كۇن تارتىبىندە «قازىرگى قوعامداعى مۇگەدەكتىگى بار بالالار جاعدايىنىڭ وزەكتى ماسەلەلەرى» دەگەن تاقىرىپ قارالدى. جيىنعا ءماجىلىس دەپۋتاتتارى, مينيسترلىكتەردىڭ جاۋاپتى قىزمەتكەرلەرى جانە قوعامدىق بىرلەستىكتەردىڭ وكىلدەرى قاتىستى.
وتىرىستىڭ باسىندا دەپۋتاتتىق توپتىڭ جەتەكشىسى ساۋىتبەك ابدراحمانوۆ كەيىنگى كۇندەردە الەۋمەتتىك جەلىلەردە جاريالانىپ جۇرگەن, مەملەكەتتىڭ ۇلت ساياساتىنىڭ تۇبەگەيلى ماسەلەلەرىنە قاتىستى پوستارعا قاتىستى ءوز ويىن ءبىلدىردى. اتاپ ايتقاندا, الەۋمەتتىك جەلىلەردە الدەبىرەۋدىڭ باسقا ۇلت وكىلدەرىنەن «كەك قايتارۋعا» شاقىرعان روليكتەرى جاريالانىپ, كوبەيتىلە تاراتىلىپ كەلەدى. دەنى ساۋ دەۋگە اۋىز بارا قويمايتىنداي ادامنىڭ ول سوزدەرىنىڭ اقىلعا قونىمسىزدىعىنا, اشىقتان اشىق, ارانداتۋشىلىق سيپاتى بار بۇل روليكتەر جەلى قولدانۋشىلارىنىڭ اشۋ-ىزاسىن تۋعىزىپ وتىر. جالپى, مۇنداي ۇستامسىز اڭگىمەلەر ۇلتارالىق ارازدىقتى قوزداتۋى ابدەن مۇمكىن. س.ابدراحمانوۆ ءتيىستى ورگاندار بۇل وقيعاعا ءوز باعاسىن بەرەدى دەپ سەنەتىنىن جەتكىزدى. ماجىلىستەگى قازاقستان حالقى اسسامبلەياسىنىڭ دەپۋتاتتىق توبى بۇل ماسەلەنى نازاردا ۇستايتىن بولادى دەدى دەپۋتات.
ال وتىرىستىڭ كۇن تارتىبىندەگى ماسەلە بويىنشا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ماگەررام ماگەرراموۆ جانە باسقا ءسوز سويلەۋشىلەر مەملەكەتتىڭ باستى مىندەتتەرىنىڭ ءبىرى مۇمكىندىگى شەكتەۋلى ادامداردىڭ الەۋمەتتىك ىقپالداسۋىن, تەڭ قۇقىقتارى مەن مۇمكىندىكتەرىنىڭ بولۋىن قامتاماسىز ەتۋ بولىپ تابىلاتىنىن اتاپ ءوتتى.
ەلىمىزدە مۇمكىندىكتەرى شەكتەۋلى ادامداردى, سونىڭ ىشىندە بالالاردى قورعاۋ جونىندە زاڭنامالىق نەگىز, نورماتيۆتىك اكتىلەر بار. بۇل ماڭىزدى ماسەلەدە مەملەكەتتىك ورگاندار, جۇرتشىلىق, ۇكىمەتتىك ەمەس ۇيىمدار بىرلەسە جۇمىس اتقارۋدا. مۇگەدەكتىگى بار بالالارعا, سونداي بالاسى بار وتباسىلارعا ءتيىستى كومەك كورسەتىلىپ جاتقانىن جانە بولاشاقتا جاردەم ەتۋ قاجەتتىگى تۋرالى ايتىلدى.
وتىرىستى ءماجىلىس توراعاسىنىڭ ورىنباسارى ۆلاديمير بوجكو قورىتىندىلادى.
سەرىك ابدىبەك,
«Egemen Qazaqstan»
