سپورتتىق ءارى قايىرىمدىلىق شاراسىنىڭ وتۋىنە ۇيىتقى بولعان نۇر-سۇلتان قالاسى اكىمدىگىنىڭ «رۋحانيات» كمم باسشىسى ەرجان ەڭسەباي:
- بۇل تۋرنير بۇقارالىق سپورتتى, سالاۋاتتى ءومىر سالتىن ناسيحاتتاۋ باعىتىندا جانە قايىرىمدىلىق ماقساتىندا ۇلىستىڭ ۇلى كۇنى ءاز ناۋرىز مەيرامى اياسىندا ۇيىمداستىرىلىپ وتىر. قاتىسۋشى كوماندالاردان جينالعان قاراجات ەلوردادا تۇراتىن الەۋمەتتىك جاعدايى تومەن 3 وتباسىعا, دالىرەك ايتقاندا, ءبىرى 8 بالالى مۇگەدەك جان بولسا, ەكىنشىسى – تەمىر ۆاگوندا كۇنەلتىپ جۇرگەن كوپ بالالى انا, سونداي-اق, جاقىندا عانا ەلوردادا اۆتوبۋستار سوقتىعىسقان جول كولىك وقيعاسىندا مۇگەدەك بولىپ قالعان تۇرعىننىڭ جولداسىنا بەرىلدى. ولاردىڭ ارقايسىنا 68 000 تەڭگە جانە قوسىمشا دەمەۋشىلىك جاساعان «AFFORD» كيىم دۇكەنىنىڭ 30000 تەڭگەلىك سەرتيفيكاتىن تابىستادىق. شاراعا اتسالىسىپ, ويىن كورىگىن قىزدىرعان ازاماتتارعا جانە سپورت زالىمەن قامتاماسىز ەتكەنى ءۇشىن قازاقستان مۇسىلماندارى ءدىني باسقارماسىنا العىسىمىزدى بىلدىرەمىز, دەيدى.
ەكى توپقا ءبولىنىپ ويناعان 8 كوماندانىڭ ىشىندە «جايدارمان» كومانداسىنىڭ ازىلكەش جىگىتتەرىنىڭ باعى مەن بابى باسىم بولىپ, باس جۇلدەنى جەڭىپ السا, وسى كوماندانىڭ ويىنشىسى دانيار بەكجانوۆ «ۇزدىك قورعاۋشى» اتاندى. تۋرنير باسىنان-اق ەرەكشە مىنەز بەن وزگەشە ويىن ورنەگىن كورسەتكەن «استانكينو» كومانداسىنىڭ فينالدا عانا جولى بولماي, جۇلدەلى 2-ورىندى مىسە تۇتتى. اتالمىش كوماندانىڭ قاقپاسىن كۇزەتكەن قۋانىش قاسەنوۆتىڭ «ۇزدىك قاقپاشى» اتانعانىن ايتا كەتەيىك. ال, فينالدا جۇزدەسكەن قوس مىقتىعا جارتىلاي فينالدا جول بەرگەن «دارابوزدار» مەن «جالىن» كوماندالارى 3-ورىندى ءوزارا ساراپقا سالعان بولاتىن. ناتيجەسىندە «جالىن» كومانداسى قارسىلاستارىنان باسىم تۇسسە, وسى كوماندانىڭ نامىسىن قورعاعان مارات ورازاليەۆ «ۇزدىك ويىنشى» اتاندى. «دارابوزدار» ساپىنداعى مارات حاۆسەمەت «ۇزدىك شابۋىلشى» اتانسا, ۇيىمداستىرۋشىلار وسىنداي قايىرىمدىلىق ءتۋرنيرىن الداعى ۋاقىتتا ءداستۇرلى تۇردە وتكىزۋدى جوسپارلاپ وتىر.
