ويىنحاناداعى ويران
بەيسەنبى, 23 اقپان 2012 8:13
جۇرتتىڭ ءبارى جاڭا جىل قارساڭىنداعى قاربالاس قۋانىشتىڭ جەتەگىندە بولعانىمەن, ب-نىڭ قاباعى قاتىڭقى. اينالاداعى جايناعان وزگەرىس, قول بۇلعاعان قاراعاي-قايىڭ, كۇمىس كۇن سۋىت ءجۇرىستى جىگىتتى سەلت ەتكىزەر ەمەس. جاسى وتىز جەتىدەن اسقان ونىڭ بار ويى ەندى ەكى كۇننەن كەيىن باستالاتىن جاڭا جىلدى قىزىل جىلتىراق دۋمانمەن دۇركىرەتىپ قارسى الۋ. بىراق, ول ءۇشىن قىرۋار قارجى-قاراجات كەرەك. ونى قايدان تاپپاق؟
بەيسەنبى, 23 اقپان 2012 8:13
جۇرتتىڭ ءبارى جاڭا جىل قارساڭىنداعى قاربالاس قۋانىشتىڭ جەتەگىندە بولعانىمەن, ب-نىڭ قاباعى قاتىڭقى. اينالاداعى جايناعان وزگەرىس, قول بۇلعاعان قاراعاي-قايىڭ, كۇمىس كۇن سۋىت ءجۇرىستى جىگىتتى سەلت ەتكىزەر ەمەس. جاسى وتىز جەتىدەن اسقان ونىڭ بار ويى ەندى ەكى كۇننەن كەيىن باستالاتىن جاڭا جىلدى قىزىل جىلتىراق دۋمانمەن دۇركىرەتىپ قارسى الۋ. بىراق, ول ءۇشىن قىرۋار قارجى-قاراجات كەرەك. ونى قايدان تاپپاق؟
سودان ول بوپسالاۋدىڭ العاشقى جولىن «يمپەريال م» كازينوسىنان باستاماق بولدى. ونىڭ دا وزىندىك سەبەبى بار ەدى. ب. مۇنداي مەكەمەلەردىڭ تابالدىرىعىن ون جىل بويى توزدىرعان تاجىريبەلى ويىنشى. بىراق, قۇمار ويىننان شەكەسى شىلقىعانى دا شامالى. استانا قالاسىنداعى سارىارقا اۋداندىق سوتىنىڭ ۇكىمىمەن, قىلمىستىق كودەكستىڭ 103-بابىنىڭ 3-بولىمىمەن ايىپتى دەپ تانىلىپ, 2003 جىلى 5 جىلعا باس ەركىنەن ايىرىلعان. ءايتكەنمەن, وسى ۇكىمنىڭ تەڭ جارتىسىن وتەگەننەن كەيىن شارتتى تۇردە مەرزىمىنەن بۇرىن بوساتىلدى. ونىڭ ۇستىنە, «يمپەريالدىڭ» باس مەنەدجەرى ا-مەنەن كەزىندە استانا قالاسىنداعى بيزنەس سالاسىندا ارىپتەس بولعانى بار. ەندى سودان قارىز سۇراماق, «بەرسە جولىنان, بەرمەسە قولىنان».
سوندىقتان, جانىنا اسلان, ەرجان اتالاتىن جاندايشاپتارىن ەرتىپ الىپ, باتىلدىق ءۇشىن بۋرابايعا جەتكەنشە ەكى جارىم شىنى اراقتى بوساتىپ تاستايدى.
وبالى نەشىك, ا. ەسكى دوسىن ەسىك الدىنان قۇشاق جايا قارسى الىپ, مەيرامحانا تورىنە وزدىردى. استانالىق قوناق ەكى-ءۇش ريۋمكادان كەيىن نىلدەي بۇزىلسىن. الدىن-الا توپ قۇرىپ جاساعان جوسپارىنىڭ بۋىمەن ءارى اراقتى اۋزىنا الماي قويعان كازينوشىنىڭ قىلىعى زىعىردانىنا تيگەن ب. تەز ارادا قارىزعا 100000 تەڭگە نەمەسە 500 اقش دوللارىن تاۋىپ بەرۋىن تالاپ ەتەدى. باس مەنەدجەر ونداي اقشانىڭ جوقتىعىن, بار بولعاننىڭ وزىندە قۇرىلتايشىلاردىڭ كەلىسىمى كەرەكتىگىن ايتادى. اشۋعا بۋلىققان ب. مۇندا جايدان-جاي كەلمەگەنىن, مۇنى قولپاشتايتىن قىلمىس الەمىنىڭ سەركەلەرى بارلىعىن جەتكىزىپ قوقيلانادى. اناۋ ءمىز باقپاعان سوڭ, ا-نى شالت قيمىلمەن باس-كوزىنە قاراماي سوققىعا جىعىپ سالسىن. وعان جانىنداعى باۋكەسپەلەر قوسىلىپ, ءاپ-ساتتە كازينوشىنىڭ قان جوساسىن شىعارادى. ويىندا ەشتەڭە جوق باس مەنەدجەردىڭ «بىزگە بوگەت جاساماڭدار» دەگەن ءامىرى بويىنشا, كۇزەتشىلەر مەن قىزمەتشىلەر قۇرمەتتى قوناقتار داستارقانىنا باس سۇعا قويماعان.
كوزى قاراۋىتقان ب. قانعا مالىنعان دوسىنا ەندى ءتىپتى قاتاڭ تالاپ قويدى. ا. نەسيە ەمەس, قارىز ەمەس, ءجۇز مىڭ تەڭگەنى قولما-قول تاۋىپ بەرىپ, ەسىك الدىندا قاڭتارۋلى تۇرعان «تويوتو لاند-كرۋزەر» ءدجيپىن مۇنىڭ اتىنا رەسىمدەۋى قاجەت. وسى كەزدەگى جانتالاس ۇستىندە كازينوشى بوپسالاۋشىلاردان قاشىپ قۇتىلۋدىڭ ءساتسىز تالپىنىسىن جاسايدى. تاعى دا ۇر دا سوق, اياۋسىز تەپكى. «ءوي, بوسقا ۋاقىت وتكىزگەنشە مىنانى سىرتقا شىعارىپ, كوزىن قۇرتايىق» دەگەن نيەتپەن قانىپەزەرلەر باس مەنەدجەردى سۇيرەتىپ اس دايىندايتىن بولمەگە الىپ كەلەدى. وسىندا بەت-اۋزىن قان جۋعان كازينوشىنى جۋىندىرىپ, دالاعا دىرىلداتىپ الىپ شىعادى. جەندەتتەردىڭ قولىندا پىشاق. كىمدە-كىم جاقىنداسا ا-نىڭ كەڭىردەگىن قيىپ تۇسىرمەك. دالادا دا ۇرىپ-سوعۋ, تەپكىلەۋ جالعاستى. وسى كەزدە قىزمەتشى قىزداردىڭ ءبىرى دابىل قوڭىراۋىن باسىپ ۇلگەرگەن. كۇزەتشىلەر لاپ قويدى. باس جەندەت ۇستالىپ, قالعان ەكەۋى ءىزىم-قايىم جوعالعان. بۇل كەزدە پوليتسەيلەر دە كەلىپ جەتكەن. «يمپەريالدىڭ» باس مەنەدجەرى سان الۋان جاراقاتپەن اۋرۋحاناعا جەتكىزىلدى. ودان كەيىن ايلاپ ازاپتى ەمدەلۋ, ۇزان-سونار تەرگەۋ, تەكسەرىس امالدارى جۇرگىزىلدى. ونشاقتى سوت-مەديتسينا ساراپتاماسى جاسالىپ, وتىزدان استام ادام كۋالىككە تارتىلدى…
جۋىردا بۋراباي اۋداندىق سوتىنىڭ توراعاسى سامالبەك مۇحتاروۆتىڭ توراعالىعىمەن سوت پروتسەسى اياقتالىپ, ب. قىلمىستىق كودەكستىڭ 181-بابى, 2-ءبولىمىنىڭ «ا», «ب» تارماقتارىمەن 4 جىل 8 اي مەرزىمگە باس ەركىنەن ايىرىلىپ, ا-نىڭ ەسەبىنە مورالدىق نۇقسان تۇرىندە 100000 تەڭگە ءوندىرىپ الۋعا ۇكىم شىعارىلدى.
باقبەرگەن امالبەك,
اقمولا وبلىسى,
بۋراباي اۋدانى.
