سەگىز ايعا سوزىلعان سەرگەلدەڭ
سەنبى, 7 قاڭتار 2012 7:40
بۇل داۋدىڭ باستالعانىنا ءبىر جىلعا جۋىق ۋاقىت بولىپ قالىپتى. بىراق نۇكتەسى ءالى قويىلماعان. ءال-ءازىر سول نۇكتە قويىلمايتىن دا سياقتى. ويتكەنى ارىز يەسى «نە بەل كەتەدى, نە بەلبەۋ ۇزىلەدى» دەگەن قاعيدادان اينىماق ەمەس. م.جاڭاباەۆ ءوزىن جالانىڭ قۇربانى سەزىنەدى. ونىڭ ايتۋىنشا, قۇقىق قورعاۋ سالاسىندا 10 جىل ءمىنسىز قىزمەت اتقارعان اعا لەيتەنانت ءبىر كۇندە جۇمىسسىز قالعان. سودان بەرى ارىز ايتىپ, شاعىم جازباعان جەرى جوق. بىراق ونىڭ جانايقايىن تىڭداپ جاتقان جان ادام تابىلماپتى. ەڭ سوڭعى ءۇمىتى رەتىندە «ەگەمەنگە» جازعان ارىزى تومەندەگىدەي.
سەنبى, 7 قاڭتار 2012 7:40
بۇل داۋدىڭ باستالعانىنا ءبىر جىلعا جۋىق ۋاقىت بولىپ قالىپتى. بىراق نۇكتەسى ءالى قويىلماعان. ءال-ءازىر سول نۇكتە قويىلمايتىن دا سياقتى. ويتكەنى ارىز يەسى «نە بەل كەتەدى, نە بەلبەۋ ۇزىلەدى» دەگەن قاعيدادان اينىماق ەمەس. م.جاڭاباەۆ ءوزىن جالانىڭ قۇربانى سەزىنەدى. ونىڭ ايتۋىنشا, قۇقىق قورعاۋ سالاسىندا 10 جىل ءمىنسىز قىزمەت اتقارعان اعا لەيتەنانت ءبىر كۇندە جۇمىسسىز قالعان. سودان بەرى ارىز ايتىپ, شاعىم جازباعان جەرى جوق. بىراق ونىڭ جانايقايىن تىڭداپ جاتقان جان ادام تابىلماپتى. ەڭ سوڭعى ءۇمىتى رەتىندە «ەگەمەنگە» جازعان ارىزى تومەندەگىدەي.
«قىمىز ءىشىپ, قىزمەتتەن قۋىلدىم»
«مەن وڭتۇستىك قازاقستان وبلىسى مامانداندىرىلعان كۇزەت باسقارماسى مەملەكەتتىك مەكەمەسىندە 2001 جىلدان 2010 جىلدىڭ ناۋرىزىنا دەيىن ءمىنسىز قىزمەت اتقاردىم. سول 2010 جىلعى ناۋرىزدىڭ 8-نەن 9-ىنا قاراعان ءتۇنى جازىقسىز جالاعا ۇشىرادىم. سول ءتۇنى مەن وڭتۇستىك قازاقستان وبلىستىق اكىمدىگىنىڭ عيماراتىنداعى بەكەتتە كەزەكشىلىكتە تۇرعان ەدىم. تاڭ الدىندا تەكسەرۋدى سىلتاۋ ەتىپ, مامانداندىرىلعان كۇزەت باسقارماسى كادرلارمەن جۇمىس ءبولىمىنىڭ باستىعى ج.پىرتاەۆ كەلدى. ول جاي كەلگەن جوق, قىزمەت بابىندا تۇرعان بىزگە ءتيىسىپ, قوقان-لوقى جاساي كەلدى. ونىڭ ايتقانى «اراق ءىشىپ الىپسىڭدار» دەگەن جالا ءسوز بولدى. ناتيجەسىندە مەنى ناركولوگيالىق ديسپانسەرگە كۇشتەپ الىپ بارىپ, ساراپتامادان وتكىزدى. بۇل ساراپتاما بويىنشا «جەڭىل دارەجەدەگى ماساڭدىعى» انىقتالعان دەگەن قورىتىندى شىعارىپتى. ناتيجەسىندە وسى قورىتىندىعا سۇيەنىپ, باسشىلىق مەنى قىزمەتتەن بوساتتى.
«جەڭىل دارەجەدەگى ماساڭدىقتىڭ» انىقتالۋى مەنىڭ سول كەزدە قىمىز ءىشكەندىگىمنىڭ سەبەبىنەن دەپ ويلايمىن. سوندىقتان ناركولوگيالىق ساراپتامانىڭ قورىتىندىسىنا نارازىلىق كەلتىرىپ, شىمكەنت قالاسى ەڭبەكشى اۋداندىق سوتىنا شاعىم ءتۇسىردىم. 2010 جىلعى شەشىمىمەن ەڭبەكشى اۋداندىق سوتى ناركولوگيالىق ساراپتاما قورىتىندىسىن جارامسىز دەپ تاپتى. وسى سوتتىڭ شەشىمى نەگىزىندە مەنى جۇمىسقا قايتا ورنالاستىرۋ تۋرالى ءال-فارابي اۋداندىق سوتىنا شاعىمداندىم. مەنىڭ تالاپ-ارىزىم قارالىپ جاتقان كەزدە, كۇزەت باسقارماسى كادرلارمەن جۇمىس ءبولىمىنىڭ باستىعى ج.پىرتاەۆتىڭ اتىنان جەكە ايىپتاۋ شاعىمى تۇسكەنىنە بايلانىستى سۋديا و.قادىرسىزوۆتىڭ حاتشىسىنان سوتقا شاقىرۋ قاعازىن الدىم. الايدا, سوت تەرگەۋ بارىسىندا ج.پىرتاەۆتىڭ ماعان قويعان تالابى قاناعاتتاندىرىلعان جوق. مەن كەرىسىنشە جالا جاپقانى ءۇشىن ج.پىرتاەۆتى قىلمىستىق جاۋاپكەرشىلىككە تارتۋ تۋرالى ىشكى ىستەر دەپارتامەنتىنە ارىز بەردىم. بىراق اتالعان قۇزىرلى ورگان ونىڭ ۇستىنەن قىلمىستىق ءىس قوزعاۋدان باس تارتتى. مىنە, كۇنى ءبۇگىنگە دەيىن ارىز جازباعان جەرىم, شاعىم ايتىپ بارماعان ەسىگىم قالمادى. بىراق ەشقانداي ناتيجە جوق. ەندىگى ءۇمىتىم «ەگەمەن قازاقستاندا» عانا. م.جاڭاباەۆ».
ون جىلعا جاقىن ىشكى ىستەر قىزمەتىندە ەڭبەك ەتكەن, بۇگىنگى كۇنى ءۇش بالاسىن اسىراۋ ءۇشىن كەز كەلگەن جۇمىستى ىستەپ جۇرگەن م.جاڭاباەۆ ءوزىنىڭ قىزمەتتەن قۋىلۋىنا مامانداندىرىلعان كۇزەت باسقارماسى مەملەكەتتىك مەكەمەسىنىڭ كادرمەن جۇمىس ءبولىمىنىڭ باستىعى ج.پىرتاەۆتى كىنالايدى.
«جاڭاباەۆتىكى جالا»
«جاڭاباەۆ ماقسات قازاقستان رەسپۋبليكاسى ۇكىمەتىنىڭ 1996 جىلعى 27 جەلتوقسانداعى №1644 قاۋلىسىمەن بەكىتىلگەن قازاقستان رەسپۋبليكاسى ىشكى ىستەر ورگاندارىنىڭ قاتارداعى جانە باسشى قۇرامداعى ادامدارىنىڭ قىزمەت وتكەرۋى تۋرالى ەرەجەگە سايكەس 91-باپ «ك» تارماقشاسىمەن (اسكەري قىزمەتتىك ءتارتىبىن ورەسكەل بۇزعانى ءۇشىن) وڭتۇستىك قازاقستان وبلىسى مامانداندىرىلعان كۇزەت باسقارماسى مەملەكەتتىك مەكەمەسى باستىعىنىڭ 2010 جىلعى 15 ناۋرىزداعى №34 بۇيرىعىمەن قىزمەتتەن بوساتىلدى. سەبەبى, پوليتسيا اعا لەيتەنانتى جاڭاباەۆ ءوزىنىڭ قىزمەتتىك مىندەتتەرىنە سالاق قاراپ, ءوزى ءتارتىپ ساقشىسى بولا تۇرا كۇشەيتىلگەن قىزمەت ۋاقىتىندا قىزمەت اتقارۋ كەزىندە ءسپيرتتى ىشىمدىك ىشكەن.
2010 جىلدىڭ 8 ناۋرىزىندا مەن باسقارما بويىنشا تەكسەرۋشى بولىپ كەزەكشىلىككە ءتۇستىم. كەزەكشىلىك بارىسىندا كەزەكشى ءبولىمىنىڭ كەزەكشىسى پوليتسيا اعا لەيتەنانتى ب.كولباەۆ راتسيا ارقىلى وبلىستىق اكىمدىك بەكەتىن مۇقيات تەكسەرۋدى سۇرادى. ويتكەنى, كەزەكشىلىككە ءتۇسكەن قىزمەتكەرلەر ەكى ساعات كولەمىندە بايلانىسقا شىقپاعان. سوندىقتان مەن بەكەتتى تاڭعى ساعات التىلاردىڭ كەزىندە تەكسەرىپ بارعانىمدا كەزەكشىلىكتە تۇرعان پوليتسيا اعا لەيتەنانتى م.جاڭاباەۆتىڭ, ايماقتىق مۇراعات بەكەتىندە تۇرعان پوليتسيا اعا سەرجانتى ش.شەكەربەكوۆتىڭ ءسپيرتتى ىشىمدىك ىشكەندەرىن بايقادىم. سول جەردەن پوليتسيا اعا لەيتەنانتى ت.وسپانقۇلوۆتى دا ىزدەپ تاۋىپ الدىق. ونىڭ دا اۋزىنان اراق ءيىسى شىعىپ تۇردى. مەن تەز ارادا دابىل بەلگىسىن بەرىپ, سول كۇنگى پوليتسيا باتالونىنىڭ تەكسەرۋشىسى پوليتسيا لەيتەنانتى ح.نۇراليەۆتى, ۆزۆود كومانديرى پوليتسيا مايورى و.سىرايلوۆتى, باتالون كومانديرىنىڭ مىندەتىن اتقارۋشى پوليتسيا مايورى ب.ماقۇلبەكوۆتى جانە جەدەل دەن قويۋ توبىن شاقىرتتىم. سولاردىڭ كومەگىمەن ءۇش كەزەكشى پوليتسيا قىزمەتكەرىن ناركولوگيالىق ديسپانسەرگە جىبەردىك. سول جىلدىڭ 9 ناۋرىزى كۇنى وبلىستىق ناركولوگيالىق ديسپانسەردىڭ بەرگەن مەديتسينالىق كۋالاندىرۋىندا م.جاڭاباەۆقا «جەڭىل» دارەجەلى, ش.شەكەربەكوۆكە «ورتا» دارەجەلى, ت.وسپانقۇلوۆقا «ورتا» دارەجەلى الكوگولدىك ماساڭدىق كورسەتىلگەن. بولعان جاعداي بويىنشا قىزمەتتىك تەكسەرۋ جۇرگىزىلىپ, پوليتسيا باتالونىنىڭ جەكە قۇرامىنىڭ شۇعىل جينالىسىندا قارالىپ, م.جاڭاباەۆ, ت.وسپانقۇلوۆ, ش.شەكەربەكوۆ قىزمەتتەن بوساتىلدى.
م.جاڭاباەۆ قىزمەتكە قايتا ورنالاسۋ ماقساتىندا شىمكەنت قالاسى ءال-فارابي اۋداندىق سوتىنا ارىزداندى. 2010 جىلدىڭ 15 قازانىندا شىعارىلعان سوت شەشىمى ونىڭ ارىزىن قاناعاتتاندىرۋسىز قالدىردى. ودان ءارى م.جاڭاباەۆ وڭتۇستىك قازاقستان وبلىستىق سوتىنىڭ اپەللياتسيالىق جانە كاسساتسيالىق سوت القالارىنا شاعىمداندى. ونىڭ بۇل شاعىمدارى دا قاناعاتتاندىرۋسىز قالدىرىلدى. دەگەنمەن, ارىز يەسى كۇنى بۇگىنگە دەيىن ءارتۇرلى ورىندارعا شاعىمدانۋىن توقتاتپاي كەلەدى. ماسەلەنى سوت شەشەدى دەيتىن بولساق, بۇل ورگاندار ادىلەتتى شەشىمدەرىن الدەقاشان شىعارىپ قويعان. سوندا ارىز يەسى ەندى قانداي ادىلدىك ىزدەپ جۇرگەنىن ءوز باسىم تۇسىنە المادىم. جامالبەك پىرتاەۆ».
نۇكتەسى قويىلماعان داۋ
«بىرىكتىرىپ ايتسا, بيدىكى ءجون, قۇراستىرىپ ايتسا, قۇلدىكى ءجون» دەيدى حالىق ماتەلى. جاڭاباەۆتى تىڭداساڭ, «جالانىڭ قۇربانىمىن» دەسە, پىرتاەۆتى تىڭداساڭ, «جاڭاباەۆتىكى جالا» دەيدى. وتكەن جىلدىڭ ناۋرىز ايىندا باستالعان داۋدىڭ اياعى كورىنەر ەمەس. ءدال وسى ماسەلەگە بايلانىستى تالاي رەت جينالىس ءوتكەن, بىرنەشە مارتە سوت بولعان. بىراق بۇل شارالاردىڭ قاي-قايسىسى دا داۋدى ودان ءارى ءورشىتپەسە, توقتاتۋعا شاماسى كەلمەپتى. سوندا بۇل داۋ قاشانعا دەيىن سوزىلماق, بۇل داۋعا قاشان نۇكتە قويىلادى. بالكىم بۇل سۇراقتارعا وبلىستىق ىشكى ىستەر دەپارتامەنتىنىڭ باسشىلىعى جاۋاپ بەرەر…
شارافاددين ءامىروۆ.
