«قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» قر زاڭىنا ەنگىزىلگەن وزگەرىستەرگە بايلانىستى, مىناداي وزگەرىستەر كۇشىنە ەندى:
– ەگەر ازاماتتىق-قۇقىقتىق سيپاتتاعى شارتتاردىڭ ءبىر تارابى سالىق اگەنتى, ياعني زاڭدى تۇلعالار, جەكە كاسىپكەرلەر, جەكە نوتاريۋستار, جەكە سوت ورىنداۋشىلارى, ادۆوكاتتار, كاسىبي مەدياتورلار بولاتىن بولسا, وندا ولار فريلانسەرلەر ءۇشىن مىندەتتى زەينەتاقى جارنالارىن تولەيتىن اگەنتكە اينالادى. بۇل رەتتە جارنالار جەكە تۇلعانىڭ الاتىن تابىسىنىڭ 10 پايىزى مولشەرىندە, بىراق ءتيىستى قارجى جىلىنا بەلگىلەنگەن ەڭ تومەنگى جالاقىنىڭ 10 پايىزىنان كەم ەمەس جانە 50 ەسەلەنگەن مولشەرىنىڭ 10 پايىزىنان جوعارى ەمەس مولشەردە بەلگىلەنەدى.
بۇل رەتتە جارنالاردى ەسەپتەۋ ءۇشىن الىناتىن ەڭ جوعارى جيىنتىق جىلدىق تابىس رەسپۋبليكالىق بيۋدجەت تۋرالى زاڭمەن ءتيىستى قارجى جىلىنا بەلگىلەنگەن ەڭ تومەنگى جالاقىنىڭ 50 ەسەلەنگەن مولشەرىنىڭ 12 ەسەلەنگەن سوماسىنان اسپاۋى ءتيىس.
ەگەر ازاماتتىق-قۇقىقتىق سيپاتتاعى شارتتار سالىق اگەنتى بولىپ تابىلمايتىن جەكە تۇلعالارمەن جاسالسا, وندا فريلانسەرلەر جارنا تولەۋگە تەك قۇقىلى بولادى. بىراق مىندەتتى ەمەس. دەگەنمەن جەكە تۇلعا بۇل جارنالاردى ءوزىنىڭ ۇيعارۋىمەن قورداعى جەكە شوتىنا اۋدارا الادى. بۇل ءۇشىن ول جارنالاردى بانكتەر نەمەسە قازپوشتا ارقىلى «ازاماتتارعا ارنالعان ۇكىمەت» مەملەكەتتىك كورپوراتسياسىنا تولەيدى. ءارى قاراي كورپوراتسيا جارنالاردى قورعا اۋدارادى. ەگەر فريلانسەر ءوزىنىڭ وسى قۇقىعىن پايدالانسا, بۇل ونىڭ جەكە زەينەتاقى كاپيتالىن قالىپتاستىرۋىنا وڭ اسەر ەتەتىن بولادى.
سونىمەن قاتار ەڭبەك شارتى بويىنشا جۇمىس ىستەيتىن ازاماتتار ءارى ازاماتتىق-قۇقىقتىق شارتتار بويىنشا جەكە تۇلعالاردىڭ تاپسىرىسىن ورىندايتىن بولسا, وندا ولار ازاماتتىق-قۇقىقتىق شارتتار بويىنشا جارنا تولەۋدەن بوساتىلادى. بۇل جاعدايدا مىندەتتى زەينەتاقى جارنالارىن سالىق اگەنتى بولىپ تابىلاتىن جۇمىس بەرۋشى عانا تولەيدى.
ايناش ەسالي,
«Egemen Qazaqstan»
الماتى
