گاۋكتىڭ كانديداتۋراسىن قولدادى
سەيسەنبى, 21 اقپان 2012 8:14
گەرمانيا كانتسلەرى انگەلا مەركەل بەلگىلى قۇقىق قورعاۋشى يواحيم گاۋكتىڭ كانديداتۋراسىنىڭ ەل پرەزيدەنتتىگىنە ۇسىنىلۋىن قولدايتىنىن مالىمدەدى.
گاۋكتىڭ كانديداتۋراسى تۋرالى ۇسىنىستى حريستيان ۆۋلف وتستاۆكاعا كەتكەننەن كەيىن وپپوزيتسيالىق سوتسيال-دەموكراتيالىق پارتيا مەن جاسىلدار ۇسىنعان بولاتىن. وسى ورايدا, 2010 جىلى مەركەلدىڭ حريستيان-دەموكرات ۆۋلفتى قولداي وتىرىپ, گاۋكتىڭ كانديداتۋراسىنا قارسى شىققانىن ايتا كەتۋ كەرەك. 72 جاستاعى يواحيم گاۋك بۇرىنعى گدر-دە قۇقىق قورعاۋشىلىق جانە ديسسيدەنتتىك قىزمەتىمەن ءمالىم بولعان ادام.
سەيسەنبى, 21 اقپان 2012 8:14
گەرمانيا كانتسلەرى انگەلا مەركەل بەلگىلى قۇقىق قورعاۋشى يواحيم گاۋكتىڭ كانديداتۋراسىنىڭ ەل پرەزيدەنتتىگىنە ۇسىنىلۋىن قولدايتىنىن مالىمدەدى.
گاۋكتىڭ كانديداتۋراسى تۋرالى ۇسىنىستى حريستيان ۆۋلف وتستاۆكاعا كەتكەننەن كەيىن وپپوزيتسيالىق سوتسيال-دەموكراتيالىق پارتيا مەن جاسىلدار ۇسىنعان بولاتىن. وسى ورايدا, 2010 جىلى مەركەلدىڭ حريستيان-دەموكرات ۆۋلفتى قولداي وتىرىپ, گاۋكتىڭ كانديداتۋراسىنا قارسى شىققانىن ايتا كەتۋ كەرەك. 72 جاستاعى يواحيم گاۋك بۇرىنعى گدر-دە قۇقىق قورعاۋشىلىق جانە ديسسيدەنتتىك قىزمەتىمەن ءمالىم بولعان ادام.
سيريا ەلشىسىن شاقىرىپ الدى
سيريا ەگيپەتتەگى ءوز ەلشىسىن كەرى شاقىرىپ الاتىندىعى تۋرالى مالىمدەمە جاسادى.
داماسكىنىڭ بۇل شەشىمى كايردىڭ ءىس-ارەكەتىنە قارسى جاسالعان قادام بولىپ وتىر. بۇل تۋرالى ەگيپەتتىڭ سىرتقى ىستەر مينيسترلىگى حابارلادى. 17 اقپان كۇنى مىڭداعان ەگيپەتتىكتەر ەل استاناسىنىڭ ورتالىعىندا سيريا وكىمەتىنە قارسى ۇيىمداستىرىلعان ەرەۋىلدەرگە قاتىسقان بولاتىن. سونىمەن بىرگە, قارسىلىق اكتسياسىنا قاتىسۋشىلار سيريا ەلشىسىن ەگيپەتتەن شىعارۋ جونىندە دە تالاپتار قويعان.
تۇرمەدە شىققان ەرەۋىل
مەكسيكانىڭ سولتۇستىگىندەگى مونتەررەي قالاسىنداعى تۇرمەلەردىڭ بىرىندە تارتىپسىزدىكتەر ورىن الىپ, سونىڭ سالدارىنان شامامەن 40 ادام قازا تاپقان.
مەكسيكانىڭ نۋەۆو-لەون شتاتىنىڭ قاۋىپسىزدىك ماسەلەلەرى جونىندەگى ءباسپاسوز حاتشىسى حورگە دومەنە زامبرانونىڭ ءمالىمدەۋىنشە, ەرەۋىل تۇنگى ساعات 2.00-دە باستالعان. سوتتالعاندار جانجال شىعارىپ, كۇزەتشىلەردىڭ ءبىرىن كەپىلدىككە العان. ىزىنشە ءتارتىپسىزدىكتەر تۇرمەنىڭ وزگە دە بلوكتارىنا اۋىسقان. تەك ەكى ساعاتتان كەيىن عانا بيلىككە احۋالدى باقىلاۋعا الۋدىڭ ءساتى تۇسكەن كورىنەدى.
ساركوزيدىڭ ساساتىن ءتۇرى جوق
فرانتسيا پرەزيدەنتى نيكوليا ساركوزي ءوزىنىڭ سايلاۋالدى ناۋقانىن مارسەلدە بۇقارالىق ميتينگىمەن باستادى.
جاقتاستارىنىڭ الدىندا ءسوز سويلەگەن ول ءوزى جۇرگىزگەن ەكونوميكالىق ساياساتتىڭ فرانتسيانى داعدارىستىڭ ەڭ ءبىر اۋىر زارداپتارىنان قورعاپ قالۋعا جاعداي تۋعىزعانىن مالىمدەگەن. سونىمەن بىرگە ول «ءداستۇرلى قۇندىلىقتاردى» قورعاۋدىڭ ءوزىنىڭ باستى ساياسي ماقساتتارىنىڭ ءبىرى بولاتىنىن دا اتاپ كورسەتكەن. بۇگىندە سوتسياليست فرانسۋا وللاند ساركوزيدىڭ باستى باسەكەلەسى بولادى دەپ سانالىپ وتىر. قازىرگى كەزدە ونىڭ رەيتينگى مەملەكەت باسشىسىنان 5-8 پايىزعا جوعارى تۇر.
باعدادتاعى جارىلىس
يراك استاناسى باعداد قالاسىندا پوليتسيا اكادەمياسىنىڭ جانىندا جانكەشتى تەررورشى ءوزىن-ءوزى جارىپ جىبەرگەن.
سونىڭ سالدارىنان 16 ادام قازا تاۋىپ, 26 ادام ءتۇرلى دەنە جاراقاتتارىن العان كورىنەدى. جارىلىس وقۋعا جاڭا قابىلدانعاندار عيماراتتان شىعا بەرگەن ساتتە ورىن العان. الدىن الا ءمالىم بولعانىنداي, ر ۇلىندە جانكەشتى وتىرعان اۆتوموبيل جارىلىس كۇشىنەن اسپانعا ءبىر-اق ۇشقان. ازىرگە بىردە-ءبىر توپ تەرراكت ءۇشىن جاۋاپكەرشىلىكتى ءوز مويىندارىنا الماي وتىر.
سايلاۋدىڭ قاشان وتەرى بەلگىسىز
ەگيپەتتىڭ سايلاۋ كوميسسياسى ەلدە وتەتىن پرەزيدەنت سايلاۋىنىڭ ناقتى كۇنىن كەيىنىرەك حابارلايتىن بولادى.
كوميسسيا توراعاسى فارۋك سۋلتاننىڭ مالىمدەۋىنشە, شەتەلدەردە تۇراتىن ەگيپەتتىكتەردىڭ داۋىس بەرۋىن ۇيىمداستىرۋدىڭ كۇردەلىلىگىنە بايلانىستى كوميسسيا ازىرگە سايلاۋدىڭ وتەتىن ناقتى كۇنىن كەلىسە الماي وتىرعان كورىنەدى. بۇعان دەيىن ەگيپەتتىڭ جاڭا پرەزيدەنتىن سايلاۋ 2012 جىلعى شىلدەنىڭ سوڭىنا دەيىن وتەدى دەپ حابارلانعان بولاتىن. پرەزيدەنت سايلاۋىنىڭ ناقتى كۇنىن تاياۋ ۋاقىتتاردا جوعارعى سايلاۋ كوميسسياسى مالىمدەۋگە ءتيىس.
قار استىنان تابىلعان ادام
شۆەتسيا تۇرعىنى قار استىندا كومىلىپ قالعان ماشينەدە تاماقسىز, سۋسىز ەكى اي ۋاقىت وتكىزگەن.
جەرگىلىكتى گازەتتىڭ جازۋىنا قاراعاندا, اۆتواۋەسقوي ءتىرى قالعان, ءتىپتى ەشقانداي زارداپ تا شەكپەگەن ءتارىزدى. پەتەر سكيللبەرگ ەسىمدى 45 جاسار ەر ادامنىڭ عايىپتان امان قالۋى تۋرالى حابار بۇكىل ەلگە تاراپ ۇلگەردى. ونى ۋمەو قالاسىنا جاقىن ورمان ىشىنەن جەرگىلىكتى تۇرعىندار تاۋىپ العان كورىنەدى. اۆتوماشينە ىشىندە ەكى اي بويى قاماۋدا بولعان ادامدى قۇتقارۋشىلار مەن مەديكتەر زەمبىلگە سالىپ الىپ كەتكەن.
يسپاندار ەڭبەك رەفورماسىنا قارسى
ءبىر ميلليوننان استام يسپاندار ءوتكەن اپتادا ۇكىمەت قابىلداعان ەڭبەك رەفورماسىنا نارازىلىق بەلگىسى رەتىندە كوشەلەرگە شىقتى.
ۇيىمداستىرۋشىلار كەلتىرگەن مالىمەتتەرگە قاراعاندا, بۇل 1988 جىلدىڭ باسىنان بەرى يسپانيادا ءوتىپ وتىرعان ەڭ ءىرى نارازىلىق اكتسياسى. وپپوزيتسيالىق يسپانيا سوتسياليستىك جۇمىسشى پارتياسى مەن كاسىپوداقتار يسپان ۇكىمەتى قۋاتتاعان ەڭبەك رەفورماسى جۇمىسشىلاردىڭ قۇقىقتارىنا قىسىم جاسايدى دەپ ەسەپتەيدى. ەل ۇكىمەتى قۋاتتاعان زاڭ جوباسى بويىنشا جۇمىس بەرۋشى ءار جۇمىس ىستەگەن جىلى ءۇشىن 33 كۇن مولشەرىندە جاردەماقى تولەي وتىرىپ, قىزمەتكەردى جۇمىستان شىعارىپ جىبەرۋگە قۇقىلى. بۇرىن بۇل كورسەتكىش 45 كۇندى قۇرايتىن.
يران جاڭا كليەنتتەر ىزدەمەك
يران بريتان جانە فرانتسۋز كومپانيالارىنا مۇناي جەتكىزىپ بەرۋدى توقتاتتى.
وسى ەلدىڭ مۇناي مينيسترلىگىنىڭ سايتىندا كەلتىرىلگەن ءمالىمدەمەدە مينيسترلىك وكىلى الي رەزا نيكزاد مۇنايدى بۇدان بىلاي جاڭا كليەنتتەرگە ساتاتىندارىن مالىمدەگەن. 23 قاڭتاردا ەۋرووداق ەلدەرىنىڭ سىرتقى ىستەر مينيسترلەرى بريۋسسەلدە يران مۇنايىنا ەمبارگو قويۋدى قۋاتتاعان بولاتىن. وعان سايكەس 1 شىلدەدەن باستاپ ەۋرووداققا مۇشە تەھراننان مۇناي ساتىپ الۋشى بارلىق ەلدەر يران يمپورتىنان باس تارتۋى ءتيىس. ءسوز ورايىندا يراننىڭ ەۋروپاعا مۇناي يمپورتىنىڭ شامامەن 68 پايىزىنىڭ گرەكيا, يتاليا جانە يسپانيا ۇلەسىنە تيەسىلى ەكەنىن ايتا كەتۋ قاجەت.
ينتەرنەت ماتەريالدارى نەگىزىندە ازىرلەندى.
