ مادەنيەتىن, سالت-ءداستۇرىن, ادەت-عۇرپىن جان-جاقتى زەرتتەپ بىلگەندە عانا عاجايىپ ۇلتتىق ونەر تۋىنداۋى مۇمكىن», دەگەن اتاقتى قىلقالام شەبەرى ورال تاڭسىقباەۆتىڭ تاستان قاشالعان ەسكەرتكىشى وڭتۇستىك استانادان ءوز ورنىن تاپتى.
كسرو حالىق سۋرەتشىسى, اكادەميك ورال تاڭسىقباەۆقا ورناتىلعان وسى ءبىر ەسكەرتكىش كوزىمىزگە ەرەكشە جىلىۇشىرادى. تالانتتى سۋرەتشىنىڭ ءمۇسىنى ءوزىنىڭ تاستان قاشالعانىن ۇمىتتىرىپ, ك ۇلىمسىرەپ تۇر. دارىن رەتىندە دە, ادام رەتىندە دە تاعدىردىڭ تالاي تەپەرىشىنەن ءوتىپ, وسى كۇنگە جەتكەنىنە قۋانا قارايتىن سياقتى. ەسكەرتكىشتىڭ تاعى ءبىر ەرەكشەلىگى, ول ورال تاڭسىقباەۆ اتىنداعى الماتى ساندىك-قولدانبالى ونەر كوللەدجىنىڭ ەڭ قابىلەتتى ۇستازدارىنىڭ قولىنان شىققان.
وسى ارادا بۇل كوللەدج ەلىمىزدىڭ تالاي مايتالمان سۋرەتشىلەرى مەن مۇسىنشىلەرىن بەينەلەۋ ونەرىنىڭ قىر-سىرىنا باۋلىعان, كەزىندەگى ن.گوگول اتىنداعى الماتى كوركەمسۋرەت ۋچيليششەسى ەكەندىگىن ايتا كەتۋ ارتىق بولماس. دەمەك, وسىدان 20 جىل بۇرىن ورال تاڭسىقباەۆ اتىن يەمدەنگەن كوللەدجدىڭ تاريحى 1937 جىلدان باستاۋ الادى. ال ەسكەرتكىشتىڭ قويىلۋى دا وسى 75 جىلدىق مەرەيتويعا ورايلاستىرىلىپ وتىر.
ءساۋىردىڭ كۇن شۋاعى سەبەلەگەن ءساتتى كۇنىنە ءدوپ كەلگەن ايتۋلى شاراعا ءارىسى تاشكەنتتەن, بەرىسى بىشكەكتەن دە ارنايى قوناقتار كەلدى. ەلىمىزدىڭ بەتكە ۇستار كەسكىندەمەشىلەرى, ايتۋلى سۋرەتشىلەرى مەن ونەر وكىلدەرى دە وسىندا.
العاشقى ءسوزدى و.تاڭسىقباەۆ اتىنداعى الماتى ساندىك-قولدانبالى ونەر كوللەدجىنىڭ ديرەكتورى, پروفەسسور سەيىتقالي شالاباەۆ الىپ, وسىناۋ ساۋاپتى ىسكە مۇرىندىق بولعاندار جايلى باياندادى.
قازاق كسر-نىڭ حالىق سۋرەتشىسى ۇكە اجيەۆ, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى ارىستانبەك مۇحامەدي ۇلى, سۋرەتشىلەر وداعىنىڭ توراعاسى بايتۇرسىن ومىربەكوۆ سىندى ونەر سالاسىنىڭ كورنەكتى وكىلدەرى ورال تاڭسىقباەۆتىڭ شىعارماشىلىق تۇلعاسى تۋرالى ءسوز ساباقتادى. كەلەشەكتە قولدانبالى ونەردىڭ كوسەگەسىن كوگەرتەمىز دەپ ءبىلىم الىپ جاتقان جاستارعا تالاي تاعىلىمدى اڭگىمەلەر مەن ەستەلىكتەر ايتىلدى.
وسى شاراعا ارنايى كەلگەن وزبەكستان ونەر اكادەمياسىنىڭ پروفەسسورى نيگورا احمەدقىزى مەن قىرعىزستانداعى ونەر كوللەدجىنىڭ ۇستازى تابىلدى بايبوسىنوۆ ورال تاڭسىقباەۆتىڭ كورشى ەلدەردە دە تالانتى تانىلعان, شوقتىعى بيىك سۋرەتكەر ەكەندىگىن ءسوز ەتتى.
ايناش ەسالي,
الماتى.
