سىناقتان كۇتەرىمىز كوپ
سەيسەنبى, 24 ءساۋىر 2012 7:16
قازاقستان رەسپۋبليكاسىنىڭ ىشكى ىستەر مينيسترلىگىنىڭ جەكە قۇرامىن كەزەكتەن تىس اتتەستاتتاۋدان وتكىزۋ ماسەلەسى بۇگىندە كەڭ تالقىلانۋدا. ساقشىلار قىزمەتىن ىلگەرى دامىتاتىن مۇنداي باستامالار مەن تۇبەگەيلى وزگەرىستەر كەلەشەكتە زاڭنىڭ بۇزىلۋىن, قاعيداتسىزدىقتىڭ ورىن الۋىن بولدىرماۋ نيەتىندە مىندەتتەلگەنى ايان.
سەيسەنبى, 24 ءساۋىر 2012 7:16
قازاقستان رەسپۋبليكاسىنىڭ ىشكى ىستەر مينيسترلىگىنىڭ جەكە قۇرامىن كەزەكتەن تىس اتتەستاتتاۋدان وتكىزۋ ماسەلەسى بۇگىندە كەڭ تالقىلانۋدا. ساقشىلار قىزمەتىن ىلگەرى دامىتاتىن مۇنداي باستامالار مەن تۇبەگەيلى وزگەرىستەر كەلەشەكتە زاڭنىڭ بۇزىلۋىن, قاعيداتسىزدىقتىڭ ورىن الۋىن بولدىرماۋ نيەتىندە مىندەتتەلگەنى ايان.
اعىمداعى جىلدىڭ 8 ءساۋىرىندە ەلباسى «قازاقستان رەسپۋبليكاسى قۇقىق قورعاۋ ورگاندارىنىڭ قىزمەتكەرلەرىن كەزەكتەن تىس اتتەستاتتاۋدان وتكىزۋ تۋرالى» جارلىققا قول قويعانى بەلگىلى. اتتەستاتتاۋدان كەيىن پوليتسەيلەردىڭ ەڭبەكاقىسى مەن الەۋمەتتىك كەپىلىن كوبەيتۋ ءماسەلەسى دە قارالۋعا ءتيىس. قايتا اتتەستاتتاۋ ءار پوليتسەي الدىنا قويىلعان تالابى مەن لاۋازىمىنا جاۋاپ بەرۋى ءتيىس دەگەندى بىلدىرەدى. وعان پوليتسەيلەردىڭ كاسىبي داعدىسى, ءبىلىم دەڭگەيى مەن دەنە تاربيەسى دايىندىعى دا ساي بولۋى شارت. ءىىب-ءنىڭ ءار قىزمەتكەرى تەوريالىق جانە دەنە تاربيەسى دايىندىعى بويىنشا ەمتيحان تاپسىرۋمەن قاتار, اتقارىپ وتىرعان لاۋازىمىنا سايكەس پسيحولوگيالىق جانە مەملەكەتتىك ءتىلدى ءبىلۋ دەڭگەيىن انىقتاۋ ءۇشىن بىرقاتار تەست تاپسىراتىندىعى – وتە قۇپتارلىق ءىس.
كەڭ كولەمدە جۇرگىزىلگەلى وتىرعان بۇل شارانى كادرلىق ساياساتتى نىعايتۋ, ەلىمىزدىڭ ىشكى تۇراقتىلىعىنا, قۇقىق ءتارتىبىنە, زاڭنىڭ ساقتالۋىنا جاۋاپتى ادامداردىڭ كاسىبي دەڭگەيىن جەتىلدىرۋ ماقساتىندا قولعا الىنعان ماڭىزدى قادام دەپ بىلەمىن. قازاقستان قوعامى بۇل اتتەستاتتاۋدى جالپى پوليتسيا قىزمەتىن شىن مانىندە ءتيىمدى ەتۋگە, ەل ىشىندە قۇقىق قورعاۋ ورگاندارى قىزمەتكەرلەرىنىڭ ءمارتەبەسىن كوتەرۋگە مۇمكىندىك بەرەتىن ۋاقىت تالابى دەپ قابىلداۋدا. ىشكى ىستەر سالاسى اقىل-وي ءورىستىڭ جوعارىلىعىن عانا ەمەس, سونداي-اق ازاماتتىق جانە قۇقىقتىق تولىعۋدى تالاپ ەتەتىن قىزمەتتىڭ ەرەكشە ءتۇرى. بىلتىرعى جىلى ەلىمىزدىڭ بىرقاتار قالالارىندا ورىن العان كەلەڭسىز وقيعالار ءوز مىندەتىن اتقارۋدا دايىن ەمەس بولىپ شىققان كەيبىر پوليتسيا قىزمەتكەرلەرىنىڭ كاسىبي جانە پسيحولوگيالىق دەڭگەيىن بايقاتتى. ىرىتكى سالۋشى ويى بۇزىق قىلمىسكەرلەرمەن كۇرەسۋگە, جالپى قارۋلى قاقتىعىسقا دايىندىق تاجىريبەسىنىڭ جوقتىعى – تاۋەلسىز ەلدىڭ تىنىشتىعىنا جاۋاپتى قىزمەت وكىلدەرى ءۇشىن ۇلكەن كەمشىلىك.
ءسوز ەتۋگە كوڭىلىمىز سوقپاسا دا, باق ارقىلى ەلدەگى كەي كەلەڭسىزدىكتەردەن حاباردار بولىپ وتىرمىز. سونىڭ ءبىرى, پوليتسيا قىزمەتكەرلەرى جازىم بولعان وقيعالاردىڭ دەنىندە, ساراپتاما كورسەتكەندەي, قورعانۋدىڭ قاراپايىم ەرەجەلەرىن ساقتاماعاندىق جاتىر. ونىڭ سىرتىندا ەلمەن تىعىز بايلانىستاعى, ءتارتىپ پەن تىنىشتىق كۇزەتىندە ءجۇرگەن ءاربىر قىزمەتكەر ءۇشىن ماڭىزدى مىنەز – توزىمدىلىك پەن بايسالدىلىق, ءوزىن ءوزى ۇستاي ءبىلۋ قاسيەتتەرى بۇگىنگى قۇقىق قورعاۋ ورگانى قىزمەتكەرلەرىندە ازايىپ بارا جاتقانداي.
كادر ساياساتى ارقاشاندا باسشىلىق قۇرام مەن قول استىنداعىلاردىڭ, مەملەكەتتىك قۇرىلىمدار مەن اتقارۋشى بيلىكتىڭ, ەڭ باستىسى حالىق پەن ولاردىڭ قۇقىعى مەن بوستاندىعى سەنىپ تاپسىرىلىپ, ولاردى قورعاۋ قاتارىندا تۇرعانداردىڭ اراسىنداعى ءوزارا قارىم-قاتىناستىڭ كۇردەلى تىزبەگىندە ماڭىزدى ءبولىگى بولعان جانە بولىپ قالا بەرمەك. ارينە سوڭعى كەزدەرى ىشكى ىستەر ورگاندارىنا كەزدەيسوق, پايداكۇنەم ادامداردىڭ ەنۋ دەرەكتەرى ورىن الىپ جاتقاندىعى ەشكىمگە قۇپيا ەمەس. ءوز وكىلەتتىگىن اسىرا پايدالانىپ, تەرىس ءىس-ارەكەتتەرمەن, پوليتسيا قىزمەتكەرلەرىنە جات قىلىقتارمەن كوزگە ءتۇسىپ جۇرگەن دەرەكتەر سول بىلىكتىلىكتىڭ تومەندىگىنەن تۋىنداۋدا. جەكە قۇرامدى اتتەستاتتاۋ ىرىكتەۋدىڭ, كۋرسانتتاردى, وفيتسەرلەردى, سەرجانتتار قۇرامىن وقىتۋدىڭ جاڭا ءتيىمدى تالاپتارىن انىقتاۋعا مۇمكىندىك بەرىپ قانا قويماي, ومىرلىك ۇستانىمدارى جەكە قارا باستارىنىڭ قامىن ويلايتىن, ارام نيەتتەرىن جۇزەگە اسىرۋ ءۇشىن كەلگەن قىزمەتكەرلەردەن پوليتسيانىڭ قاتارىن تازارتۋعا دا مۇمكىندىك بەرەدى.
بولاشاق پوليتسەيلەرگە قويىلاتىن تالاپتار نەگىزدى ءارى اسا قاجەتتى بولعانى ءجون. بۇگىنگى كۋرسانتتاردان, ەرتەڭگى پوليتسەيلەردەن قىلمىستىڭ اشىلۋى, قۇقىق بۇزۋشىلىقتىڭ الدىن الۋ ساپاسى جوعارى دەڭگەيدە تالاپ ەتىلەتىن بولادى. مۇنىڭ ءبارى جالپى العاندا ەلىمىزدەگى تۇراقتىلىققا تىكەلەي بايلانىستى. مەنىڭ ويىمشا, كەزەكتەن تىس اتتەستاتتاۋ قىزمەتتىك, دەنە شىنىقتىرۋ جانە جاۋىنگەرلىك دايارلىقتى جەتىلدىرۋ بويىنشا كادر اپپاراتى جۇمىسىنداعى ءالسىز تۇستاردى انىقتاۋى ءتيىس, بۇل ءوز كەزەگىندە مىندەتتەرىنە ءاتۇستى قارايتىن قىزمەتكەرلەردەن ارىلۋعا مۇمكىندىك بەرەدى. ال قۇقىق قورعاۋ سالاسىنا كەزدەيسوق كەلىپ قالعان ازاماتتار ءوز كەزەگىندە باسقا سالاداعى قىزمەتتەردە ءوز بىلىمدەرىن, كۇش-قۋاتتارىن تولىقتاي كورسەتە الۋى مۇمكىن.
قانسەيىت ابدەز ۇلى, ءال-فارابي اتىنداعى قازمۋ-دىڭ پروفەسسورى.
الماتى.
