«ەسكى اۆتوبۋستار قاشان اۋىستىرىلادى؟ 52, 40, 46, 70, 2, 22 سياقتى مارشرۋتتاردا ءالى كۇنگە دەيىن ەسكى اۆتوبۋستار جۇمىس ىستەيدى. ەسكى اۆتوبۋستاردىڭ ىشىندە وتە سۋىق. ەسكى قوزعالتقىشتار وتە شۋلى. حالىققا جول ءجۇرۋ اقىسىن كوتەرگەن ەكەن, سوعان سايكەس ساپالى تاسىمالدار ءۇشىن شارالار قولدانۋىڭىزدى سۇرايمىن», – دەدى كەزدەسۋگە قاتىسۋشى.
«اۆتوبۋس پاركىنىڭ 70% جاڭارتىلدى, ءبىز حالىقارالىق قارجى ينستيتۋتتارىن ارنايى تارتۋدامىز. وزدەرىڭىز كورىپ وتىرسىزدار, جاڭا اۆتوبۋستار وتە ىڭعايلى. قالعان 30%-ى – تەحنيكالىق تۇرعىسىنان تالاپقا سايكەس اۆتوبۋستار. بىراق ءبىز ولاردى بارىنشا جاڭارتۋ ءۇشىن جۇمىس ىستەيتىن بولامىز. ءتيىستى قارجى ينستيتۋتتارى مەن قۇرالدارى بار, اۆتوبۋستار سانىن دا, رەيستەردىڭ جيىلىگىن دا ارتتىرامىز», – دەپ جاۋاپ بەردى اكىم.
باقىت سۇلتانوۆتىڭ ايتۋىنشا, قوعامدىق كولىك جۇيەسىنە قىزمەت كورسەتۋ ساپاسىنا قاتىستى iKomek ارقىلى كوپتەگەن شاعىم كەلىپ تۇسۋدە.
«مەن بارلىق اۋدان اكىمدەرىنە اۆتوبۋستاردىڭ ايالدامالارعا قاتىناۋىن, ايالدامالاردا «بايبالامنىڭ» بولماۋىن, اپاتتى جاعداي تۋعىزباۋىن باقىلاۋدى تاپسىردىم. قىزمەت كورسەتۋ مەن اۆتوبۋستاردىڭ ساپاسى, رەيستەر جيىلىگى ەرەكشە باقىلاۋدا. جاقىن ارادا ونىڭ كوز الدىڭىزدا قالاي جاقساراتىنىن كورەسىزدەر», – دەدى قالا اكىمى.
بۇدان بۇرىن باقىت سۇلتانوۆ ءوز سوزىندە جاقىندا 80 گاز اۆتوبۋسىن ساتىپ الۋ جوسپارلانعانىن, پيلوتتىق رەجىمدە ەلەكتروبۋس ىسكە قوسىلعانىن حابارلاعان بولاتىن.
