شاراينا
سەيسەنبى, 13 قاراشا 2012 7:55
قارۋلى كۇش قولدانباق نيەتتە
سيريا رەۆوليۋتسياسى كۇشتەرىنىڭ ۇلتتىق كواليتسياسى ەل پرەزيدەنتى باشاراسادپەن كەلىسسوزگە بارۋدان باس تارتىپ, ونى قارۋلى كۇش قولدانۋارقىلى ورنىنان تايدىرماق نيەتتە.
سەيسەنبى, 13 قاراشا 2012 7:55
قارۋلى كۇش قولدانباق نيەتتە
سيريا رەۆوليۋتسياسى كۇشتەرىنىڭ ۇلتتىق كواليتسياسى ەل پرەزيدەنتى باشاراسادپەن كەلىسسوزگە بارۋدان باس تارتىپ, ونى قارۋلى كۇش قولدانۋارقىلى ورنىنان تايدىرماق نيەتتە.
جاڭا كواليتسيا تۋرالى قابىلدانعان دەكلاراتسيادا اساد رەجىمىن قۇلاتۋ جانە ونىمەن قانداي دا ءبىر ۇنقاتىسۋعا بارۋدان باس تارتۋ ءبىرىنشى ماسەلە رەتىندە كورسەتىلگەن, دەپ ءمالىمدەگەن سيريا ۇلتتىق كەڭەسىنىڭ وكىلى ماحمۋد ءال-حامزا. سيريا ۇلتتىق كواليتسياسى باشار اسادقا قارسى اسكەري ءىس-قيمىلداردى ءۇيلەستىرىپ, ەرەۋىلشىلەر قول استىنداعى ءوڭىرلەرگە باسشىلىق جاساماق نيەتتە. ايتا كەتۋ كەرەك, ۇلتتىق كواليتسيا قۇرامىنا ساياسي ەميگراتسيادا جۇرگەن جانە سيريادا كۇرەس جۇرگىزىپ جاتقان 60 ادام ەنگەن.
بي-بي-سي باسشىلىعى وتستاۆكاعا كەتتى
بي-بي-سي جاڭالىقتار قىزمەتىنىڭ ديرەكتورى حەلەن بوۋدەن مەن ونىڭ ورىنباسارى ستيۆ ميتچەلل وتستاۆكاعا كەتتى.
بي-بي-سي باسشىلىعى بۇل وتستاۆكالار تۋرالى تۇسىنىك بەرگەن جوق, بىراق تاياۋ ۋاقىتتاردا ول تۋرالى مالىمدەمە جاسالادى دەپ كۇتىلۋدە. جاڭالىقتار قىزمەتى ديرەكتسياسىنداعى وتستاۆكا كورپوراتسيا باس ديرەكتورىنىڭ جۇمىستان كەتەتىندىگى تۋرالى ءمالىمدەمەسىنەن كەيىن ورىن الىپ وتىر. ال بي-بي-ءسيدىڭ باس ديرەكتورى دجوردج ەنتۋيسل ەفيرگە Newsnight باعدارلاماسىنىڭ كەزەكتى شىعارىلىمىنان سوڭ تۋىنداعان جانجالعا بايلانىستى وتستاۆكاعا كەتكەن بولاتىن.
مەرەكە سوڭى قاقتىعىستارعا ۇلاستى
ورىن العان قاقتىعىستار سالدارىنان بىرنەشە وفيتسەر جارالانىپ, كوپتەگەن ەرەۋىلشىلەر قاماۋعا الىندى, دەپ حابارلادى ۆۆس پولشالىق باق-تارعا سىلتەمە جاساي وتىرىپ.
قاقتىعىستاردىڭ الدىن الۋ ءۇشىن ۆارشاۆادا ۇلتشىلدار مارش وتكىزگەن اۋدانعا مىڭداعان پوليتسەيلەر اكەلىنگەن. تاۋەلسىزدىك كۇنىن مەرەكەلەۋ كەزىندەگى كوشەدە جينالعان ۇلتشىلدار سانى ءوسۋ ۇستىندە جانە ولارعا سولشىل كۇشتەر قارسى تۇرۋدا. مارشقا قاتىسۋشىلاردىڭ اراسىندا پولشالىق پاتريوتتار, فۋتبول فاناتتارى جانە ءتۇرلى ۇلتشىل توپتار بولعان. پولشادا وتكەن جىلى دا وسىنداي جاعداي ورىن الىپ, وندا ءتارتىپ بۇزعان 200-دەن استام ادام قاماۋعا الىنعان بولاتىن.
اقش كواليتسيانى قولدايدى
اقش-تىڭ مەملەكەتتىك دەپارتامەنتى جەكسەنبى كۇنى كاتاردا قۇرىلعان وپپوزيتسياشىل سيريا ۇلتتىق كواليتسياسىن قولدايتىنىن مالىمدەدى.
اتالعان ۆەدومستۆو وكىلى مارك تونەر ءوز سوزىندە وسىلاي دەپ اتاپ كورسەتكەن. ونىڭ ايتۋىنشا, اقش وپپوزيتسيونەرلەردى قۇتتىقتايدى, سونىمەن بىرگە كواليتسياعا قولداۋ بىلدىرەدى, ويتكەنى ولاردىڭ ماقساتى باشار اساد رەجىمىن قۇلاتىپ, بەيبىت, ءادىل, دەموكراتيالىق بولاشاق ورناتۋ بولىپ تابىلادى. جاڭادان قۇرىلعان ورگان سيريانىڭ ۇكىمەتتىڭ اسكەرلەرىنە قارسى اسكەري ءىس-قيمىلداردى ۇيلەستىرىپ وتىراتىن بولادى.
لوندون ءىرى قارجى ورتالىعى اتاعىنان ايىرىلماق
ەڭبەك رىنوگىنداعى جاعدايدىڭ ناشارلاۋىنا بايلانىستى لوندوننىڭ 2012 جىلى الەمنىڭ ەڭ ءىرى قارجى ورتالىعى اتاعىنان ايىرىلۋى مۇمكىن.
ساراپشىلاردىڭ باعالاۋىنشا, 2012 جىلى لوندون ءبىرىنشى ورىندى نيۋ-يورككە بەرىپ, 2015 جىلعا قاراي گونكونگتى الدىنا شىعارۋ ارقىلى بريتان استاناسى ءۇشىنشى ورىنعا دەيىن تومەندەيتىن بولادى. ءۇستىمىزدەگى جىلى لوندوننىڭ قارجى سەكتورىنداعى جۇمىس ورىندارى 249,5 مىڭعا دەيىن ازايماق, ال نيۋ-يوركتە وسى جىلدىڭ اياعىندا قارجىگەرلەر سانى 254,2 مىڭدى قۇرايتىن بولادى. بۇل كورسەتكىشتىڭ قىسقارۋىنان ەڭ الدىمەن سالىق تولەۋشىلەر زارداپ شەگەدى ەكەن. ماسەلەن, 2008 جىلى لوندوننىڭ قارجى سەكتورىنا قۇيىلعان قارجىلىق تۇسىمدەر 70 ملرد. فۋنتتان اسسا, بيىل ول شامامەن 40 ملرد. فۋنتتاي عانا بولماق.
دەپۋتاتتىق مانداتتاردان باس تارتپاق
ۋكراينادا «باتكيۆششينا», «ۋدار» جانە «سۆوبودا» پارتيالارى دەپۋتاتتىق مانداتتاردان باس تارتامىز دەپ شۋ كوتەرۋدە.
مۇنداي جاعدايدا ەل كونستيتۋتسياسىنا سايكەس پارلامەنت زاڭسىز بولىپ تابىلادى. وپپوزيتسياداعىلار وزدەرىنىڭ ءىس-قيمىل جوسپارىن ورتالىق سايلاۋ كوميسسياسى عيماراتى الدىندا وتەتىن ەرەۋىلدە حابارلاماق. ورتسايلاۋكومنىڭ رەسمي مالىمەتتەرى بويىنشا, راداعا 5 ساياسي پارتيا وتكەن بولاتىن. كۇتپەگەن جەردەن جاڭا رادانىڭ قۇرامىندا وزدەرىن وپپوزيتسيانىڭ ارنايى ماقساتتاعى كۇشتەرى دەپ اتايتىن ۇلتشىلدار دا پايدا بولعان. ءسوز رەتىندە العاشقى وتىرىستىڭ جەلتوقساننىڭ ورتاسىنا بەلگىلەنگەنىن دە ايتا كەتۋ قاجەت.
كەيبىر الىمداردىڭ كۇشىن جويماق
دانيا مايلى ونىمدەرگە سالىق سالۋدان باس تارتىپ وتىر, دەپ حابارلادى فرانس-پرەسس اگەنتتىگى. ەل بيلىگى تاياۋ ۋاقىتتاردا مۇنداي الىمداردىڭ كۇشىن جويماق نيەتتە.
مايلى ونىمدەرگە سالىق سالۋ تۋرالى شەشىم 2009 جىلى قابىلدانعان بولاتىن. بىراق سالىق جونىندەگى مينيسترلىكتىڭ ايتۋىنا قاراعاندا, مۇنداي الىمدار ءوزىن-ءوزى اقتاماعان. دانيا مايلى تاعامدارعا سالىق ەنگىزگەن الەمدەگى ءبىرىنشى مەملەكەت بولىپ تابىلادى. ەلدىڭ دەنساۋلىق ساقتاۋ مينيسترلىگىنىڭ ءمالىمەتتەرىنشە, دانيالىقتاردىڭ 47 پايىزىنىڭ ارتىق سالماعى بولسا, تاعى 13 پايىزى سەمىزدىكتەن زارداپ شەگۋدە.
قۇلاقپەن «كورۋ» قۇرىلعىسىن ويلاپ تاپتى
سوقىرلار نىسانداردى ەستۋ قابىلەتى ارقىلى «كورۋ» تەحنيكاسىن ۇيرەنە الادى. يزرايل مەن فرانتسيانىڭ حالىقارالىق عالىمدار توبى وسىنداي قورىتىندىعا كەلىپ وتىر.
تۋعاننان كورۋ قابىلەتىنەن ايىرىلعان ادامدارمەن 70 ساعات جاتتىعۋلار جاساۋعا تۋرا كەلگەن. وسىدان كەيىن ولار نىسانداردى, سونىڭ ىشىندە ۇيلەر مەن كوشەلەردى كورۋگە ۇيرەنگەن. سونىمەن بىرگە, ەكسپەريمەنتكە قاتىسقان ەرىكتىلەر ادامداردىڭ بەت قيمىلدارىن بايقاپ, سول سياقتى جەكەلەگەن ارىپتەر مەن سوزدەردى وقي الاتىن بولعان.
ينتەرنەت ماتەريالدارى نەگىزىندە ازىرلەندى.
