شاراينا

سارسەنبى, 3 قازان 2012 7:25

وپپوزيتسيانىڭ جەڭىسى كۇمانسىز

گرۋزيادا وتكەن پارلامەنتتىك سايلاۋدا بيدزينا ءيۆانيشۆيليدىڭ «گرۋزين ارمانى» وپپوزيتسيالىق بلوگى جەڭىسكە جەتتى. سوڭعى مالىمەت بويىنشا, ول ەل پرەزيدەنتى ميحايل سااكاشۆيليدىڭ «ءبىرتۇتاس ۇلتتىق قوزعالىس» پارتياسىنان الشاقتىعىن ۇلعايتا تۇسكەن.

سارسەنبى, 3 قازان 2012 7:25

وپپوزيتسيانىڭ جەڭىسى كۇمانسىز

گرۋزيادا وتكەن پارلامەنتتىك سايلاۋدا بيدزينا ءيۆانيشۆيليدىڭ «گرۋزين ارمانى» وپپوزيتسيالىق بلوگى جەڭىسكە جەتتى. سوڭعى مالىمەت بويىنشا, ول ەل پرەزيدەنتى ميحايل سااكاشۆيليدىڭ «ءبىرتۇتاس ۇلتتىق قوزعالىس» پارتياسىنان الشاقتىعىن ۇلعايتا تۇسكەن.

گرۋزيا وسك-ءسىنىڭ دەرەكتەرىنە سۇيەن­سەك, بيۋللەتەندەردىڭ 11,1 پا­يى­زى تەك­سە­رىل­گەننەن كەيىن «گرۋزين ارمانى» 54,61 پايىز داۋىس جيناسا, «ءبىرتۇتاس ۇلتتىق قوز­عالىس» پار­تياسىنىڭ كورسەتكىشى 38,14 پايىز بولعان. پرەزيدەنت پارتيا­سى­نىڭ جەڭىلىسىنە ەلدەگى تۇرمەدەگى جاعدايلارعا بايلانىستى جانجالدار كەرى اسەر ەتكەن سەكىلدى.

كواليتسيانىڭ ءپاترۋلىن جاردى

اۋعانستاننىڭ سولتۇستىك-شىعىسىنداعى حوست قالاسىندا لاڭكەس-جانكەشتى جاساعان جارىلىستان كەم دەگەندە 14 ادام, ونىڭ ىشىندە ناتو-نىڭ 3 اسكەري قىزمەتشىسى قازا تاپتى. تاعى 40 ادام ءتۇرلى دەنە جاراقاتىن العان.

قازا تاپقانداردىڭ اراسىندا سونداي-اق 6 ازاماتتىق تۇلعا, 4 اۋعان پوليتسياسىنىڭ قىزمەتكەرى مەن 1 ءتىلماش بار ەكەن. جارىلىس بازارعا ادامدار كوپ جينالعان ساتتە جۇزەگە اسىرىلعان. جان­كەش­تىنىڭ كوزدەگەنى اۋعانستانداعى حالىقارالىق كواليتسيانىڭ ءپاترۋلى بولعان دەگەن بولجام ايتىلۋدا.

شەكارا بۇزدى دەپ ايىپتادى

جاپونيانىڭ جاعالاۋ كۇزەتى شىعىس قىتاي تەڭىزىندەگى تالاس تۋدىرىپ وتىرعان سەنكاكۋ ارالدارى ماڭىندا قىتاي كورابلدەرى تەڭىز شەكاراسىن بۇزدى دەپ ايىپتادى. جاپون جاعىنىڭ ايتۋىنشا, سەيسەنبىگە قاراعان ءتۇنى ەلدىڭ اۋماقتىق سۋلارىنا قىتايلىق 4 كۇزەت كورابلى ەنىپ كەتكەن.

كورابلدەر ارالدارعا جاقىن­دا­عان ساتتە جاپوندار ولاردىڭ تالاس تۋدىرىپ وتىرعان اۋماقتان كەتۋىن تالاپ ەتكەن. قىتايلىقتار باي­لانىسقا شىعۋدان باس تارتقانىمەن, كوپ كەشىكپەي كەمەلەرىن كەرى بۇرعان. بۇل پەكيننىڭ اتالعان ارالدار شەكاراسىن سوڭعى 2 اپتانىڭ ىشىندە ەكىنشى رەت بۇزۋى بولىپ تابىلادى.

جالاعا جاۋاپكەرشىلىك جۇرمەيدى

ۋكراينانىڭ جوعارعى راداسى كەشە بۇعان دەيىن قابىلدانعان جالا مەن ار-نامىسقا تيگەنى ءۇشىن قىلمىستىق جاۋاپكەرشىلىك ەنگىزۋ تۋرالى شەشىمنىڭ كۇشىن رەسمي تۇردە جويدى. ءسويتىپ, بيلەۋشى «وڭىرلەر پارتياسى» جاساعان زاڭ جوباسى تالقىلاۋدان الىنىپ تاستالدى.

قۇجات ءبىرىنشى وقىلىمدا قارالعان كەزدە وعان 349 دەپۋتات قارسى داۋىس بەرگەن ەكەن. ال زاڭ جوباسىن جاساعان توپتىڭ جەتەكشىسى ۆيتالي جۋراۆسكيدىڭ ايتۋىنشا, بۇل ناعىز كەرەك زاڭ بولاتىن. ويتكەنى, كەز كەلگەن ادام بىرەۋگە جالا جاۋىپ نەمەسە جامان ءسوز ايتپاس بۇرىن ويلانىپ الاتىن ەدى. ەندى كىم-كىم دە زاڭ الدىندا جاۋاپ بەرەمىن دەپ ەش قورىقپاستان, ويىنا نە كەلسە سونى ايتا بەرەتىن بولادى.

مەماپپاراتتى 30 پايىزعا قىسقارتادى

بەلورۋسسيانىڭ مەملەكەتتىك اپپاراتى 25-30 پايىزعا قىسقاراتىن بولادى. بۇل تۋرالى ەل پرەزيدەنتى الەكساندر لۋكاشەنكو مالىمدەپ وتىر. تومەندەگىلەر از, جوعارىداعىلار كوپ, قاجەت ەمەس قىزمەتتەردى جويىپ, سونىڭ ەسەبىنەن مەمقىزمەتكەرلەردىڭ ەڭبەكاقىسىن ايتارلىقتاي ۇلعايتۋعا بولادى, دەپ ءتۇسىندىردى ءوزىنىڭ شەشىمىن ا.لۋكاشەنكو.

مەملەكەتتىك اپپاراتتى وڭتاي­لان­دىرۋ جۇمىستارىمەن پرەزيدەنت اكىمشىلىگىنىڭ باسشىسى اندرەي كوبياكوۆتىڭ جەتەكشىلىگىندەگى ارنايى كوميسسيا اينالىسپاق. كوميس­سياعا سونداي-اق پرەزيدەنتتىڭ كو­مەكشىسى ناتاليا پەتكەۆيچ تە كىرەدى ەكەن. ال قىسقارتۋلاردىڭ قاشان ءجۇ­رەتىنى تۋرالى ناقتى مالىمەت جوق.

سوقتىعىستان قازا تاپقاندار كوپ

گونكونگتا بۇرناعى كۇنى كەشكىسىن جولاۋشىلار پارومدارى سوقتىعىسۋى سالدارىنان كەم دەگەندە 56 ادام وپات بولسا, 50-گە جۋىعى ءتۇرلى دەنە جاراقاتتارىمەن اۋرۋحاناعا جاتقىزىلدى. وقيعا گونكونگتاعى لامما ارالى ايماعىندا ورىن الدى.

اتالعان اۋماقتا قىتايداعى باستى فەستيۆالدەردىڭ ءبىرى – كۇز ورتاسى مەرەكەسى اتالىپ ءوتىپ جاتقان ەدى. پارومدار جولاۋشىلارى ءداستۇرلى تۇردە سول كۇنى ورىندالاتىن وتشاشۋلار شوۋىن كورۋ ءۇشىن ۆيكتوريا گاۆانىنە بەت العان بولاتىن. بورتىندا 120 جولاۋشىسى بار پاروم ەكىنشىسىمەن سوقتىعىسقان سوڭ بىردەن تۇڭعيىققا باتقان. ەكىنشىسى كوپ زاقىم كەلمەگەندىكتەن, امان-ەسەن جاعالاۋعا جەتكەن. وقيعا سەبەبى بەلگىسىز.

قىسقا قايىرىپ ايتقاندا:

  جاپونيانىڭ سولتۇستىك-شىعىس جاعالاۋلارىندا ماگنيتۋداسى 6,2 باللعا تەڭ جەر سىلكىنىسى تىركەلدى. بۇل تۋرالى اقش-تىڭ گەولوگيالىق قىزمەتىنە سىلتەمە جاساي وتىرىپ «رەيتەر» اگەنت­تىگى حابارلادى. تابيعات اپاتىنىڭ سالدارى تۋرالى ەشتەڭە ايتىلمايدى.

  كولۋمبيا پرەزيدەنتى حۋان مانۋەل سانتوس كەشە وزىنەن راك اۋ­رۋى تابىلعانى تۋرالى جاريا ەتتى. ەندى الداعى اپتادا وعان وتا جاسالاتىن بولادى. سانتوستىڭ ايتۋىنشا, ىسىكتىڭ كولەمى ۇلكەن ەمەس جانە ەرتە انىقتالعاندىقتان, تولىقتاي ايىعۋ مۇمكىندىگى جوعارى.

  رەسەيلىك ءپاراشيۋتشى يرينا سينيتسىنا اقش-تا ونەر كور­سە­تۋى كەزىندە ايتارلىقتاي جاراقات العان ەدى. ول ماسكەۋگە جەت­كىزىلگەنىمەن, كوپ ۇزاماي كوز جۇمدى. ي.سينيتسىنا كاليفورنيادا توپتاسىپ سەكىرۋدەن جاڭا الەمدىك رەكورد جاڭارتپاقشى بولعان كەزىندە بىرنەشە مويىن ومىرتقاسىن سىندىرعان بولاتىن.

ينتەرنەت ماتەريالدارى نەگىزىندە ازىرلەندى.