ادام تاعدىرى ويىنشىق پا؟
سارسەنبى, 6 ماۋسىم 2012 7:04
2010 جىلدىڭ 20 شىلدەسى كۇنى تۇستە مەنىڭ ۇيالى تەلەفونىما بەلگىسىز نومىرمەن ءبىر ەر ادام قوڭىراۋ شالىپ, استانا قالاسىنداعى الماتى اۋداندىق ىشكى ىستەر بولىمىنە تەزىرەك كەلىپ, قىزىمدى الىپ كەتۋدى بۇيىردى. ەشتەڭەگە تۇسىنبەگەن سوڭ سول نومىرگە قايتا قوڭىراۋ شالىپ ەدىم, تەلەفوندى كوتەرمەدى. ارتىنشا جولداسىما قوڭىراۋ شالدىم, تەلەفونى ءسوندىرۋلى ەكەن. ءوز-وزىمە كەلە الماي, الماتى اۋداندىق ىشكى ىستەر بولىمىنە كەلدىم. بىراق, كەزەكشى پوليتسيا مەنى ىشكە كىرگىزبەدى. ءبىر ساعاتتان اسا ۋاقىت وتكەندە ءبىر جاس جىگىت جوعارىدان قىزىمدى جەتەكتەپ الىپ كەلە جاتقانىن كوردىم.
سارسەنبى, 6 ماۋسىم 2012 7:04
2010 جىلدىڭ 20 شىلدەسى كۇنى تۇستە مەنىڭ ۇيالى تەلەفونىما بەلگىسىز نومىرمەن ءبىر ەر ادام قوڭىراۋ شالىپ, استانا قالاسىنداعى الماتى اۋداندىق ىشكى ىستەر بولىمىنە تەزىرەك كەلىپ, قىزىمدى الىپ كەتۋدى بۇيىردى. ەشتەڭەگە تۇسىنبەگەن سوڭ سول نومىرگە قايتا قوڭىراۋ شالىپ ەدىم, تەلەفوندى كوتەرمەدى. ارتىنشا جولداسىما قوڭىراۋ شالدىم, تەلەفونى ءسوندىرۋلى ەكەن. ءوز-وزىمە كەلە الماي, الماتى اۋداندىق ىشكى ىستەر بولىمىنە كەلدىم. بىراق, كەزەكشى پوليتسيا مەنى ىشكە كىرگىزبەدى. ءبىر ساعاتتان اسا ۋاقىت وتكەندە ءبىر جاس جىگىت جوعارىدان قىزىمدى جەتەكتەپ الىپ كەلە جاتقانىن كوردىم. قىزىمنىڭ بەت-اۋىزى ءىسىپ, ابدەن جىلاعانى كورىنىپ تۇر. ءوز-وزىنە كەلەر ەمەس. پاپاڭ قايدا, دەپ سۇراسام, ونى قاماپ تاستادى دەدى. قولىمنان كەلەر شارا بولماعان سوڭ, قىزىمدى الىپ ۇيگە قايتتىم. سول ءتۇنى ساعات 12-دەن اسقاندا جولداسىم ۇيگە قوڭىراۋ شالدى. وزىنە د.جاركوۆ دەگەن بىرەۋدى ءولتىردى دەگەن كۇدىكپەن ايىپ تاعىپ وتىرعانىن جانە تاڭەرتەڭنەن بەرى قيناپ, قىلمىستى مويىندايسىڭ نە بولماسا باسقا شارا قولدانامىز دەپ قوقان-لوقى جاساپ جاتقانى تۋرالى ايتتى. سول مەزەتتە قوڭىراۋ ءۇزىلىپ كەتتى. ەرتەسىنە ە.ىدىرىسوۆ دەگەن كىسىنى قورعاۋشى رەتىندە جالداپ, جولداسىممەن كەزدەستىردىم. ە.ىدىرىسوۆ جولداسىما ءىستى مويىنداي سال, ءبىر-ەكى رەت تەپتىم دەپ ايتا سال, كەيىن سەنى قىلمىستىق كودەكستىڭ 257-بابىمەن شىعارىپ الامىن دەدى. سوعان سەنىپ قالعان جولداسىم ا.تەشەباەۆ سول كىسىنىڭ ايتقاندارىن ايتىپ, ءىستى ناسىرعا شاپتىرىپ الدى. جولداسىمنىڭ وسىلاي ايتقانىن قاجەت ەتىپ تۇرعان تەرگەۋشى, سول ءسوزدى قاعىپ الىپ, قىلمىستىق كودەكستىڭ 103-بابى 2-تارماعى بويىنشا ايىپ تاعىپ جىبەردى.
شىلدەنىڭ 22-ءسى كۇنى تۇستەن كەيىن ىشكى ىستەر دەپارتامەنتىنەن قوڭىراۋ شالىپ, ايتىلعان جەرگە كەلۋىمدى سۇرادى. سول جەرگە كەلسەم, مەنى تەكسەرىپ, ۇيالى تەلەفونىمدى, سومكەمدى الىپ, ۇيگە ءتىنتۋ جۇرگىزەتىنىن ايتتى. ولار ۇيگە كەلىپ, ءتىنتۋ جۇمىستارىن جۇرگىزىپ, جولداسىمنىڭ اياق كيىمىن, سپورتتىق كيىمدەرىن ساراپتاماعا الىپ كەتتى.
سودان كەيىن, ءىستى جۇرگىزىپ جاتقان استانا قالالىق ىشكى ىستەر دەپارتامەنتىنىڭ تەرگەۋشىسى م.ومىرباەۆقا بارىپ, قوعامدىق قورعاۋشى بولۋىم ءۇشىن قاۋلى شىعارۋىن ءوتىندىم. 2010 جىلدىڭ قازان ايىندا №2 الماتى اۋداندىق سوتىندا سۋديا د.نۇرماعامبەتوۆتىڭ توراعالىعىمەن سوت پروتسەسى جۇرگىزىلدى. ول ءىستى قايتا قاراۋعا جىبەردى. ونىڭ سەبەبى, قىلمىستىق كودەكستىڭ 103-بابى 3-تارماعى بويىنشا ىسكە قاتىسۋشىلاردىڭ ءىس-ارەكەتتەرىنە بايلانىستى ولاردى دا جاۋاپقا تارتۋ كەرەك ەكەن. بىراق, تەرگەۋشى م.ومىرباەۆ قىلمىستىق ءىستى ەش وزگەرىسسىز سوتقا قايتا جولدادى. 2011 جىلدىڭ شىلدە ايىندا سول №2 الماتى اۋداندىق سوتىنىڭ سۋدياسى ەسيموۆا ءىستى ەكىنشى رەت قايتا تەرگەۋگە جىبەردى. دەگەنمەن, مەنىڭ جولداسىما قاتىستى وسى ءىستى تەرگەۋشى ومىرباەۆ مەنىڭ جولداسىمنىڭ كونستيتۋتسيالىق قۇقىعىنا نۇقسان كەلتىرە وتىرىپ, ءىستى ورىس تىلىندە ءجۇرگىزدى. تەشەباەۆتىڭ مەملەكەتتىك تىلدە تۇسىنىكتەمە بەرۋىنە قارسى بولدى. سەبەبى, ومىرباەۆ قازاقشا بىلمەيتىندىگىن العا تارتىپ, ءىستى ورىس تىلىندە جۇرگىزەتىنىن ايتتى.
ءسويتىپ, جولداسىما قاتىستى ءىس استانا قالاسىنىڭ ارنايى مامانداندىرىلعان قىلمىستىق ىستەر قارايتىن سوتىنا جىبەرىلىپ, ونى سۋديا ەرمەكوۆ جۇرگىزدى. سوتتا م.بيرماحانوۆ, ا.تە, ا.گونچارەنكو, س.پاۆلەنكو سياقتى كۋاگەرلەر ءوز سوزدەرىن ايتتى. ونىڭ ىشىندە ا.گونچارەنكو رىسبەككە قارسى ەشقانداي كىنا قويا المادى. ال قالعاندارى كورمەگەن نارسەلەرىن ايتىپ, وتىرىك كۋا بولدى. سونىڭ ىشىندە دانيار كۇلەنباەۆ مەنىڭ جولداسىم رىسبەكتىڭ د.جاركوۆتىڭ ءولىمىنە قاتىسى جوق ەكەندىگىن, ونى تەرگەۋشى ومىرباەۆ قورقىتقانى تۋرالى ايتىپ بەردى. سونىڭ كەسىرىنەن جالعان كۋا بولعاندار, اركىم ءوز جاعدايىن ويلاپ, كىناسىز ادامعا جالا جاۋىپ وتىر. كۋاگەر د.كۇلەمباەۆ كىناسىز ادامعا 14 جىل كەسىلگەنىنە, ءوزىنىڭ بەرگەن جالعان ايعاقتارىنا وكىنىپ, قازىرگى ۋاقىتتا ءتيىستى ورگاندارعا ارىزدار جازۋدا. دەگەنمەن, سوتتا ونىڭ ايتقاندارى قاپەرگە دە الىنبادى. سوندا, سوت-تەرگەۋ ورگاندارى ءۇشىن ادام تاعدىرىنىڭ ويىنشىق بولعانى ما؟
ايگۇل باسىعاراەۆا,
قوعامدىق قورعاۋشى.
