2018 جىلدىڭ قازان ايىندا رەسمي تۇردە قۇرىلعان تەاتردىڭ ديرەكتورى ءارى كوركەمدىك جەتەكشىسى – قازاقستاننىڭ ەڭبەك سىڭىرگەن قايراتكەرى تۇرسىنبەك قاباتوۆ, باس رەجيسسەرى – سايلاۋ قاميەۆ.
استانا قالاسى اكىمدىگىنىڭ قولداۋىمەن ومىرگە كەلگەن ونەر ورداسى جاڭا جىلدا قوس بىردەي كومەدياسىن كورەرمەن نازارىنا ۇسىنىپ ۇلگەردى. ونىڭ العاشقىسى – جاس تەاتردىڭ تۇساۋىن كەسكەن م.فرەيننىڭ «تەاتر 180◦» قويىلىمى بولسا, ەكىنشىسى – فرانتسۋز دراماتۋرگى م.كامولەتتيدىڭ «مەرەكەلىك مەنيۋ» كومەدياسى.
– كومەديا تەاترى بولعاننان كەيىن, ارينە, نەگىزگى باسىمدىق وتاندىق جانە شەتەلدىك دراماتۋرگتەردىڭ ۇزدىك قويىلىمدارىنا بەرىلەدى. الداعى ۋاقىتتا استارلى, ايتارى مول كومەديالارمەن قاتار, ۋ.شەكسپير, ا.چەحوۆ سياقتى كلاسسيك دراماتۋرگتەردىڭ دە پەسالارىن ساحناعا شىعارۋ جوسپاردا بار. ويتكەنى بىرىڭعاي كۇلكى جانرىنا ويىسا بەرسەك, اكتەرلەرىمىزدىڭ شىعارماشىلىق ءوسۋىن تاپتاۋرىندىلىققا ۇرىندىرىپ الۋىمىز مۇمكىن. سوندىقتان دا تەاتر رەپەرتۋارىنىڭ 80 پايىزىن كومەديا جانرىنداعى قويىلىمدارعا ارناساق, قالعان 20 پايىزى دراما مەن تراگەدياعا ارنالادى دەپ كۇتىلۋدە. تەاتر ترۋپپاسىنىڭ بارلىعى دەرلىك جاستار بولعاندىقتان, ساحناعا جاستىق جالىندى, تازالىقتى الىپ كەلگىمىز كەلەدى, – دەيدى تەاتردىڭ باس رەجيسسەرى, قازاقستاننىڭ ەڭبەك سىڭىرگەن قايراتكەرى سايلاۋ قاميەۆ.
استاناداعى قازاق ۇلتتىق ونەر ۋنيۆەرسيتەتىن اكتەر, رەجيسسەر سايلاۋ قاميەۆ شەبەرحاناسى بويىنشا تامامداعان جاستاردان قۇرالعان تەاتر ترۋپپاسىندا بارلىعى 31 اكتەر قىزمەت ەتەدى. جاقىندا پرەمەراسى وتكەن فرانتسۋز دراماتۋرگى م.كامولەتتيدىڭ «مەرەكەلىك مەنيۋ» كومەدياسىنان سول جاستاردىڭ بىرقاتارىنىڭ ونەرىن تاماشالاۋ مۇمكىندىگى تۋدى. اتاپ ايتساق, جاكلين رولىندە – اقبوتا ماكەجانوۆا مەن التىناي قوجاحمەتوۆا, بەرنارد – ءالي بيداحمەت پەن نۇرجان اسىلحان, روبەرت – ءالي جاراس ۇلى, عاني بەردەنبەتوۆ, سيۋزەتتا – ايشا اعىمباي, البينا ۋاليەۆا, سيۋزاننا – ەڭلىك ايىمعازى, اسەل نۇرتازينا جانە دجوردج رولىندە باعلان يمانعازينوۆ پەن بەيبارىس اسقاربەكوۆ ءوز ونەرلەرىن كورەرمەن نازارىنا ۇسىندى. شىتىرمان وقيعاعا قۇرىلعان سيتۋاتسيالىق كومەدياداعى وقيعا جەلىسىنىڭ كۇتپەگەن بۇرىلىستارى, شىر اينالدىرار ينتريگا مەن تارتىستى سيۋجەت اكتەرلەردىڭ مىندەتتەرىن قيىنداتقانىمەن, ىشكى جانە سىرتقى پلاستيكاسىن, جالپى شىعارماشىلىق مۇمكىندىگىن كورسەتۋىنە تاماشا جول اشقانى انىق. الداعى ۋاقىتتا دا تەاتر وسى ىزدەنىسىن جالعاستىرا بەرسە, ساندىق قانا ەمەس, ساپالىق تۇرعىدان دا جاڭا بەلەسكە كوتەرىلىپ, ونەر الەمىندە ءوز قولتاڭباسىن قالىپتاستىراتىنىنا سەنىم مول. وعان جاس ترۋپپانىڭ شىعارماشىلىق قارىمى تولىق جەتەدى.
نازەركە جۇماباي,
«Egemen Qazaqstan»
