شاراينا
بەيسەنبى, 4 قازان 2012 7:15
العاشقى پىكىرسايىس وتپەك
سارسەنبى كۇنى اقش پرەزيدەنتتىگىنە كانديداتتار باراك وباما مەن ميتت رومني اراسىنداعى العاشقى دەباتتار وتپەك.
دەنۆەر ۋنيۆەرسيتەتىندە وتەتىن بۇل ءسوزسايىس ىشكى ساياسات ماسەلەلەرىنە ارنالماقشى. دەبات ءبىر جارىم ساعاتقا سوزىلاتىن بولادى. وسى ۋاقىتتار ىشىندە پرەزيدەنت لاۋازىمى ءۇشىن كۇرەستەگى باسەكەلەستەر ءالى دە ءوز تاڭداۋلارىن جاساماعان امەريكالىقتاردىڭ داۋىستارىن جەڭىپ الۋ ءۇشىن تالپىنىس جاساماق. ازىرگە, جالپىۇلتتىق ساۋالناما مالىمەتتەرىنە سايكەس, ەلدىڭ باسىم كوپشىلىگى وباما جاعىندا. 49 پايىزدى قۇرايتىن ونىڭ رەيتينگى رومنيدەن 4 پايىزعا اسىپ تۇر.
بەيسەنبى, 4 قازان 2012 7:15
العاشقى پىكىرسايىس وتپەك
سارسەنبى كۇنى اقش پرەزيدەنتتىگىنە كانديداتتار باراك وباما مەن ميتت رومني اراسىنداعى العاشقى دەباتتار وتپەك.
دەنۆەر ۋنيۆەرسيتەتىندە وتەتىن بۇل ءسوزسايىس ىشكى ساياسات ماسەلەلەرىنە ارنالماقشى. دەبات ءبىر جارىم ساعاتقا سوزىلاتىن بولادى. وسى ۋاقىتتار ىشىندە پرەزيدەنت لاۋازىمى ءۇشىن كۇرەستەگى باسەكەلەستەر ءالى دە ءوز تاڭداۋلارىن جاساماعان امەريكالىقتاردىڭ داۋىستارىن جەڭىپ الۋ ءۇشىن تالپىنىس جاساماق. ازىرگە, جالپىۇلتتىق ساۋالناما مالىمەتتەرىنە سايكەس, ەلدىڭ باسىم كوپشىلىگى وباما جاعىندا. 49 پايىزدى قۇرايتىن ونىڭ رەيتينگى رومنيدەن 4 پايىزعا اسىپ تۇر.
الەپپودا كۇشتى جارىلىس بولدى
كەشە سيريانىڭ ءىرى قالالارىنىڭ ءبىرى الەپپودا جارىلىس بولدى. سوڭعى مالىمەتتەر بويىنشا 4 بومبا جارىلعان كورىنەدى.
بۇقارالىق اقپارات قۇرالدارى كەم دەگەندە 40 ادامنىڭ قازا تاپقانىن جانە 70-تەن استام ادامنىڭ جاراقات العانىن حابارلاۋدا. ال سيرياداعى ادام قۇقىقتارى جونىندەگى قاداعالاۋ كەڭەسىنىڭ مالىمەتتەرى بويىنشا جاراقاتتانعاندار سانى 90-عا جەتەدى. سونىمەن بىرگە, قۇقىق قورعاۋشىلار, قازا بولعان 40 ادامنىڭ باسىم كوپشىلىگىنىڭ بەيبىت تۇرعىندار ەمەس, اسكەري قىزمەتشىلەر ەكەنىن ايعاقتاپ وتىر.
ۇكىمەتتى كواليتسيا جاساقتاماق
ەل كونستيتۋتسياسى بويىنشا پارلامەنت سايلاۋىنان كەيىن جاڭا ۇكىمەت جاساقتاۋعا قۇقىلى گرۋزيا پرەزيدەنتى ميحايل سااكاشۆيلي بۇل قۇقىقتى پارلامەنتتىك باسىمدىققا يە بولعان «گرۋزين ارمانى» كواليتسياسىنا بەرىپ وتىر.
گرۋزيا پارلامەنتىنىڭ سپيكەرى داۆيد باكرادزەنىڭ ايتۋىنشا, جاڭا پارلامەنت قازىرگى پرەمەر ۆانو مەرابيشۆيليدىڭ ۇكىمەتىن بەكىتپەيدى. ال ونىڭ ارتىنىڭ كەزەكتەن تىس سايلاۋ تاعايىنداۋعا اپاراتىن ساياسي داعدارىسقا سوقتىرۋى مۇمكىن. ايتا كەتۋ كەرەك, وسىنىڭ الدىندا م.سااكاشۆيلي ءوزى باسقاراتىن بيلىكتەگى «ءبىرتۇتاس ۇلتتىق قوزعالىس» پارتياسىنىڭ وپپوزيتسياعا كەتەتىنىن حابارلاعان بولاتىن. سايلاۋدىڭ الدىن-الا قورىتىندىسى بويىنشا ب.يۆانيشۆيلي كواليتسياسى – 55, م.سااكاشۆيلي پارتياسى 40,27 پايىز داۋىس جيناپ وتىر.
بىشكەكتەگى ەرەۋىل
بىشكەكتىڭ ورتالىق الاڭىندا «قۇمتور» التىن كەن ورنىن ناتسيوناليزاتسيالاۋ ءۇشىن بولعان ەرەۋىلدەن 9 ادام زارداپ شەككەن.
الدىن الا مالىمەتتەر بويىنشا, الا-توو الاڭىنداعى ەرەۋىلدى قۋىپ تاراتقاننان كەيىن 9 ادام مەديتسينالىق كومەك سۇراعان. ولاردىڭ جەتەۋى, ونىڭ ىشىندە 5 ميليتسيا قىزمەتكەرى اۋرۋحانادا جاتقان كورىنەدى. ەرەۋىلشىلەر پارلامەنت عيماراتىنا باسىپ كىرۋگە تالپىنعان. سونداي-اق ولار عيماراتقا جانە ونى كۇزەتىپ تۇرعان ميليتسيونەرلەرگە تاس لاقتىرعان. ەرەۋىلگە بارلىعى 500-گە جۋىق ادامنىڭ قاتىسقانى بەلگىلى بولىپ وتىر.
ستۋدەنتتەرگە قارسى وق اتتى
نيگەريادا بەلگىسىز بىرەۋلەر 27 ستۋدەنتتى اتىپ ولتىرگەن, 15-كە جۋىق ادام دەنە جاراقاتتارىن العان.
مۋبي قالاسىنا جاسالعان شابۋىلدان كەيىن قالادا كومەندانتتىق ساعات ەنگىزىلىپ وتىر. جەرگىلىكتى بيلىكتىڭ حابارلاۋىنشا, كامۋفلياج كيىمىندەگى قارۋلى ادامدار پوليتەحنيكالىق كوللەدج جاتاقحاناسىنا باسىپ كىرىپ, ونداعى وقۋشىلارعا وق اتا باستاعان. پوليتسيا دا, اسكەري بولىمشەلەر دە قىلمىسكەرلەرگە توسقاۋىل قويا الماعان كورىنەدى. قازىرگى ۋاقىتتا جەرگىلىكتى تۇرعىندارعا ۇيلەرىنەن شىقپاۋ جونىندە بۇيرىق بەرىلگەن.
كولىك ساۋداسى قىسقارۋدا
گەرمانيانىڭ اۆتوموبيل رىنوگىنداعى اۆتوكولىك ساۋداسى كۇرت قىسقارىپ كەتكەن.
قىركۇيەك ايىندا 250 مىڭعا جۋىق جاڭا اۆتوموبيلدەردىڭ ساتىلعانى تىركەلگەن. بۇل 2011 جىلدىڭ وسى ايىمەن سالىستىرعاندا, 11 پايىزعا كەم. بارلىعى قاڭتار مەن قىركۇيەك ايلارىندا 2,36 ميلليون جاڭا اۆتوموبيل ساۋدالانعان ەكەن. وسىلايشا, 2012 جىلدىڭ 9 ايىنىڭ كورسەتكىشى وتكەن جىلدىڭ ءدال سول كەزەڭىمەن سالىستىرعاندا 1,8 پايىزعا قىسقارعان كورىنەدى.
پرەمەرگە قولداۋ ءبىلدىردى
يسپانيانىڭ 17 ءوڭىرىنىڭ ۇكىمەتتەرى ورتالىق بيلىكتىڭ 2013 جىلعا بەلگىلەگەن بيۋدجەت تاپشىلىعى باعدارىمەن كەلىسەتىندىكتەرىن بىلدىرگەن.
وسىلايشا, ەل كەڭ كولەمدى كومەك سۇرايدى دەپ كۇتكەن ينۆەستورلار تاراپىنان بولىپ جاتقان ەلەۋلى قىسىمدى سەزىنىپ وتىرعان يسپانيا پرەمەرى ماريانو راحوي از ۋاقىتقا بولسا دا تىنىس العانداي بولدى. پرەمەر بيۋدجەتكە قولداۋ كورسەتكەندەرى ءۇشىن ءوڭىر باسشىلارىنا العىس ايتىپ, بۇل كوزقاراستىڭ فەدەرالدىق ۇكىمەت پەن وڭىرلەر اراسىنداعى داۋ-جانجالدى بولدىرماۋعا جاعداي جاسايتىنىن اتاپ كورسەتكەن.
تروپيكالىق داۋىل قاتەرى
اتلانت مۇحيتىندا «وسكار» تروپيكالىق داۋىلى پايدا بولىپ, ول كاريب ارالدارى باعىتىنا قاراي قوزعالۋدا.
بۇل تۋرالى اقش-تىڭ داۋىلداردى باقىلاۋ جونىندەگى ۇلتتىق ورتالىعى حابارلاعان. داۋىلدىڭ تاياۋداعى 48 ساعاتتىڭ ىشىندە تروپيكالىق تسيكلونعا اينالۋ مۇمكىندىگى ۇلكەن دەپ اتاپ كورسەتىلگەن حاباردا. «وسكار» داۋىلى جاسىل ءمۇيىس ارالدارىنان شامامەن العاندا, 1,5 شاقىرىم وڭتۇستىك-باتىسقا تامان ايماقتا پايدا بولعان كورىنەدى.
ينتەرنەت ماتەريالدارى نەگىزىندە ازىرلەندى.
