باۋىرلاستىق باۋرايى
جۇما, 8 ماۋسىم 2012 7:44
اسەم الەم – ازەربايجان!
كەشە بەيبىتشىلىك جانە كەلىسىم سارايىندا وتكەن ازەربايجاننىڭ قازاقستانداعى مادەنيەت كۇندەرىنىڭ اشىلۋ سالتاناتىنا قر مادەنيەت جانە اقپارات ۆيتسە-ءمينيسترى اسقار بورىباەۆ پەن ازەربايجاننىڭ مادەنيەت جانە تۋريزم ۆيتسە-ءمينيسترى سەۆدا مامەداليەۆا قاتىسىپ, ءسوز سويلەدى. ارقا توسىندە باستالىپ, الاتاۋدىڭ باۋرايىندا جالعاساتىن دۋماندى شەرۋ ماۋسىمنىڭ 9-ى كۇنى جامبىل اتىنداعى قازاق مەملەكەتتىك فيلارمونياسىنىڭ ورتالىق كونتسەرت زالىندا وتەتىن گالا-كونتسەرتپەن تۇيىندەلەدى.
جۇما, 8 ماۋسىم 2012 7:44
اسەم الەم – ازەربايجان!
كەشە بەيبىتشىلىك جانە كەلىسىم سارايىندا وتكەن ازەربايجاننىڭ قازاقستانداعى مادەنيەت كۇندەرىنىڭ اشىلۋ سالتاناتىنا قر مادەنيەت جانە اقپارات ۆيتسە-ءمينيسترى اسقار بورىباەۆ پەن ازەربايجاننىڭ مادەنيەت جانە تۋريزم ۆيتسە-ءمينيسترى سەۆدا مامەداليەۆا قاتىسىپ, ءسوز سويلەدى. ارقا توسىندە باستالىپ, الاتاۋدىڭ باۋرايىندا جالعاساتىن دۋماندى شەرۋ ماۋسىمنىڭ 9-ى كۇنى جامبىل اتىنداعى قازاق مەملەكەتتىك فيلارمونياسىنىڭ ورتالىق كونتسەرت زالىندا وتەتىن گالا-كونتسەرتپەن تۇيىندەلەدى.
«مەنىڭ بۇگىن استاناعا ءبىرىنشى رەت كەلۋىم. استانانىڭ تۇركى الەمىنىڭ مادەني استاناسى بولىپ جاريالانۋى تەگىن ەمەس. سەبەبى, استانا – ارمان قالا, دەدى ازەربايجان مادەنيەت جانە تۋريزم ۆيتسە-ءمينيسترى س.مامەداليەۆا باق وكىلدەرىنە بەرگەن سۇحباتىندا, – مەنىڭ تاعى ءبىر بايقاعانىم, قالادا قۇرىلىس جۇمىستارى وتە قارقىندى ءجۇرىپ جاتىر ەكەن. ادام قىزىعارلىق تاماشا ساۋلەت نىساندارى تۇرعىزىلىپتى. ءبىراز جەردى ارالاپ كوردىم. قازاقتار ەڭبەكقور حالىق ەكەن. جاڭادان سالىنعان قالا بولعانمەن زاماناۋي مەگاپوليستەردىڭ ەشبىرىنەن قالىسپايدى. مۇنداي استانادا ءومىر ءسۇرۋدىڭ ءوزى ادام ءۇشىن زور ءمارتەبە. وسىنىڭ ءبارى قازاق ەلىنىڭ تۇڭعىش پرەزيدەنتى نۇرسۇلتان نازارباەۆتىڭ يدەياسىمەن جۇزەگە اسىپ جاتقان جوبالار ەكەنى داۋسىز.
ازەربايجان مەن قازاقستاننىڭ اراسىنداعى باۋىرمالدىق بايلانىستىڭ تامىرى تەرەڭدە جاتىر. بۇل ۇلت كوسەمى گەيدار اليەۆتىڭ تۇسىندا باستالعان تۋىستىق قارىم-قاتىناس دەر ەدىم, ويتكەنى ەكى ەل باسشىلارىنىڭ ءبىر-بىرىنە دەگەن قۇرمەتى كەرەمەت بولاتىن. قازىر دە سول باياعى دوستىق قارىم-قاتىناس ويداعىداي جالعاسىن تاۋىپ كەلەدى. قازاقستان ازەربايجاننىڭ حالىقارالىق جوبالارىنا قاشاندا قولداۋ كورسەتۋدەن تانعان ەمەس. اسىرەسە, مادەني سالادا بارىس-كەلىس دامىپ كەلەدى. سىزدەر بىزدەردىڭ جوبالارىمىزعا, ءبىز سىزدەردە وتەتىن حالىقارالىق فەستيۆالدار مەن ۆوكالدىق بايقاۋلارعا قاتىسىپ تۇرامىز. كىتاپحانالار مەن مۋزەيارالىق ءتاجىريبە الماسۋلار ۇدايى توقتاعان ەمەس. قاراعاندى وبلىستىق تەاترىندا ازەربايجان دراماتۋرگىنىڭ شىعارماسى ساحنالاندى. مۇنى تۇركسوي حالىقارالىق ۇيىمىنىڭ باس حاتشىسى دۇيسەن قاسەيىنوۆ تاماشالادى. وسىنىڭ ءوزى قازاقتاردىڭ ازەربايجان ونەرىنە كورسەتكەن ۇلكەن قۇرمەتى دەپ ەسەپتەيمىن».
بيىل ەلوردا كەلبەتى وزگەشە ناقىشقا بولەنىپ, «استانا – ءتۇركى الەمىنىڭ مادەني استاناسى» اتاندى. اقپانداعى سالتاناتتى جيىنعا ءتۇبى ءبىر تۇركى جۇرتىنان قوناقتار كەلىپ قاتىستى. جالپى, تۇركى وركەنيەتىن قالىپتاستىرۋدا شىعارماشىلىق توپتاردىڭ قاتىسۋىمەن وتەتىن حالىقارالىق فەستيۆال سىندى شارالاردىڭ ءوزى ۇلكەن ءرول اتقارىپ, ءتۇبى تۇركى جۇرتىنىڭ ەجەلدەن تامىرلاس, رۋحتاس ەكەنى سەزىلۋدە. ەل پرەزيدەنتى نۇرسۇلتان نازارباەۆ قازاقستان حالقىنا جولداۋىندا: «استانا 2012 جىلى تۇركى الەمىنىڭ مادەني استاناسى بولىپ جاريالاندى. وسى حالىقارالىق ءىس-شارالاردى لايىقتى وتكىزۋىمىز كەرەك» دەگەن بولاتىن. ازەربايجاننىڭ قازاقستانداعى مادەنيەت كۇندەرى وسى ماقساتتىڭ ومىردەگى ايقىن كورىنىسى ىسپەتتى اسەر قالدىرادى. تار, ناگارا, كانون سىندى ءداستۇرلى مۋزىكالىق اسپاپتاردا وينايتىن انسامبل «سارى گالين» ءانىن, ازەربايجان مەملەكەتتىك بي ءانسامبلى «ياللا» ءبيىن, سونداي-اق سيمارا يمانوۆا, سابۋحي يباەۆ سىندى ونەر شەبەرلەرى «ديلكاش», «اي, ءديلبار», «ولماسايدى», «كاراباح شيكەستەسي» سياقتى تاڭداۋلى شىعارمالاردى جوعارى دەڭگەيدە ورىنداپ بەردى. مەيمانداردىڭ جانىڭدى جاھۇتقا بولەيتىن جايدارى ونەرى استاناعا تۇركى ءوركەنيەتىنىڭ ورتالىعى دەۋگە لايىقتى تۇرپات بەرىپ, بەيبىتشىلىك جانە كەلىسىم سارايى شىعىستىق ماقامعا مالىندى.
تۇركى جۇرتى ءبىر-ءبىرىن نە ءۇشىن ىزدەپ جاتىر, مۇرات-مۇددەسىن ءبىرىكتىرۋىنە نە سەبەپ دەگەن ساۋال تۋادى. ەڭ الدىمەن ايتارىمىز, بۇگىنگىدەي جاھاندانۋ زامانىندا كىم-كىمگە دە تۋعان ءتىلدىڭ تولعاعى باستى ماسەلەگە اينالىپ وتىر. ادەت-عۇرىپ پەن سالت-داستۇردە, ءداستۇرلى مۋزىكا مەن ءتىل ماسەلەسىندە ءوزارا بىرلەسىپ, ويلاسىپ شەشەتىن جايتتەر بارشىلىق. حالىقتىق يگىلىكتى, ورتاق قازىنانى كورعاپ, ساقتاۋ ءۇشىن دە ءتۇبى تۇركى جۇرتىنىڭ بىرلىگىنە كوپ نارسە بايلانىستى بولىپ وتىر. تاريح ساباعى رۋحاني قاناتى قايىرىلعان حالىقتىڭ قالىبى بۇزىلارىن اقاۋسىز جەتكىزەدى. بۇل رەتتە ازەربايجان مادەنيەتى مەن ونەرىنەن قايماعى بۇزىلماعان ونەگەنى, تۇنىعى شايقالماعان بۇلاقتى بايقادىق. تانىمال ونەر شەبەرلەرى مەرەكەلىك كەشتە ۇلتتىق مۋزىكانىڭ ءىنجۋ-مارجاندارىن ورىنداپ, ونەردىڭ قاي سالاسىندا بولسىن وزدەرىنىڭ حالىقتىق كاۋساردان قانىپ ىشكەن ۇرپاقتىڭ جالعاسى ەكەندىكتەرىن اڭعارتتى. قاي شىعارما دا شىنايى رۋحىندا شىرقالدى. ازەربايجاننىڭ مەملەكەتتىك بي ءانسامبلى, ۇلت-اسپاپتار ءانسامبلى, ف.اميروۆ اتىنداعى مەملەكەتتىك ءان-بي ءانسامبلىنىڭ بالەت توبى ازەربايجان حالقىنىڭ بۇرىنعى ءداستۇرلى مادەنيەتى مەن جاڭعىرعان كەيىنگى كەيپىنىڭ تۇتاس بەينەسىن قامتىعان باعدارلاما ۇسىندى. جالپى, ازەربايجان مۋزىكاسى مەن ساحنالىق ونەرى دەگەندە, قازاق كورەرمەنى الدىمەن ۋ. گادجيبەكوۆتىڭ ەسىمىن ايتارى ءسوزسىز. «ارشىن مال الان» سپەكتاكلى كۇنى بۇگىنگە دەيىن كورەرمەننىڭ ءسۇيىپ تاماشالايتىن بىردەن-ءبىر ساحنالىق قويىلىمى دەسەك, كەڭەستىك زاماننىڭ وزىندە-اق زور قۇرمەتكە يە, ەسترادا جۇلدىزى پولاد بيۋل-بيۋلوگلىنىڭ ەسىمىن بىلمەيتىن بىردە-ءبىر قازاقستاندىق جوق شىعار. ايتا بەرسەك, ەكى حالىق رۋحانياتىنا ورتاق مۇنداي قىمبات تۇلعالار بارشىلىق. مادەني جاقىنداسۋلار سول ونەگەنى ارمەن قاراي جالعاستىرارىنا سەنەمىز.
قاراشاش توقسانباي,
«ەگەمەن قازاقستان».
