قارۋلى قاراقشىلاردىڭ كوزى جويىلدى
سەنبى, 4 تامىز 2012 7:40
ميلليوننان استام تۇرعىنى بار شاھاردىڭ تىنىشتىعىن كۇنى-ءتۇنى قورعايتىن ءتارتىپ ساقشىلارىنىڭ وزدەرىنىڭ كاسىبي مىندەتىنە دەگەن جوعارى جاۋاپكەرشىلىگى قانشاما اۋىر قىلمىستىڭ جولىن كەستى دەسەڭىزشى؟!
سەنبى, 4 تامىز 2012 7:40
ميلليوننان استام تۇرعىنى بار شاھاردىڭ تىنىشتىعىن كۇنى-ءتۇنى قورعايتىن ءتارتىپ ساقشىلارىنىڭ وزدەرىنىڭ كاسىبي مىندەتىنە دەگەن جوعارى جاۋاپكەرشىلىگى قانشاما اۋىر قىلمىستىڭ جولىن كەستى دەسەڭىزشى؟!
الماتى قالاسىنىڭ تۇركسىب اۋدانىندا قوعامدىق ءتارتىپتى قورعاۋدى قامتاماسىز ەتۋ قىزمەتىنە كىرىسكەن «بوران-170» پاترۋلدىك ەكيپاجىنا وتكەن سەنبىدە تاڭعى توعىزدا قارۋلى شابۋىل جاسالدى. بەكماحانوۆ كوشەسىندە جول شەتىندە تۇرعان كۇدىكتى «حيۋنداي» كولىگىندەگىلەردىڭ قۇجاتتارىن تەكسەرمەك بولعاندا, ولار پوليتسەيلەرگە تۇتقيىلدان وق جاۋدىرعان. باسىنا تيگەن وقتان اعا لەيتەنانت ەرجان قايراقباەۆ بىردەن كوز جۇمىپ, ونىڭ ارىپتەسى لەيتەنانت ەرناز قوجاحمەتوۆ اۋىر حالدە اۋرۋحاناعا جەتكىزىلگەنىمەن, ونى قۇتقارۋ مۇمكىن بولمادى.
الماتى قالالىق ءىىد ءباسپاسوز قىزمەتىنىڭ جەتەكشىسى, پوليتسيا مايورى سالتانات ازىربەكتىڭ ايتۋىنشا, بۇل وقيعاعا قاتىسى بار قارۋلى قىلمىسكەرلەردى قۇرىقتاۋ ماقساتىندا تاجىريبەلى قىزمەتكەرلەردەن شۇعىل تۇردە جەدەل-تەرگەۋ توبى قۇرىلعان. ءسويتىپ «قۇرىقتاۋ» ارناۋلى جوسپارى بويىنشا التى قىلمىسكەر «احسەلكەنت» شاعىن اۋدانىنداعى كوپ قاباتتى ۇيدەگى پاتەرلەردىڭ بىرىندە جاسىرىنعاندىعى انىقتالدى. اۋىر جانە اسا اۋىر قىلمىستارى ءۇشىن بىرنەشە جىلىن تەمىر توردا وتكىزگەندەر بوستاندىققا شىققان بويدا باستارى قايتادان قوسىلىپ, «ەسكى ادەتتەرىن» قايتا جالعاستىرعان.
وڭتۇستىك استاناداعى بىرنەشە ءىرى كاسىپورىندارعا قاراقشىلىق شابۋىل جاساعان قىلمىستىق توپتىڭ مۇشەلەرىن قۇرىقتاۋ الماتى قالالىق ىشكى ىستەر دەپارتامەنتىنىڭ باستىعى ەرلان تۇرعۇمباەۆتىڭ جەتەكشىلىگىمەن ءوتتى. ارناۋلى وپەراتسياعا ءىىم-ءنىڭ «سۇڭقار» جانە «ارلان» توپتارى مەن جەدەل ارەكەت ەتۋ وتريادى قىزمەتكەرلەرى قاتىستى. قاراقشىلىق شابۋىلمەن اينالىسقان قىلمىستىق توپتى تۇتقىنداۋ ءىس-شاراسى باستالماس بۇرىن بۇل ۇيلەردىڭ 162 تۇرعىنى قاۋىپسىز جەرگە ورنالاستىرىلدى. سودان سوڭ قىلمىسكەرلەردەن ءوز ەرىكتەرىمەن بەرىلىپ, قارۋلارىن تاستاۋ تالاپ ەتىلدى. الايدا, بۇل ۇسىنىسقا مويىن بۇرماي, قارسىلىق كورسەتكەن قاراقشىلارعا قارۋ قولدانىلىپ, التى قىلمىسكەردىڭ كوزى جويىلدى. ال جالعا الىنعان ءبىر ءبولمەلى پاتەردى ءتىنتۋ بارىسىندا ەكى «كالاشنيكوۆ» اۆتوماتى, ءبىر اڭشى مىلتىعى, ەكى تاپانشا, ءبىر رەۆولۆەر, وق دارىلەر تابىلدى, دەيدى سالتانات ازىربەك.
رەسپۋبليكاداعى تۇزەۋ مەكەمەلەرىنىڭ بىرىندە قاراقشىلىق شابۋىل, ۇرلىق, ەسىرتكى وتكىزۋ جانە باسقا دا اۋىر قىلمىستارى ءۇشىن جازاسىن وتەگەن قىلمىستىق توپ مۇشەلەرىنىڭ شىعىس قازاقستان, جامبىل جانە الماتى وبلىستارىنىڭ تۇرعىندارى ەكەندىگى انىقتالدى. «احسەلكەنت» تۇرعىن ءۇي كەشەنىندەگى ءۇيدىڭ ءتورتىنشى قاباتىندا ورنالاسقان ءبىر بولمەلى پاتەردەگى قىلمىسكەرلەردى قۇرىقتاۋعا ەكى ساعاتقا جۋىق ۋاقىت كەتتى. ارناۋلى وپەراتسيا بارىسىندا پوليتسيا قىزمەتكەرلەرى مەن بەيبىت تۇرعىندار اراسىندا زارداپ شەككەندەر بولعان جوق. قازىرگى كەزدە وسى قىلمىس بويىنشا تەرگەۋ جۇرگىزىلۋدە. ءسوز رەتى كەلگەندە ايتا كەتەتىن تاعى ءبىر ءجايت, قالادا تىركەلەتىن قىلمىستىڭ جارتىسىنان استامىن جاقىن شەتەلدەردەن, رەسپۋبليكانىڭ وزگە ايماقتارىنان كەلگەندەر مەن زاڭسىز ميگرانتتار جاساۋدا. ستاتيستيكالىق مالىمەتتەرگە قاراعاندا, الماتىعا ءتاۋلىگىنە سىرتتان ەكى ءجۇز مىڭداي اۆتوكولىك قاتىنايدى ەكەن. وكىنىشكە وراي, ولاردىڭ كوپشىلىگى ءتىركەلمەيدى.
تامىز ايىنىڭ العاشقى كۇنى قالا اكىمى احمەتجان ەسىموۆتىڭ قاتىسۋىمەن وتكەن جيىندا بۇل ماسەلەگە باسا نازار اۋدارىلدى. اكىمنىڭ پىكىرىنشە, قۇقىق قورعاۋ ورگاندارى وڭتۇستىك استاناعا كەلەتىندەرگە قاتىستى جۇمىستى ودان ءارى جەتىلدىرۋى ءتيىس. انىعىراق ايتقاندا, جول پوليتسياسى باسقارماسى قالاعا ەنەتىن كولىككە باقىلاۋدى كۇشەيتكەنى ءجون. سونىمەن قاتار, مۇنداي ماڭىزدى ءىس-شارادا قۇقىق قورعاۋ ورگاندارىنا كومەك كورسەتۋ جونىندەگى قوعامدىق كەڭەس قۇرۋ قاراستىرىلماق.
ماسەلەن, قاندى قول قاراقشىلاردىڭ كوزى جويىلعان شاعىن اۋداندا وتىزعا جۋىق پاتەردىڭ جالعا بەرىلگەنى انىقتالدى. الايدا, ونداعى تۇرعىندار تۋرالى ءمالىمەت جوق. سوعان وراي, قالا باسشىسى اۋدان اكىمدەرىنە ءىىد مەن پيك-تەرمەن بىرلەسىپ, جالعا بەرىلەتىن پاتەرلەردىڭ قورى بويىنشا اقپاراتتى جۇيەلەندىرۋدى تاپسىردى.
باقىت بالعارينا,
«ەگەمەن قازاقستان».
الماتى.
