ەستەرىڭىزگە سالا كەتەيىك, ەليزابەت تۇرسىنباەۆا جاقىندا جاپونيانىڭ سايتاما قالاسىندا وتكەن مانەرلەپ سىرعاناۋدان الەم چەمپيوناتىندا كۇمىس جۇلدەگەر اتاندى. بۇل - ەلىمىزدە اتالمىش سپورت تۇرىنەن قىزدار اراسىندا قول جەتكەن ەڭ جوعارى تابىس.
سونداي-اق, قازاقستاندىق مانەرلەپ سىرعاناۋشى الەمدىك تاريحتا ءبىرىنشى رەت ءتورت اينالىمدىق سالحوۆتى قاتەسىز ورىندادى. جاپون جەرىنەن جۇلدەمەن قايتقان ساڭلاق ءوزىنىڭ اتامەكەنى - سىر وڭىرىنە ارنايى كەلدى. ول بۇگىن ءوزىنىڭ جۇلدەسىنە ارنالعان رەسپۋبليكالىق تۋرنيرگە قاتىسادى.
ەليزابەت رەسەي استاناسى - ماسكەۋ قالاسىندا دۇنيەگە كەلگەن. ونىڭ اكەسى - بايتاق قىزىلوردا وبلىسىنىڭ تۋماسى. سوندىقتان ەليزابەت حالىقارالىق جارىستاردا ەلىمىزدىڭ اتىنان سىنعا ءتۇسىپ, سىر ءوڭىرىنىڭ داڭقىن اسپانداتىپ كەلەدى.
مۇز ايدىندا مىڭ بۇرالا بيلەيتىن سپورتشىعا جەرگىلىكتى باسشىلىق قارجىلاي قولداۋ جاساپ جۇرگەنى بەلگىلى. قىزىلوردا وبلىسىنىڭ اكىمى قىرىمبەك كوشەرباەۆ سىر وڭىرىنە ارنايى كەلگەن حالىقارالىق دارەجەدەگى سپورت شەبەرى ەليزابەت تۇرسىنباەۆامەن كەزدەستى. ونى الەم چەمپيوناتىنداعى تولاعاي تابىسىمەن قۇتتىقتادى.
«ءبىز ءبىراز جىل بۇرىن مۇز ايدىنى سپورت كەشەنىن سالدىق. قازىر ول ورىن سىر جاستارىنىڭ ەرەكشە ىقىلاسپەن باراتىن مەكەنىنە اينالدى. مەن وسى ورتالىقتا بولاشاقتا ەلىمىزدىڭ نامىسىن حالىقارالىق ارەنالاردا قورعايتىن دارىندى سپورتشىلار وسەدى دەپ سەنەمىن. ايماعىمىزدا ەگەمەن ەلىمىزدىڭ اتاعىن الەمگە ايگىلى ەتەتىن مانەرلەپ سىرعاناۋشى-چەمپيونداردىڭ تۇتاس شوعىرى بولسىن! ەليزابەت, سەنىڭ ەسىمىڭ بۇكىل الەمگە تانىمال بولۋىنا تىلەكتەسپىن», دەدى ايماق باسشىسى.
ءوڭىردىڭ سپورت سالاسىنىڭ دامۋىنا قوسقان ەلەۋلى ۇلەسى ءۇشىن ەليزابەت قىزىلوردا وبلىسىنىڭ قۇرمەت گراموتاسىمەن ماراپاتتالىپ, وعان 2 ملن تەڭگەنىڭ سەرتيفيكاتى تابىستالدى. ءوز كەزەگىندە ەليزابەتتىڭ اتا-اناسى وبلىس اكىمىنە جانە سىر جۇرتشىلىعىنا قىزدارىنا قولداۋ كورسەتكەنى ءۇشىن العىس ايتتى.
«مەن ءۇشىن اتا-انام مەن جاتتىقتىرۋشىلارىمنىڭ كومەگى ەرەكشە ءرول اتقاردى. ارينە, ماعان كورسەتكەن ءسىزدىڭ قولداۋىڭىز بەن جەرلەستەرىمنىڭ سەنىمى وتە ماڭىزدى. سىزدەرگە زور العىس ايتامىن, بۇل - ءبىزدىڭ ورتاق جەڭىسىمىز», دەدى ەليزابەت تۇرسىنباەۆا.
بۇگىن قىزىلوردادا «مۇز ايدىنى» كەشەنىندە ەليزابەت تۇرسىنباەۆانىڭ جۇلدەسى ءۇشىن العاشقى «كوكتەم جۇلدىزدارى» رەسپۋبليكالىق اشىق جاسوسپىرىمدەر ءتۋرنيرى باستالادى. ءتۋرنيردىڭ اشىلۋ سالتاناتىندا ەليزابەت تە ونەر كورسەتەدى. الداعى ۋاقىتتا «كوكتەم جۇلدىزدارى» ءتۋرنيرى جىل سايىن وتكىزىلەدى دەپ جوسپارلانىپ وتىر.
