دوڭگەلەك ۇستەل جۇمىسىنا قر پرەزيدەنتى ءارحيۆى ديرەكتورىنىڭ ورىنباسارى قايرات الىمعازينوۆ, ارحيۆ قىزمەتكەرلەرى جانار ساتاەۆا, ءاليا سۇلەيمەنوۆا, حاميت بەگالاەۆ, سونداي-اق ۇزاق جىل بويى قىزمەت اتقارعان قۇرمانعازى اتىنداعى ۇلتتىق كونسەرۆاتوريانىڭ, وزگە دە وقۋ ورىندارىنىڭ پروفەسسور عالىمدارى, قوعام قايراتكەرلەرى, ارىپتەستەرى مەن تۋىستارى قاتىستى.
دوڭگەلەك ۇستەل اياسىندا «قازاقستان رەسپۋبليكاسى پرەزيدەنتى ءارحيۆىنىڭ قورقۇرۋشىلارى: ءباتىش قازىحانوۆا (14 ناۋرىز 1929 ج. – 1 ناۋرىز 2016 ج.)» تاريحي-قۇجاتتىق كورمەنىڭ ەلەكتروندىق نۇسقاسى جانە قر پرەزيدەنتى ءارحيۆى دايىنداعان ءال-فارابي اتىنداعى قازاق ۇلتتىق ۋنيۆەرسيتەتىنىڭ «ونەگەلى ءومىر»: ءباتىش قازىحانوۆا» اتتى كىتابىنىڭ 171-شىعارىلىمىنىڭ تۇساۋكەسەرى بولىپ ءوتتى.
ءىس-شارا ماقساتى – قازاقستان رەسپۋبليكاسى پرەزيدەنتى ءارحيۆىنىڭ جەكە تەكتىك قورلارىنىڭ قۇجاتتارىن كوپشىلىككە جاريا ەتۋ, ەل تاريحىنىڭ دەرەكتەرىن جەكە قورلاردىڭ قۇرامىنداعى قۇجاتتار ارقىلى ناسيحاتتاۋ.
كىتاپتىڭ لەنتاسىن قازاقستان رەسپۋبليكاسى پرەزيدەنتى ءارحيۆى ديرەكتورىنىڭ ورىنباسارى ق. الىمعازينوۆ, قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى ت. ساتىبالدينا, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى ت. عابيتوۆ قيدى.
دوڭگەلەك ۇستەلگە قاتىسۋشىلار ب. قازىحانوۆانىڭ ادامگەرشىلىك پاراساتى, عىلىمي قارىمى, قوعامدىق-ساياسي قىزمەتى جايلى ەستەلىكتەرمەن ءبولىستى. ت. عابيتوۆ ب. قازىحانوۆاعا ارنالعان كىتاپتىڭ تۇساۋكەسەر ءراسىمىنىڭ فيلوسوفيا جانە ساياساتتانۋ فاكۋلتەتىندە وتكىزىلۋىن ءرامىزدى وقيعا رەتىندە اتاپ ءوتتى. «ب.ر.قازىحانوۆا قازاقستانداعى كاسىبي ەستەتيكا عىلىمىنىڭ نەگىزىن سالۋشى, ورتا ازيا مەن قازاقستان رەسپۋبليكالارىنىڭ ىشىندەگى العاشقى عىلىم دوكتورى» دەپ اتاپ كورسەتتى. ت. ساتىبالدينا قۇرمانعازى اتىنداعى قازاق ۇلتتىق كونسەرۆاتورياسىندا 30 جىلدان استام ۋاقىت بىرگە قىزمەت ەتكەن كەزدەرىن ەسكە الىپ, ءباتىش راقىمحانقىزىنىڭ ەكى ءداۋىردىڭ ۇرپاعى ەكەنىن, تولىققاندى قازاق ايەلى, باقىتتى انا بولعانىن ايتتى. فيلوسوفيا عىلىمدارىنىڭ دوكتورى س. نۇرمۇراتوۆ قر پرەزيدەنتى ارحيۆىندەگى, جەكە تۇلعالاردىڭ ءومىرى مەن قوعامدىق قىزمەتى جايلى جيناقتاردى دايىنداۋ سياقتى جاقسى ءداستۇردىڭ ساقتالعانىنا, تۇلعاتانۋ سالاسىنا قوسىلعان جاڭا ەڭبەكتەرگە توقتالدى. ب. قازىحانوۆانىڭ ارىپتەستەرى, عىلىم دوكتورلارى ن. بايتەنوۆا, ج. التاەۆ, ك. بەگالينوۆا, د. راەۆ, تۋىستارى ب. قازىحانوۆا, ك. بايجانوۆا, ۇلى ەرلەن جانگەلدين جانە تاعى باسقا فيلوسوف عالىمدار عىلىمي اتاقتاردى بەرۋ جونىندەگى ديسسەرتاتسيالىق كەڭەستە بىرگە قىزمەت اتقارعان كەزدەرى تۋرالى ەستەلىكتەرىمەن ءبولىسىپ, ونىڭ قازاقستانداعى فيلوسوف مامانداردى دايارلاۋداعى ۇلەسى, وتباسىلىق ومىردەگى باۋىرمالدىلىعى, قوناقجاي قاسيەتى جونىندە اڭگىمەلەدى. ابىلايحان اتىنداعى حالىقارالىق قاتىناستار جانە الەم تىلدەرى ۋنيۆەرسيتەتىنىڭ پروفەسسورى د.راەۆ رەسپۋبليكاداعى جوعارى وقۋ ورىندارىمەن, عىلىمي زەرتتەۋ ورتالىقتارىمەن بىرلەسىپ جىل سايىن ب. قازىحانوۆا وقۋلارىن, ونەرتانۋ وقۋلارىن وتكىزۋدى ۇسىندى.
قر پرەزيدەنتى ءارحيۆىنىڭ باس ساراپشىسى ءاليا س.ۇلەيمەنوۆا «قازاقستان رەسپۋبليكاسى پرەزيدەنتى ءارحيۆىنىڭ قورقۇرۋشىلارى: ءباتىش قازىحانوۆا (14 ناۋرىز 1929 ج. – 1 ناۋرىز 2016 ج.)» تاريحي-قۇجاتتىق كورمەنىڭ نەگىزىندە جەكە قوردىڭ قۇرامىنداعى قۇجاتتارعا شولۋ جاسادى.
ءاليا سۇلەيمەنوۆا ب.قازىحانوۆانىڭ جاۋاپكەرشىلىگى مول ادام بولعانىنا ەرەكشە توقتالدى. «1973 جىلى قايتىس بولعان جولداسى توقتاعالي جانگەلدين تۋرالى قۇجاتتاردىڭ بارلىعىن مۇقيات جيناپ, جەكە مۇراعاتىن جاساقتاعان ەڭبەگى ءبىر توبە. وتىز جىل بويى قولجازبا كىتاپتارى مەن عىلىمي ەڭبەكتەرىن, ماقالالارىن كوزىنىڭ قاراشىعىناي ساقتاپ, 2000 جىلى قر پرەزيدەنتى ارحيۆىنە وتكىزدى. بۇگىندە بۇل جەكە تەكتىك قور ءباتىش راحىمحانقىزىنىڭ قۇجاتتارىمەن دە تولىقتىرىلىپ, وسى قۇجاتتار نەگىزىندە پرەزيدەنت ءارحيۆى مەن قازۇۋ, قۇرمانعازى اتىنداعى ۇلتتىق كونسەرۆاتورياسى بىرلەسە وتىرىپ, «ونەگەلى ءومىر» سەرياسىمەن ء«باتىش قازىحانوۆا» اتتى جيناقتى جارىققا شىعارىپ وتىر» دەدى ءاليا سۇلەيمەنوۆا.
جينالىس مودەراتورى فيلوسوفيا جانە ساياساتتانۋ فاكۋلتەتىنىڭ دەكانى, فيلوسوفيا عىلىمدارىنىڭ دوكتورى ءا. ماساليموۆا ب. قازىحانوۆانىڭ قازاقستانداعى فيلوسوفيا عىلىمىنا قوسقان ۇلەسىن, قوعامدىق-ساياسي قىزمەتى جايىندا بايانداي كەلە, ونى زامانىنا لايىق تۇلعا, ەستەتيكا سالاسىنىڭ ادىستەمەسىنە جاڭا باعىت بەرگەن عالىم-ۇستاز رەتىندە باعالادى.
ايگۇل احانبايقىزى,
«Egemen Qazaqstan»
الماتى
