يسپانيا كورولى فەليپە VI قازاقستاننىڭ قالىپتاسۋى مەن دامۋىنداعى نۇرسۇلتان نازارباەۆتىڭ قىزمەت ناتيجەلەرىن ايرىقشا اتاپ وتەدى.
«مەن ءسىزدىڭ بۇگىندە زاماناۋي, الەۋمەتتىك جانە كوپكونفەسسيالى بولىپ وتىرعان مەملەكەت قۇرۋداعى بار كۇش-جىگەرىڭىزدى باعالايمىن, سونداي-اق ءسىزدىڭ ۇلى ەلىڭىز بەن يسپانيا اراسىنداعى قارىم-قاتىناستارعا قوسقان ەرەكشە ۇلەسىڭىز ءۇشىن العىس ايتقىم كەلەدى», دەلىنگەن جەدەلحاتتا.
موناكو كنيازى II البەر نۇرسۇلتان نازارباەۆقا ونىڭ قاۋىپسىزدىك كەڭەسىنىڭ توراعاسى, Nur Otan پارتياسىنىڭ توراعاسى جانە ەلدىڭ كونستيتۋتسيالىق كەڭەسىنىڭ مۇشەسى رەتىندەگى قىزمەتىنە تابىس تىلەيدى.
«وسى ءساتتى پايدالانا وتىرىپ, مەن ءبىزدىڭ ىنتىماقتاستىعىمىزدى جوعارى باعالايتىنىمدى ايتقىم كەلەدى جانە موناكو كنيازدىگى مەملەكەتتەرىمىزدىڭ اراسىنداعى قارىم-قاتىناستى تولىق قولدايتىنىنا, ونىڭ ودان ءارى تەرەڭدەۋىنە مۇددەلى ەكەنىنە سەندىرەمىن», – دەپ جازادى موناكو كنيازى.
ارمەنيا رەسپۋبليكاسىنىڭ پرەزيدەنتى ارمەن ساركسيان ەلباسىنىڭ قازاقستان مەن ارمەنيانىڭ اراسىنداعى وداقتاستىق بايلانىستاردى دامىتۋ مەن نىعايتۋعا قوسقان ەلەۋلى ۇلەسىنە توقتالادى.
«ءسىز بۇگىنگى قارقىندى دامىپ كەلە جاتقان, قۋاتتى ەكونوميكاسى, قالىپتى الەۋمەتتىك قارىم-قاتىناستارى, كوپ ۇلتتى ەلىنىڭ تاتۋ ءارى ىنتىماقتى حالقى بار, وزىق ءبىلىم مەن ءتاربيە الىپ جاتقان جاستارى تۋعان ەلىنىڭ بولاشاعىنا سەنىممەن قارايتىن, ونى الەمگە لايىقتى ءارى ماقتانىشپەن تانىستىراتىن قازاقستاننىڭ جىلناماسىن ءوزىڭىزدىڭ دانا شەشىمىڭىز ارقىلى باستاۋشى ءارى اۆتورى قۇقىعىمەن جازۋدى جالعاستىرۋداسىز», دەلىنگەن حاتتا.
فينليانديا رەسپۋبليكاسىنىڭ پرەزيدەنتى ساۋلي نينيستيو ءوزىنىڭ جەدەلحاتىندا نۇرسۇلتان نازارباەۆتىڭ قازاقستان رەسپۋبليكاسىنىڭ پرەزيدەنتى لاۋازىمىندا بولعان كەزەڭدە ەكىجاقتى مەملەكەتارالىق قارىم-قاتىناستار تەڭدەسسىز جوعارى دەڭگەيگە جەتكەنىنە ايرىقشا ءمان بەرگەن.
«ءسىزدىڭ بەلسەندى ءارى كوپ قىرلى قىزمەتىڭىز قازىرگى قازاقستاننىڭ قالىپتاسۋى مەن دامۋىندا شەشۋشى مانگە يە بولدى. وسى باعىتتاعى عاجاپ تابىستارىڭىزعا بايلانىستى مەنىڭ قۇتتىقتاۋىمدى قابىل الىڭىز», دەپ اتاپ وتەدى س.نينيستيو.
ءوز جەدەلحاتىندا رەسەي فەدەراتسياسى ۇكىمەتىنىڭ ءتوراعاسى دميتري مەدۆەدەۆ قازاقستان رەسپۋبليكاسىنىڭ تۇڭعىش پرەزيدەنتىنىڭ تاريحي ەڭبەگىن اتاي وتىرىپ, نۇرسۇلتان نازارباەۆتىڭ قازاقستان پرەزيدەنتى لاۋازىمىندا بولعان كەزەڭدەگى ءوزارا جەمىستى ءىس-قيمىل ءۇشىن ريزاشىلىعىن بىلدىرگەن.
«ءسىزدىڭ قازاقستان مەن رەسەيدى بايلانىستىراتىن دوستىق, سەرىكتەستىك جانە وداقتاستىق قارىم-قاتىناستاردى نىعايتۋعا ۇدايى كوڭىل ءبولىپ وتىرعانىڭىزدى ايرىقشا اتاپ وتكىم كەلەدى. بارلىق مۇشە مەملەكەتتەردىڭ يگىلىگى ءۇشىن تابىستى دامىپ كەلە جاتقان ەۋرازيالىق ەكونوميكالىق وداقتى قۇرۋداعى كوشباسشىلىق ءرولىڭىزدى جوعارى باعالايمىز», دەلىنگەن جەدەلحاتتا.
اقش مەملەكەتتىك حاتشىسى مايكل پومپەو ەلباسى نۇرسۇلتان نازارباەۆتىڭ قازاقستاننىڭ قالىپتاسۋى مەن گۇلدەنۋىندەگى شەشۋشى ءرولىن اتاپ وتكەن.
«امەريكا قۇراما شتاتتارى قازاقستانمەن جاقىن ىنتىماقتاستىققا ءاردايىم ءمان بەرەدى, سونداي-اق ءسىزدىڭ ەل باسشىسى لاۋازىمىنداعى جانە ءارتاراپتاندىرىلعان, اشىق, نارىقتىق ەكونوميكالى قازاقستاندى قۇرۋ جولىنداعى تابىستارىڭىزدى جوعارى باعالايدى», دەلىنگەن حاتتا.
دۇنيەجۇزىلىك ساۋدا ۇيىمىنىڭ باس حاتشىسى روبەرتو ازەۆەدو نۇرسۇلتان نازارباەۆتىڭ ەلدىڭ ءوسۋى مەن ەكونوميكالىق دامۋىنداعى, سونىڭ ىشىندە حالىقارالىق ساۋداعا بەلسەنە قاتىسۋ ارقىلى ەلەۋلى ىلگەرىلەۋشىلىكتى قامتاماسىز ەتۋدەگى ءرولىن جوعارى باعالاعان.
«ENI» كومپانياسىنىڭ باس اتقارۋشى ديرەكتورى كلاۋديو دەسكالتسي ءوزىنىڭ جەدەلحاتىندا قازاقستاننىڭ تاۋەلسىزدىك العان ساتىنەن جانە ونىڭ ەگەمەن ەل رەتىندە قالىپتاسۋىنان باستاپ نۇرسۇلتان نازارباەۆ شىنايى كوشباسشىلىق پەن ستراتەگيالىق كورەگەندىلىك تانىتقانىن, وسى قاسيەتتەر بۇكىل الەمنەن شەتەلدىك ينۆەستيتسيالاردى تارتقان قولايلى ءارى تۇراقتى احۋال قۇرۋعا ءمۇمكىندىك بەرگەنىن ايتقان.
يتاليانىڭ بۇرىنعى سىرتقى ىستەر ءمينيسترى, ەۋرازيالىق زەرتتەۋلەر ينستيتۋتىنىڭ پرەزيدەنتى فرانكو فراتتيني ءوز حاتىندا نۇرسۇلتان نازارباەۆقا ەلدىڭ جانە تۇتاس حالىقارالىق قوعامداستىقتىڭ يگىلىگى جولىنداعى قىزمەتىنىڭ ءناتيجەلەرى ءۇشىن شىنايى قۇرمەتىن بىلدىرگەن.
«ءدال ءسىزدىڭ كۇش-جىگەرىڭىزدىڭ ارقاسىندا ورتالىق ازياداعى جانە ەۋرازيالىق وڭىردەگى گەوساياسي ۇدەرىستەر جالپى العاندا بەيبىت ءارى تابىستى ءوربىدى. قازاقستاننىڭ جانە ءسىزدىڭ باسشىلىعىڭىزدىڭ ماڭىزى وڭىرلىك جانە حالىقارالىق ۇيىمدار اياسىندا دا مويىندالدى», دەپ جازادى ف.فراتتيني.
ەلباسى نۇرسۇلتان نازارباەۆتىڭ قازاقستاندى وركەندەتۋدەگى ايرىقشا ءرولى مەن حالىقارالىق ارەناداعى كورنەكتى ەڭبەگى ەقىۇ باس حاتشىسى ت.گرەمينگەردىڭ, رەسەي فەدەراتسياسى فەدەرالدىق جينالىسىنىڭ فەدەراتسيا كەڭەسىنىڭ توراعاسى ۆ.ماتۆيەنكونىڭ, ەۋروپا قايتا قۇرۋ جانە دامۋ بانكىنىڭ پرەزيدەنتى س.چاكرابارتيدىڭ, «سبەربانك» جاق پرەزيدەنتى گ.گرەفتىڭ, تاتارستاننىڭ تۇڭعىش پرەزيدەنتى, مەملەكەتتىك كەڭەسشى م.شايميەۆتىڭ, ينگۋشەتيا رەسپۋبليكاسىنىڭ باسشىسى يۋ.ەۆكۋروۆتىڭ, رەسەيدىڭ ومبى وبلىسىنىڭ گۋبەرناتورى ا.بۋركوۆتىڭ, مەملەكەتارالىق اۆياتسيا كوميتەتىنىڭ توراعاسى ت.انودينانىڭ جانە رەسەيدىڭ يۋنەسكو ىستەرى جونىندەگى كوميسسياسى توراعاسىنىڭ ورىنباسارى ا.دزاسوحوۆتىڭ حاتتارىندا دا اتاپ ايتىلعان.
قازاقستاننىڭ تۇڭعىش پرەزيدەنتى – ەلباسى ءوز اتىنا كەلىپ تۇسكەن بارلىق حاتپەن مۇقيات تانىسىپ شىقتى جانە حات اۆتورلارىنا جىلى لەبىزدەرى مەن شىنايى تىلەكتەرى ءۇشىن العىس ءبىلدىردى.
