ايەل بوساندىرعان جولسەرىك
سارسەنبى, 7 قاراشا 2012 7:23
انانىڭ قاي زاماندادا ەرلىك ىستەرى مەن اتقارعان جۇمىستارى از بولماعان. ەل باسىنا كۇن تۋىپ, ەتىگىمەن سۋ كەشكەن نەبىر زامانداردا دا ابزال جان قيىندىق اتاۋلىعا العاشقى بولىپ مويىماي توتەپ بەرگەندىگىن ەشكىم جوققا شىعارا الماس. ال سول جانداردىڭ جالعاسىنداي بۇگىنگى بەيبىت كەزەڭدە ەرلىكتەرىن وزگە قىرىنان كورسەتىپ, قايسار انا اتانىپ جاتقان نازىك جاندىلار قاتارى بۇگىن دە, شۇكىر, از ەمەس. الماتى – پاۆلودار باعىتىنداعى №45 جولاۋشىلار پويىزىنىڭ جولسەرىگى گۇلميرا شاكامانوۆانى دا وسى قاتارعا جاتقىزۋعا بولادى.
سارسەنبى, 7 قاراشا 2012 7:23
انانىڭ قاي زاماندادا ەرلىك ىستەرى مەن اتقارعان جۇمىستارى از بولماعان. ەل باسىنا كۇن تۋىپ, ەتىگىمەن سۋ كەشكەن نەبىر زامانداردا دا ابزال جان قيىندىق اتاۋلىعا العاشقى بولىپ مويىماي توتەپ بەرگەندىگىن ەشكىم جوققا شىعارا الماس. ال سول جانداردىڭ جالعاسىنداي بۇگىنگى بەيبىت كەزەڭدە ەرلىكتەرىن وزگە قىرىنان كورسەتىپ, قايسار انا اتانىپ جاتقان نازىك جاندىلار قاتارى بۇگىن دە, شۇكىر, از ەمەس. الماتى – پاۆلودار باعىتىنداعى №45 جولاۋشىلار پويىزىنىڭ جولسەرىگى گۇلميرا شاكامانوۆانى دا وسى قاتارعا جاتقىزۋعا بولادى.
گۇلميرا وسىدان ءتورت اي بۇرىن بولات جول ۇستىندە ەرەكشە وقيعاعا كۋا بولىپ, سونىڭ باس كەيىپكەرىنە اينالدى. ءتورت اي بۇرىن دەپ ايتىپ وتىرعانىمىزدىڭ وزىندىك سەبەبى دە جوق ەمەس. بۇعان جۋىردا «قتج» ۇك» اق پرەزيدەنتى اسقار ماميننىڭ بلوگىنا ششۋچە قالاسىنان ءۇرجىباەۆتار وتباسىنان كەلگەن العىس حات سەبەپ بولىپتى. وندا بىلاي دەلىنگەن: «ءبىز بولات جولدا كەز-كەلگەن قيىن جاعدايدا كومەككە ءازىر تۇراتىن كاسىبي ماماندار جۇمىس ىستەيتىنىنە ءتانتى بولدىق. الماتى – پاۆلودار جولاۋشىلار پويىزىنىڭ جولسەرىگى گۇلميرا زارۋبايقىزى باتىل دا جەدەل ارەكەت ەتۋىنىڭ ارقاسىندا ءبىزدىڭ نەمەرەمىز ميلانانى بوساندىرىپ الدى. وعان دەگەن العىسىمىز شەكسىز…» دەپ اعىنان اقەدىل العىسىن جاۋدىرادى ەرلى-زايىپتى ۇرجىباەۆتار ءوز حاتىندا.
گۇلميرا تابيعاتىنان قاراپايىم جان. كوپشىلىكتەن ەرەكشەلەنگەندى ۇناتپايدى. سول وقيعا جايىندا دا جالپاق جۇرتقا جار سالۋدى ءجون ساناماعان. بۇل باعىتتا ساپار شەككەن جولسەرىكتەردىڭ باستى ماقساتى انا مەن بالانىڭ دەنساۋلىعى بولعان. بار تىلەگى جاڭا تۋعان ءسابي ۇستىندە ەدى. گۇلميرا الماتىدان پويىزعا وتىرعان جاس جۇبايلاردى كورىپ, كەلىنشەكتىڭ اياعى اۋىر ەكەنىن, اۋىر بولعاندا دا ايى-كۇنى جاقىنداپ قالعانىن بىردەن اڭعارادى. الايدا وسى ساپاردا بوسانا قويار دەپ ويلاماپتى. پويىز سارىشاعان ستانساسىنان وتە بەرە تولعاعى باستالعان كەلىنشەكتى بولەك كۋپەگە جايعاستىرىپ, بوسانۋىنا كومەكتەسۋگە بارىن سالا كىرىسكەن گۇلميرا جولسەرىكتەردى دارىگەر تاۋىپ كەلۋگە جۇمسايدى. تولعاعى مازا بەرمەي, جانۇشىرا قينالعان كەلىنشەكتى كورگەن ول ءوزى دە ونىمەن بىردەي قينالىپ, تەردىڭ سۋ بوپ اققانىن بايقاماي دا قالادى. كەلىنشەككە بار ايتاتىنى «شىدا, شىدا, دارىگەر كەلىپ قالدى» دەپ دەمەۋ بەرە بەرۋ بولدى. دۇنيە ەسىگىن اشقان ءسابي كوكپەڭبەك بولىپ تۋعانى ءوز الدىنا, بىرازعا دەيىن دىبىسسىز جاتىپ جۇرتتى ءبىر ءۇرپيىستىرىپ تاستاعان. سودان ول ءسابيدى جاساندى جولمەن دەمالدىرۋعا تىرىسىپ باقتى. سول مەزەتتە شارانانىڭ شار ەتىپ شىققان دىبىسى ابدەن ۋايىمداپ, قالجىراعان گۇلميرانىڭ كوڭىلىن بوساتىپ جىبەردى… ۆاگون ءىشى ۋ-شۋ. جاس انامەن بىرگە تولعاتقانداي بولعان جولاۋشىلاردىڭ دا قۋانىشتارىندا شەك جوق. كوپشىلىك «بۇل ەندى ءسىزدىڭ دە قىزىڭىز», دەپ جولسەرىكتى قۇتتىقتاپ جاتتى…
گۇلميرانىڭ ءوزى دە ءۇش بالانىڭ اناسى. ەكى ۇلى ستۋدەنت بولسا, ءتورت جاسار دارياسى قىلىقتى قىز بولىپ ءوسىپ كەلەدى. گۇلميرا ساپارعا شىققان كەزدە كىشكەنتايىن قاتتى ساعىناتىندىعىن ايتادى.
«جولاۋشىلار تاسىمالى» اق باسشىلىعى قازىرگى تاڭدا گۇلميرانى ماراپاتتاۋدى ويلاستىرۋدا ەكەن. ءيا, ادامگەرشىلىك, انالىق قامقورلىعىنىڭ ارقاسىندا وزىنە جۇكتەلگەن مىندەتتەردى ابىرويمەن اتقارىپ ءجۇرگەن ابزال جانعا قانداي قۇرمەت كورسەتسە دە ارتىق بولماس.
ءابدىراحمان قىدىربەك,
«ەگەمەن قازاقستان».
