شالعاي اۋىلدارداعى 127 مەكتەپتى كەڭ جولاقتى ينتەرنەتپەن جانە 167 مەكتەپتى «WI-FI» نۇكتەلەرىمەن تولىق قامتۋ وسى جىلدىڭ جۇمىس جوسپارىنا ەنگىزىلگەن. وڭىرلىك كوممۋنيكاتسيالار قىزمەتىندە وتكەن ءباسپاسوز جيىنىندا وبلىستىق اقپاراتتاندىرۋ, مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ باسشىسى باستار ەسقاراەۆ وڭىردە «تسيفرلىق قازاقستان» مەملەكەتتىك باعدارلاماسى 5 باعىت بويىنشا جۇزەگە اسىرىلىپ جاتقانىن ايتتى. «ەنەرگەتيكا جانە تۇرعىن ءۇي-كوممۋنالدىق شارۋاشىلىق سالاسى بويىنشا "SmartCity" تۇجىرىمداماسى ىسكە اسىرىلۋدا. اتاپ ايتقاندا, تۇركىستان قالاسىنداعى وتىرار مولتەك اۋدانىندا 10 كوپ قاباتتى تۇرعىن ۇيگە «E-SHANYRAQ» جۇيەسىنە تولىقتاي ينتەگراتسيالاۋ جۇمىستارى جاسالىندى. بۇل, ءيمپۋلستى قاشىقتىقتان باسقارىلاتىن ەسەپتەگىشتەر ارقىلى سۋ, جىلۋ جانە ەلەكتر ەنەرگياسىنىڭ بەرىلۋى باقىلانادى. ياعني, تۇرعىندار ينتەرنەت ارقىلى ەسەپتەۋلەر مەن ەسەپ ايىرىسۋلاردىڭ دۇرىستىعىن تەكسەرە الادى, ءۇي بويىنشا شىعىندارمەن تابىستار باقىلاۋدا بولادى جانە تكش ماسەلەلەرى بويىنشا ونلاين تۇردە وتىنىشتەر قابىلدانادى», – دەدى باستار اۋەلحان ۇلى.
«SmartCity» باعدارلاماسى نەگىزىندە بيىل پيلوتتىق جوبا رەتىندە تۇركىستان قالاسىنداعى ساياباقتار مەن كوشەلەرگە «اقىلدى جارىقتاندىرۋ» جوباسىن ەنگىزۋ جۇمىستارى قولعا الىنعان. بۇل جارىق بەرۋ ايماعىندا وزدىگىنەن اۆتوماتتى تۇردە جارىق سوندىرىلەدى نەمەسە ازايادى, سونداي-اق اۆتوكولىكتەر جارىقتاندىرۋ ايماعىن كەسىپ وتكەن كەزدە عانا اۆتوماتتى تۇردە قايتا قوسىلۋىنا مۇمكىندىك بەرەدى. باسقارما باسشىسىنىڭ ايتۋىنشا, تسيفرلاندىرۋ جۇيەسى, اسىرەسە مەملەكەتتىك قىزمەت كورسەتۋ سالاسىندا كەڭ قولدانىستا. ماسەلەن, وتكەن جىلى 10,955 مىڭ مەملەكەتتىك قىزمەت كورسەتىلگەن. ونىڭ 9,350 مىڭى ەلەكتروندىق تۇردە, قالعان 1 372 مىڭى قاعاز تۇرىندە ىسكە اسىرىلعان.
عالىمجان ەلشىباي,
«ەگەمەن قازاقستان»
تۇركىستان وبلىسى
