شاراينا
سەيسەنبى, 27 ناۋرىز 2012 7:19
احمادينەجاد ناتو-نى ايىپتادى
دۋشانبەدە ءوتىپ جاتقان اۋعانستان بويىنشا ەكونوميكالىق قىزمەتتەستىك جونىندەگى وڭىرلىك كونفەرەنتسيادا يران پرەزيدەنتى ماحمۋد احمادينەجاد اۋعانستانداعى بارلىق باقىتسىزدىقتارعا ناتو مەن اقش كىنالى دەپ مالىمدەگەن.
سەيسەنبى, 27 ناۋرىز 2012 7:19
احمادينەجاد ناتو-نى ايىپتادى
دۋشانبەدە ءوتىپ جاتقان اۋعانستان بويىنشا ەكونوميكالىق قىزمەتتەستىك جونىندەگى وڭىرلىك كونفەرەنتسيادا يران پرەزيدەنتى ماحمۋد احمادينەجاد اۋعانستانداعى بارلىق باقىتسىزدىقتارعا ناتو مەن اقش كىنالى دەپ مالىمدەگەن.
اۋعان حالقى ۇنەمى ءوز ۇيلەرىندە وتىرىپ شابۋىلدارعا ۇشىراۋدا. پاكستانداعى, پالەستينا مەن بىرقاتار افريكالىق ەلدەردەگى جاعداي دا ءدال وسىنداي. بۇكىل پروبلەما تەرروريزمگە قارسى كۇرەس جەلەۋىمەن اۋعانستانعا ەنگەن ناتو-نىڭ ساياساتىندا, ول ەندى ءدال وسىنداي ۇرانمەن رەسەي مەن قىتايدى دا قورشاۋعا الۋدا. ناتو مەن اقش, ولاردىڭ الەمگە ءوز شارتتارىن قوياتىن ۋاقىتى وتكەندىكتەن, ءوز ساياساتتارىن وزگەرتۋى ءتيىس, دەپ اتاپ كورسەتكەن ول.
اتوم ەنەرگياسىنان باس تارتۋ قادامى
جاپونيا اتوم ەنەرگياسىنان تولىق باس تارتۋعا قاراي تاعى ءبىر قادام جاساي وتىرىپ, كەزەكتى اتوم ەلەكتر ستانساسىن جاپتى.
دۇيسەنبى كۇنى تاڭەرتەڭگىلىك Tokyo Electric Power Co كومپانياسى كاسيۆادزاكي-كاريۆا اتوم ەلەكتر ستانساسىندا جۇمىس ىستەپ تۇرعان سوڭعى ەنەرگوبلوكقا جوسپارلى جۇمىستار جۇرگىزۋ ءۇشىن ونىڭ جۇمىسىن توقتاتتى. وسىلايشا, جاپونيادا بۇگىندە 54 يادرولىق رەاكتورىنىڭ بىرەۋى عانا جۇمىس ىستەپ تۇر. حوككايدو ارالىنداعى ول رەاكتوردىڭ جۇمىسى ۇستىمىزدەگى جىلدىڭ مامىر ايىندا توقتاتىلاتىن بولادى.
قازا تاپقاندارعا وتەماقى تولەندى
امەريكا قۇراما شتاتتارى امەريكالىق سەرجانت روبەرت بەيلستىڭ قولىنان قازا تاپقان ءاربىر اۋعاندىق ءۇشىن 50 مىڭ دوللار وتەماقى تولەدى.
قۇربان بولعانداردىڭ وتباسىلارىنا بۇل اقشا 24 ناۋرىزدا قانداعار پروۆينتسياسى گۋبەرناتورىنىڭ رەزيدەنتسياسىندا تابىس ەتىلگەن. اۋعاندىقتارعا قارجى اقش پرەزيدەنتى باراك وبامادان كەلىپ ءتۇستى, دەپ حابارلاعان. جارالانعاندار بولسا, ارقايسىسى 11 مىڭ دوللاردان اقشا العان كورىنەدى.
بىرىگۋ مارشى ءوتتى
كيشينەۆتە مولدوۆانىڭ رۋمىنيامەن بىرىگۋىن جاقتايتىن راديكالدىق كۇشتەر اكتسياسى – بىرىگۋ مارشى ءوتتى.
مارش 24 ناۋرىزدا اتاپ وتىلەتىن بەسسارابيانىڭ رۋمىنيامەن بىرىگۋىنىڭ 94 جىلدىعىنا ورايلاستىرىلىپ وتىر. قۇرامىندا رۋمىنيادان شىققان «Noua Drepta» فاشيستىك لەگيونىنىڭ جۇزدەگەن جاستارى بار رۋمىنياعا قوسىلۋدى جاقتاۋشى ۋنيونيستەر قالا كوشەلەرىمەن سالتاناتتى تۇردە ءجۇرىپ وتكەن. ولارعا مولدوۆا مەملەكەتتىلىگىن ساقتاپ قالۋدى جاقتاۋشىلار قارسى شىققان. مارش كەزىندە ازداعان قاقتىعىستار دا ورىن العان كورىنەدى.
وپپوزيتسيونەر جەڭىسكە جەتتى
سەنەگالدىڭ 85 جاستاعى قازىرگى پرەزيدەنتى ابدۋلاي ۆاد پرەزيدەنت سايلاۋىنىڭ ەكىنشى تۋرىندا ءوزىنىڭ جەڭىلىسكە ۇشىراعانىن مويىندادى.
ول 50 جاستاعى بۇرىنعى پرەمەر, «اليانس زا رەسپۋبليكۋ» پارتياسىنىڭ نەگىزىن قالاۋشى جانە توراعاسى ماكي سالعا تەلەفون سوعىپ, ونى جەڭىسىمەن قۇتتىقتاعان. ەكىنشى تۋردىڭ ناقتى ناتيجەلەرى ازىرگە بەلگىسىز. ءبىرىنشى تۋردا سايلاۋشىلاردىڭ 34,8 پايىزى ۆادتى, 26,6 پايىزى سالدى قولداپ, داۋىس بەرگەن ەدى. پرەزيدەنت سايلاۋىنىڭ رەسمي قورىتىندىلارى 27-28 ناۋرىزدا بەلگىلى بولادى.
چيليدە جەر سىلكىنىسى بولدى
ءچيليدىڭ ورتالىق اۋداندارىندا وتە كۇشتى جەر سىلكىنىسى بولدى.
تسۋنامي قاۋپىنە بايلانىستى قۇتقارۋشىلار تۇرعىنداردى جاعالاۋداعى اۋدانداردان سىرتقارى جەرلەرگە كوشىرۋدى جۇزەگە اسىرعان. ابىروي بولعاندا, تابيعي اپات ەلەۋلى زارداپتار اكەلە قويماعان كورىنەدى. 7,1 باللدى قۇراعان جەر سىلكىنىسىنىڭ كىندىگى تالك قالاسىنان سولتۇستىك-باتىسقا قاراي 27 شاقىرىم قاشىقتىقتا 35 شاقىرىم تەرەڭدىكتە بولعان. سىلكىنىستى سەزىنگەن ەل استاناسى سانتياگو تۇرعىندارى ءوز ۇيلەرىن تاستاپ كەتۋگە ءماجبۇر بولعان. دەگەنمەن, تسۋنامي قاۋپى جوق ەكەنى حابارلانىپ, حالىق تىنىشتاندىرىلعان.
كوفي اننانعا قولداۋ كورسەتپەك
رەسەي مەن اقش بۇۇ-نىڭ ارناۋلى ەلشىسى كوفي انناننىڭ ديپلوماتيالىق ميسسياسىنا وزدەرىنىڭ كومەكتەسۋگە ءازىر ەكەندىكتەرىن بىلدىرگەن.
بۇل تۋرالى كەشە سەۋلدە ءوتىپ جاتقان يادرولىق قاۋىپسىزدىك جونىندەگى سامميت شەڭبەرىندە پرەزيدەنتتەر باراك وباما مەن دميتري مەدۆەدەۆ مالىمدەگەن. سول سياقتى رەسەي مەن اقش باسشىلارى كحدر-دىڭ «ىنحا-3» زىمىرانىن ۇشىرۋدان باس تارتۋىنا قول جەتكىزبەك نيەتتە. زىمىراندى ۇشىرا وتىرىپ, سولتۇستىك كورەيا بۇۇ قارارىن بۇزادى. وندايعا جول بەرۋگە بولمايدى. سولتۇستىك كورەيا دۇرىس تاڭداۋ جاساۋى ءتيىس, دەپ مالىمدەگەن اقش پرەزيدەنتى.
ۇلتتىق كيىم كيۋگە مىندەتتى
جالالاباد (قىرعىزستاننىڭ وبلىس ورتالىعى) باسشىلىعى مەملەكەتتىك قىزمەتشىلەردى جۇما كۇندەرى جۇمىسقا ۇلتتىق كيىم كيىپ كەلۋگە مىندەتتەگەن.
Kginform پورتالىنىڭ قالا اكىمشىلىگى ءباسپاسوز قىزمەتىنە سىلتەمە جاساي وتىرىپ كەلتىرگەن مالىمەتى بويىنشا, جالالاباد مەرى باقىت ادىلوۆ ءتيىستى قاۋلىعا 2011 جىلدىڭ جەلتوقسانىندا قول قويعان ەكەن. وتكەن جۇما كۇنى, ياعني 23 ناۋرىزدا مەريا قىزمەتكەرلەرى قالانىڭ مەملەكەتتىك مەكەمەلەرىندە رەيد وتكىزگەن. دەگەنمەن, قاۋلىنى بۇرمالاعاندار, ياعني ۇلتتىق كيىمنەن باس تارتۋشىلار تابىلماعان كورىنەدى.
ينتەرنەت ماتەريالدارى نەگىزىندە ازىرلەندى.
