دەنساۋلىعىنىڭ ناشارلاعانىن جوققا شىعاردى
سەيسەنبى, 23 قازان 2012 7:27
ليۆياداعى جاعداي قايتا شيەلەنىستى
مۋاممار كاددافيدىڭ كوزىن جويىپ, ازامات سوعىسى رەسمي اياقتالعانىنا ءبىر جىل وتكەندە ليۆيادا جاعداي تاعى دا شيەلەنىسە ءتۇستى.
سەيسەنبى, 23 قازان 2012 7:27
ليۆياداعى جاعداي قايتا شيەلەنىستى
مۋاممار كاددافيدىڭ كوزىن جويىپ, ازامات سوعىسى رەسمي اياقتالعانىنا ءبىر جىل وتكەندە ليۆيادا جاعداي تاعى دا شيەلەنىسە ءتۇستى.
وتكەن دەمالىس كۇندەرى كاددافيگە ادالدىعىن ساقتاعان ۆارفاللا تايپاسىنىڭ استاناسى سانالاتىن باني-ۆاليد قالاسىندا قۇلاتىلعان رەجىمنىڭ جاقتاستارى مەن قارسىلاستارى اراسىندا كەسكىلەسكەن ۇرىستار ءجۇردى. كەيبىر مالىمەتتەرگە قاراعاندا, 30 ادام قازا تاۋىپ, 200-دەن استامى جاراقاتتانعان. اراب باق-تارىنىڭ مالىمەتىنشە, كاددافيدىڭ 28 جاسار ۇلى حاميس قازا تاپقان كورىنەدى. جالپىعا ورتاق ۇلتتىق كونگرەسس توراعاسى مۋحاممەد يۋسەف ءال-ماگرەفتىڭ ايتۋىنشا, حاميس كاددافي جارالانىپ, تۇتقىنعا ءتۇسكەن جانە سول جاراقات سالدارىنان قايتىس بولعان.
دەنساۋلىعىنىڭ ناشارلاعانىن جوققا شىعاردى
كۋبا رەۆوليۋتسياسىنىڭ ليدەرى فيدەل كاسترو ءوزىنىڭ دەنساۋلىعىنىڭ ناشارلاعانى تۋرالى شەتەلدىك باق-تاردا جاريالانعان حاباردى تەرىسكە شىعاردى.
ءسويتىپ, كوماندانتە وسى جىلدىڭ ناۋرىزىنان كەيىن ءبىرىنشى رەت كوپشىلىك الدىنا شىقتى. مەملەكەتتىك ۆەب-سايتتا جاريالانعان ماقالادا فيدەل كاسترو ءوزىنىڭ جاعدايىنىڭ جاقسى ەكەنىن مالىمدەگەن. مەن باس اۋرۋىنىڭ نە ەكەنىن ۇمىتتىم, دەگەن ول. ال ونىڭ دەنساۋلىعىنىڭ ناشارلاعانى تۋرالى بارلىق اقپاراتتى كۋبا ليدەرى بارىپ تۇرعان وتىرىك دەپ اتادى. كۋبالىق باق-تار ماقالامەن بىرگە كوماندانتەنىڭ فوتوسۋرەتتەرىن دە جاريالاعان كورىنەدى.
بەيرۋتتەگى جارىلىس
ليۆاننىڭ استاناسى بەيرۋتتە بولعان قۋاتتى جارىلىستان 80-گە جۋىق ادام زارداپ شەككەن. قازا تاپقاندار سانى 8-گە دەيىن جەتكەن كورىنەدى.
جارىلعىش زات تولتىرىلعان ماشينا نەگىزىنەن حريستياندار تۇراتىن اۋدانداعى ساسين الاڭىندا جارىلعان بولاتىن. العاشقىدا تەررورلىق اكت باتىسقا ءىش تارتاتىن «14 ناۋرىز كواليتسياسى» ليدەرلەرىنىڭ بىرىنە باعىتتالعان دەپ حابارلانعان ەدى. بىراق ول ءسوز ازىرگە راستالماي وتىر. جارىلىس بولعان ماڭايداعى تۇرعىن ۇيلەرگە ۇلكەن ماتەريالدىق زيان كەلىپ, ونداعان ماشينالار زاقىمدانعان. بەس ادام قازا تاۋىپ, 37 ادام جاراقاتتاندى دەگەن مالىمەت بار.
ۇلتشىلداردىڭ وڭىرلىك سايلاۋداعى جەڭىسى
شەشۋشى اۆتونوميالاردىڭ ءبىرى گاليسيادا بيلىكتەگى يسپانيا حالىق پارتياسى كوپشىلىك ورىنعا يە بولدى.
پرەمەر-مينيستر ماريانا راحوي باسقاراتىن وڭشىل تسەنتريستەر ۇكىمەت قابىلداعان قاتاڭ ۇنەمدەۋ شارالارىنىڭ قولداۋ تاپپاعانىنا قاراماستان, باسىم داۋىس جيناۋعا قول جەتكىزگەن. وسىلايشا حالىق پارتياسى ءوز پوزيتسياسىن كۇشەيتىپ وتىر. باسكىلەر ەلىندە ۇلتتىق پارتيانىڭ جەڭىسكە جەتكەنىنە قاراماستان, ولار ءوز پوزيتسيالارىن ازداپ السىرەتىپ الدى. وعان وتكەن جىلى وسىندا جاڭا ساياسي كواليتسيانىڭ پايدا بولعانى سەبەپكەر كورىنەدى.
وڭتۇستىك كورەيا تويتارىس بەرۋگە دايىن
وڭتۇستىك كورەيا وكىمەتى تاياۋدا كحدر تاراپىنان بولۋى ىقتيمال اسكەري سوققىعا تويتارىس بەرۋگە دايىندالۋدا.
ەكى مەملەكەت اراسىنداعى داۋ-جانجال وڭتۇستىككورەيالىق بەلسەندىلەر تاراتقان ۇگىت پاراقشالار سالدارىنان تۋىنداپ وتىر. ولاردا كحدر رەجىمىن ايىپتاعان سوزدەر مەن اراب ەلدەرىندەگى دەموكراتيالىق ءتوڭكەرىستەر تۋرالى جاڭالىقتار بولعان. وڭتۇستىك كورەيانىڭ اسكەري كۇشتەرى جوعارى جاۋىنگەرلىك دايىندىققا كەلتىرىلگەن. ەل بيلىگى بەلسەندىلەرگە ودان ءارى ۇگىت پاراقشالار تاراتۋعا تىيىم سالىپ وتىر.
ب ۇلىكشىلەر ارەكەتى ىسكە اسپادى
گۆينيا-بيساۋ مەملەكەتىنىڭ بيلىگى ءوز ەلىندە توڭكەرىس جاساماق بولعانداردىڭ ارەكەتىن تۇنشىقتىرعانىن مالىمدەدى.
ب ۇلىكشىلەر ۋاقىتشا ۇكىمەتتى قۇلاتپاق بولعان كورىنەدى. ەل بيلىگى مۇنداي ارەكەتتى ۇيىمداستىردى دەپ پورتۋگاليانى, سونىمەن بىرگە پورتۋگال ءتىلدى ەلدەر دوستاستىعىن جانە ەلدىڭ بۇرىنعى پرەمەر-ءمينيسترى كارلۋش گومەش جۋنيوردى كىنالاپ وتىر. توڭكەرىس جاساۋعا تالپىنعانداردى تۇنشىقتىرۋ ناتيجەسىندە 6 ادام قازا تاپقان. ۇكىمەت كۇشتەرى رەاكتيۆتى گراناتالار قولدانعان كورىنەدى. ايتا كەتۋ كەرەك, قازىرگى ۇكىمەت ۇستىمىزدەگى جىلدىڭ 12 ساۋىرىندە جۇزەگە اسقان مەملەكەتتىك توڭكەرىس ناتيجەسىندە جاساقتالعان بولاتىن.
وزگەلەردى جارالاپ, ءوزى قازا تاپتى
امەريكانىڭ ۆيسكونسين شتاتىندا پوليتسيا جەرگىلىكتى سپا-سالونداردىڭ بىرىندە وق اتقان ەر ادامدى انىقتاعان.
وق اتۋ سالدارىنان 7 ادام زارداپ شەككەن كورىنەدى. ال «اتقىشتىڭ» ءوزى وقيعا بولعان جەردە اجال قۇشقان. پوليتسيانىڭ ايتۋىنشا, ەر ادام ءوز-وزىنە اتقان وقتان قازا تاپقان. الدىن-الا مالىمەتتەر بويىنشا, 45 جاسار رەدكليفف حافتوننىڭ مۇنداي ارەكەتكە بارۋىنا وتباسىلىق جانجال تۇرتكى بولعان كورىنەدى. سپا-سالونىندا ونىڭ كوپتەن بەرى بولەك تۇرىپ جاتقان ايەلى جۇمىس ىستەيدى ەكەن. جاراقات العان ادامدار اۋرۋحاناعا جەتكىزىلگەن.
رەسەيلىك تۋريسكە شابۋىل جاسالدى
تايلاندتىڭ كۋرورتتى قالاسى پاتتايادا رەسەيلىك تۋريست ايەلگە قاراقشىلىق شابۋىل جاسالدى.
جەرگىلىكتى پوليتسيانىڭ مالىمەتتەرىنە قاراعاندا, 25 جاسار رەسەيلىك ەۆگەنيا نيكولينا شابۋىل قۇربانى بولعان. موتوتسيكل مىنگەن ەكى قىلمىسكەر وعان ول تۇراتىن قوناق ءۇيدىڭ الدىندا شابۋىل جاساعان كورىنەدى. ءوزىن توناپ جاتقان قاراقشىلارعا قارسىلىق كورسەتپەك بولعاندا قىلمىسكەرلەر قىزعا بەس رەت پىشاق سۇققان. وسىدان كەيىن قاراقشىلار قىزدىڭ اقشاسىن, ۇيالى تەلەفونىن, بەينەكامەراسىن الىپ قاشىپ كەتكەن. زارداپ شەككەن قىز اۋرۋحاناعا جەتكىزىلگەن. ونىڭ جاعدايى تۋرالى ناقتى مالىمەتتەر جوق.
ينتەرنەت ماتەريالدارى نەگىزىندە ازىرلەندى.
