ەندى نە ىستەيمىن؟
سارسەنبى, 26 قىركۇيەك 2012 7:06
مەن ءبىر اياعى جوق مۇگەدەك بولسام دا قولىمنان كۇرەگىم تۇسپەگەن, شارۋادان قول ۇزە قويماعان, دۇنيە-مۇلكىم ءبىر باسىما جەتەتىن, اتا-بابامنان قالعان قارا شاڭىراق, ءتورت بولمەلى ۇيگە يە بولىپ وتىرعان جان ەدىم. اللانىڭ بۇيىرتپاعانى شىعار, ءبىراز جاسقا كەلگەنشە ۇيلەنىپ ءۇي بولا قويمادىم. وسىنىمدى پايدالانعان الاياق تاستانوۆا كاريما دەگەن ايەل ءبىزدىڭ اۋىلعا, مەنىڭ كورشىمنىڭ ۇيىنە كەلىپ جۇرگەن بولىپ, اقىرى كورشى-كولەمى بار, ازعىرىپ سول ايەلگە مەنى ۇيلەنىپ تىندىردى. ارينە, ازعىردى دەگەنىم ارتىقتاۋ شىعار, بىراق ەلۋدەن اسقان جاسىمدا وڭايلىقپەن ۇيلەنە قويۋىم دا قيىن ەدى.
سارسەنبى, 26 قىركۇيەك 2012 7:06
مەن ءبىر اياعى جوق مۇگەدەك بولسام دا قولىمنان كۇرەگىم تۇسپەگەن, شارۋادان قول ۇزە قويماعان, دۇنيە-مۇلكىم ءبىر باسىما جەتەتىن, اتا-بابامنان قالعان قارا شاڭىراق, ءتورت بولمەلى ۇيگە يە بولىپ وتىرعان جان ەدىم. اللانىڭ بۇيىرتپاعانى شىعار, ءبىراز جاسقا كەلگەنشە ۇيلەنىپ ءۇي بولا قويمادىم. وسىنىمدى پايدالانعان الاياق تاستانوۆا كاريما دەگەن ايەل ءبىزدىڭ اۋىلعا, مەنىڭ كورشىمنىڭ ۇيىنە كەلىپ جۇرگەن بولىپ, اقىرى كورشى-كولەمى بار, ازعىرىپ سول ايەلگە مەنى ۇيلەنىپ تىندىردى. ارينە, ازعىردى دەگەنىم ارتىقتاۋ شىعار, بىراق ەلۋدەن اسقان جاسىمدا وڭايلىقپەن ۇيلەنە قويۋىم دا قيىن ەدى. دەگەنمەن, جاستىڭ جەتىپ وتىرعانىنا دا مويىنسۇنىپ, ەكى بالاسى بار الگى ايەلگە ۇيلەندىم. ۇيلەندىم دەگەنمەن زاڭدى نەكەگە تۇرعان جوقپىز, ول ءوزىنىڭ قۇجاتىنىڭ جوقتىعىن, جوعالعانىن ايتىپ كەيىنگە شەگەرىپ ءجۇردى. بىراق ءدىن جولىمەن نەكەمىزدى قيىپ, قازاقى سالت-جورالعىمىزدى جاسادىق. ءسويتىپ, ول ايەل ءبىراز ۋاقىتتاردان سوڭ وزگەرە باستادى. انا-مىنانى ايتىپ, اقىر سوڭىندا ءوزىنىڭ لەنگىر قالاسىندا ءۇيى بارىن, ءارى ءبىزدىڭ اۋىلدا وعان جۇمىس جوق ەكەنىن العا تارتىپ, مەنىڭ ءۇيىمدى ساتىپ, سول جاققا كوشۋگە ۇگىتتەدى. مەن باس تارتىپ ەدىم, مەنەن اياعىم اۋىر دەپ سەندىردى. كونبەسەڭ, كەتەمىن, جالعىز قالاسىڭ, سەنەن اليمەنت الامىن دەپ قورقىتتى. اقىرى كەلىستىرىپ, ءۇيدى ساتۋ جايىمەن ءوزى اينالىسىپ كەتتى. سوڭىندا نازار توقاەۆ دەگەن كورشىمىزگە قالدىرىپ كەتەتىن بولىپ شەشتى. سىيعا تارتۋ كەلىسىم-شارتىمەن ءۇيدى سولارعا تاستاپ كەتتىك. سويتسەم ول الگى كورشىدەن 450 000 تەڭگە اقشا الىپتى.
ال ءبىز لەنگىرگە كوشىپ بارعاندا ول جاقتا كاريمانىڭ ەشقانداي ءۇيى جوقتىعى بەلگىلى بولدى. ءبىر ءسىڭلىسىنىڭ ۇيىنە بارىپ تۇردىق. بارعان سوڭ ول كوپ ۇزاماي بوساندى. ياعني, جۇكتىلىك مەنەن بولماعان. سويتسەم, ول وتە ىشكىش ايەل ەكەن. بارعان سوڭ ىشكىلىككە ابدەن سالىنىپ الدى. بارلىق قۇجاتتارىمدى وزىنە الىپ قويىپ, مەنى قارا جۇمىسقا جەكتى. كەتىپ قالۋعا مۇلدە اقشا بەرمەدى. زەينەتاقىمدى كوشەردە كەز كەلگەن جەردەن الۋعا ىڭعايلى بولادى دەپ كارتوچكا جۇيەسىنە اۋىستىرعان بولاتىن. ال كارتوچكا مەنىڭ قولىما تيمەدى. سويتسەم, ول مەنسىز بارىپ الىپ, قۇپيا كودتارىن دا يەلەنگەن ەكەن. بىرنەشە اي بويى زەينەتاقىمدى الىپ ءجۇرىپتى. ال بانك قىزمەتكەرلەرى بۇل جاعدايعا قالاي جول بەرگەنى بەلگىسىز. كەيىن انىقتاۋعا كۇش سالعانىمدا ماعان, ءوزىم الدىم دەپ قول قويدىرتىپ الدى. قويمايمىن دەپ ەدىم, بۇكىل اۋىلداعى اعايىندى اراعا سالىپ, كۇشتەپ قويدىردى. سوعان قاراعاندا, اعايىنعا دا قىسىم تۇسىرگەن بولۋى كەرەك. سونىمەن, الگى ايەلدىڭ ءسىڭلىسىنىڭ ۇيىندە قورلىقپەن كۇندەرىم ءوتىپ جاتتى. ءبىر كۇنى سول جاقتان جالدانىپ ىستەيتىن جۇمىس تاۋىپ, ياعني ءبىر كىسىنىڭ ءۇيىنىڭ شارباعىن جاساپ بەرىپ, از-مۇز جولعا اقشا تاپتىم دا, اقىرى ول جاقتان اۋىلىما قاشىپ كەتتىم. كەلە سالا الگى ايەلدى سوتقا بەرۋگە ارەكەتتەنىپ, ءۇيىمدى قايتارۋدىڭ جولىن ىزدەدىم.
ءۇيدى سىيعا تارتۋ كەلىسىم-شارتىمەن توقاەۆ نازاردىڭ بالاسى كامەلەتكە تولماعان داداشوۆ التىنبەككە ءوتىپتى. بۇل وقيعا 2010 جىلى بولعان. مەن, پروكۋراتۋراعا ارىز ءتۇسىردىم. كاريماعا ىزدەۋ سالىندى.
ءسويتىپ جۇرگەندە كاريما تاستانوۆا ءبىزدىڭ اۋىلعا قايتىپ كوشىپ كەلىپ, مەنىڭ ءۇيىمدى قايتارىپ بەرەتىنىن, توقاەۆتان سىيعا تارتۋ كەلىسىمىن الىپ بەرەتىنىن ايتتى. قۇجاتتارىمدى قايتاراتىنىن ايتىپ ۇيىنە شاقىردى. سول بارعانىمدا ول قۋلىققا سالىپ, مەنى الداپ-ارباپ, اقىرىندا اراق ىشكىزىپ, ءبىر قۇجاتقا قول قويدىرىپ الدى. ول الگى سىيعا تارتۋ كەلىسىم-شارتىن بۇزعاندا تولەنۋى ءتيىس 9200 تەڭگەنى تولەۋ ءۇشىن قويىلىپ وتىرعان قول دەپ ءتۇسىندىردى. سويتسەم ول ءۇيدى نازار توقاەۆقا اۋدارىپ بەرىپ وتىرعان قۇجات ەكەن.
سودان بەرى اۋداندىق پروكۋراتۋراعا ارىز ءتۇسىرىپ, ءتىپتى وبلىستىق پروكۋراتۋراعا دەيىن جازدىم. اقىرى سوت بولدى. بىراق مەن اۋداندىق سوت, سۋديا پ.ماحامبەتوۆتىڭ شەشىمى زاڭسىز دەپ ەسەپتەيمىن. ءتىپتى, سوتقا ايلاكەر تاستانوۆا كاريما قاتىسپادى. رەداكتسياعا حات جازىپ وتىرعانداعى باستى سەبەبىم دە وسى ءىستى قايتا قاراپ, سوتتى تاعى ءبىر مارتە وتكىزۋدى سۇرايمىن. مۇمكىن, قۇقىق قورعاۋ ورگاندارى وسى حاتىمنان كەيىن ءىستى قايتا قاراۋعا ارەكەت جاسار دەگەن ۇمىتتەمىن. سەبەبى, بۇل حات كولەمىنە وقيعا جەلىسى تولىق سىيمادى. ال ايلاكەر ايەلدىڭ ارەكەتتەرى كوپ تەكسەرۋدى قاجەت ەتەدى.
ءالىمجان قالمىرزاەۆ.
وڭتۇستىك قازاقستان وبلىسى,
سوزاق اۋدانى,
شولاققورعان اۋىلى.
