ۆلاديمير پۋتين قىزمەتىنە كىرىستى
سەيسەنبى, 8 مامىر 2012 7:49
كەشە رەسەي فەدەراتسياسىنىڭ جاڭادان سايلانعان پرەزيدەنتى ۆلاديمير پۋتين كرەملگە جينالعان جۇرتشىلىق الدىندا ەلىنە, حالقىنا ادال قىزمەت ەتۋ تۋرالى انت بەرىپ, پرەزيدەنتتىك مىندەتتەرىنە رەسمي تۇردە كىرىستى.
سەيسەنبى, 8 مامىر 2012 7:49
كەشە رەسەي فەدەراتسياسىنىڭ جاڭادان سايلانعان پرەزيدەنتى ۆلاديمير پۋتين كرەملگە جينالعان جۇرتشىلىق الدىندا ەلىنە, حالقىنا ادال قىزمەت ەتۋ تۋرالى انت بەرىپ, پرەزيدەنتتىك مىندەتتەرىنە رەسمي تۇردە كىرىستى.
بۇعان دەيىن پرەزيدەنت بولعان دميتري مەدۆەدەۆ ەندى پرەزيدەنت ۆلاديمير ءپۋتيننىڭ ۇسىنىسىمەن ۇكىمەت توراعاسى بولۋى مۇمكىن. ول ءۇشىن د.مەدۆەدەۆكە رەسەي فەدەراتسياسى پارلامەنتىنىڭ جوعارعى جانە تومەنگى پالاتالارىنىڭ دەپۋتاتتارى قولداۋ ءبىلدىرۋى ءتيىس. ال ۆ.پۋتين پرەمەر-ءمينيستردىڭ مىندەتىن ۋاقىتشا اتقارۋدى ءبىرىنشى ۆيتسە-پرەمەر بولعان ۆيكتور زۋبكوۆقا تاپسىردى.
17 جىلدان سوڭعى سوتسياليستەردىڭ جەڭىسى
جەكسەنبى كۇنى فرانتسيادا پرەزيدەنتتىك سايلاۋدىڭ ەكىنشى تۋرى بولىپ ءوتتى. وندا ازداعان باسىمدىقپەن فرانسۋا وللاند جەڭىسكە جەتتى. داۋىس ساناۋ ناتيجەسىندە ونىڭ 52,1 پايىز داۋىس العانى بەلگىلى بولدى. سوڭعى 5 جىل پرەزيدەنت بولعان نيكوليا ساركوزيدى فرانتسيالىقتاردىڭ 48,9 پايىزى قولداعان.
ف.وللاند داۋىس جاريا ەتىلگەننەن كەيىن جاقتاستارىنىڭ الدىندا سويلەگەن سوزىندە بار كۇش-جىگەرىن ەكونوميكانى كوتەرۋگە, جۇمىس ورىندارىن كوبەيتۋگە, ءبىلىم بەرۋ سالاسىن جاڭعىرتۋعا, ەكولوگيا پروبلەمالارىن شەشۋگە جۇمسايتىنىن مالىمدەدى. سوتسياليستەر بيلىككە فرانسۋا ميتتەران كەتكەن 17 جىلدان كەيىن ەندى كەلىپ وتىر.
سەربيا پرەزيدەنتى 2-ءشى تۋردا انىقتالادى
سەربيا پرەزيدەنتىن سايلاۋدا ەكىنشى تۋر وتەتىن بولدى. وعان بۇرىنعى مەملەكەت باسشىسى بوريس تاديچ پەن وپپوزيتسيا سەركەلەرىنىڭ ءبىرى توميسلاۆ نيكوليچ قاتىسادى. بۇل تۋرالى كەشە «فرانس-پرەسس» اگەنتتىگى حابارلادى.
ەلدەگى 8 مىڭ سايلاۋ ۋچاسكەسىنىڭ اراسىنان ىرىكتەلىپ, 1 مىڭىنا جۇرگىزىلگەن ساۋالداما ناتيجەسىندە سايلاۋشىلاردىڭ 26,7 پايىزى ءوز داۋىستارىن تاديچكە, ال 25,5 پايىزى نيكوليچكە بەرەتىنى انىقتالعان. سايلاۋدىڭ ءبىرىنشى تۋرىندا داۋىس بەرۋشىلەردىڭ 58,7 پايىزى ءوز تاڭداۋلارىن جاساعان بولاتىن. ال ەكىنشى تۋر 20 مامىرعا بەلگىلەنىپ وتىر.
كۇدىكتىلەر سوت الدىندا جاۋاپ بەرۋدە
2001 جىلدىڭ 11 قىركۇيەگىندەگى لاڭكەستىكتى ۇيىمداستىردى دەگەن كۇدىكپەن قاماۋعا الىنعان حاليد شەيح موحاممەد پەن ونىڭ ءتورت سەرىگى گۋانتانامو بازاسىنداعى اسكەري تريبۋنال الدىندا جاۋاپ بەرۋدە. العاشقى سوت ماجىلىسىندە موحاممەد سۋديا دجەيمس پولدىڭ ساۋالدارىنا جاۋاپ بەرۋدەن باس تارتقان.
ادۆوكاتتاردىڭ سوزدەرىنە قاراعاندا, ايىپتالۋشى سوت ادىلەتسىزدىگىنە ءوزىنىڭ نارازىلىعىن وسىلايشا بىلدىرگەن. پول موحاممەدكە بۇلاي جاساۋعا بولمايتىنىن ەسكەرتكەننەن كەيىن سوت پروتسەسىن ونىڭ قاتىسۋىنسىز جۇرگىزگەن. سوت پروتسەسى كوپتەگەن جىلدارعا سوزىلۋى ىقتيمال دەلىنىپ وتىر. ەگەر ايىپتىلاردىڭ كىنالەرى مويىندارىنا قويىلسا, وندا ولار ءولىم جازاسىنا كەسىلەدى.
تۇرمەدەگىلەردىڭ ب ۇلىگى كۇشپەن باسىلدى
تاشكەنتتە تۇرمەدە وتىرعاندار پويىزبەن باسقا جاققا كوشىرىلۋ بارىسىندا ب ۇلىك شىعارعان. بۇل تۋرالى «فەرعانا» اگەنتتىگى حابارلادى. اگەنتتىكتەگى دەرەك كوزىنىڭ ءمالىمدەۋىنشە, تاشكەنتتىڭ ياككاساراي اۋدانىندا اتىلعان وقتىڭ داۋىسى ەستىلگەن.
جاسىرىن قالعان كۇش قۇرىلىمدارى قىزمەتكەرلەرىنىڭ ايتۋلارىنشا, سوتتالعاندار بىرنەشە ۆاگوندى باسىپ العان. ب ۇلىك قاتاڭ تۇردە باسىپ-جانشىلعان. وققا ۇشقانداردىڭ سانى بەلگىسىز. دەرەك كوزدەرىنىڭ سوزدەرىنە قاراعاندا, سوتتالعاندار تيەلگەن پويىز بۇرىنعىسىنشا سول ورنىندا تۇر. رەسمي ورىندار وقيعا تۋرالى ازىرشە جۇمعان اۋزىن اشقان جوق.
نارازىلىق اكتسياسىندا ۇستالعاندار كوپ
كانادانىڭ كۆەبەك پروۆينتسياسىنداعى ۆيكتورياۆيلل قالاسىندا ءبىلىم بەرۋگە باعانىڭ وسۋىنە قارسى نارازىلىق اكتسياسى بولىپ ءوتتى. اكتسيا بارىسىندا 106 قاتىسۋشى قاماۋعا الىنعان. نارازىلىق ءبىلدىرۋشى ستۋدەنتتەر مەن پوليتسيا اراسىنداعى قاقتىعىس بارىسىندا 9 ادام زارداپ شەككەن.
ولاردىڭ ۇشەۋى پوليتسيا قىزمەتكەرى بولسا, التاۋى دەمونسترانتتار. ءۇش ستۋدەنت باستارىنان العان جاراقاتتارى اۋىر بولعاندىقتان, اۋرۋحاناعا جاتقىزىلعان. جاعدايلارى ورتاشا تۇراقتى كورىنەدى. كۆەبەكتەگى ستۋدەنتتەر نارازىلىعى اقپان ايىنىڭ ورتاسىنان بەرى جالعاسىپ كەلەدى. وڭىرلىك ۇكىمەت بيۋدجەت تاپشىلىعىن قىسقارتۋ ماقساتىندا وقۋ اقىسىن ورتاشا ەسەپپەن 1625 دوللارعا كوتەرمەك بولىپ وتىر.
قىسقا قايىرىپ ايتقاندا:
* يزرايل ۇكىمەتى كەشە وتكەن ءوزىنىڭ ماجىلىسىندە پرەمەر-مينيستر بينيامين نەتانياحۋدىڭ ەل پارلامەنتىنە مەرزىمىنەن بۇرىن سايلاۋ وتكىزۋ تۋرالى باستاماسىنا قولداۋ ءبىلدىردى. ءسويتىپ, كنەسسەتكە سايلاۋ ۇستىمىزدەگى جىلدىڭ 4 قىركۇيەگىنە بەلگىلەندى.
* رەسەي پرەزيدەنتى ۆ.ءپۋتيننىڭ كەشەگى يناۋگۋراتسياسى كەزىندە ماسكەۋدە 120 ادام قاماۋعا الىندى. ولاردىڭ اراسىندا وپپوزيتسيا سەركەلەرىنىڭ ءبىرى بوريس نەمتسوۆ بار. ولار قوعامدىق ءتارتىپتى بۇزۋعا بولمايتىنى تۋرالى اڭگىمە وتكىزىلگەننەن كەيىن بوساتىلىپتى.
* وڭتۇستىك كورەيانىڭ پۋسان قالاسىنداعى كاراوكە-باردا بولعان ءورت سالدارىنان 9 ادام قازا تاپقان. تاعى 25 ادام زارداپ شەكسە, كەيبىرەۋلەرى ءولىم اۋزىندا جاتقانعا ۇقسايدى. ءورتتىڭ شىعۋ سەبەپتەرى ازىرشە بەلگىسىز.
* ازەربايجاننىڭ زاكاتالى قالاسى ماڭىندا ەڭ كۇشتىسىنىڭ ماگنيتۋداسى 5,5 بالل بولعان قاتارىنان ءۇش جەر سىلكىنىسى تىركەلدى. تابيعات اپاتى سالدارىنان 15 ادام زارداپ شەككەن. ولاردىڭ بارىنە العاشقى مەديتسينالىق كومەك كورسەتىلىپ, وقيعا ورنىنا قۇتقارۋشىلار جىبەرىلىپتى.
ينتەرنەت ماتەريالدارى نەگىزىندە ازىرلەندى.
