بىرلىك دەگەن ۇلى كۇش
سەنبى, 19 مامىر 2012 8:35
ەلىمىزدە تۇراتىن ۇلتتار مەن ۇلىستار وكىلدەرىنىڭ باسىن قوسقان قازاقستان حالقى اسسامبلەياسىنىڭ ءحىح سەسسياسى «قازاقستاندىق جول: تۇراقتىلىق, بىرلىك, جاڭعىرتۋ» تاقىرىبىندا ءوتتى. وندا مەملەكەت باسشىسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆ ءسوز سويلەپ, جاڭارۋ كەزەڭىنىڭ باستى قۇندىلىقتارى مەن الەۋمەتتىك, ەكونوميكالىق دامۋ قادامدارىن تاعى ءبىر سارالاپ بەردى. ەتنوسارالىق, كونفەسسياارالىق تاتۋلىققا, قوعام بىرلىگىن قامتاماسىز ەتۋگە ۇلكەن ۇلەس قوسىپ كەلە جاتقان ساياسي ينستيتۋت الدىنا تىڭ مىندەتتەر جۇكتەدى.
سەنبى, 19 مامىر 2012 8:35
ەلىمىزدە تۇراتىن ۇلتتار مەن ۇلىستار وكىلدەرىنىڭ باسىن قوسقان قازاقستان حالقى اسسامبلەياسىنىڭ ءحىح سەسسياسى «قازاقستاندىق جول: تۇراقتىلىق, بىرلىك, جاڭعىرتۋ» تاقىرىبىندا ءوتتى. وندا مەملەكەت باسشىسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆ ءسوز سويلەپ, جاڭارۋ كەزەڭىنىڭ باستى قۇندىلىقتارى مەن الەۋمەتتىك, ەكونوميكالىق دامۋ قادامدارىن تاعى ءبىر سارالاپ بەردى. ەتنوسارالىق, كونفەسسياارالىق تاتۋلىققا, قوعام بىرلىگىن قامتاماسىز ەتۋگە ۇلكەن ۇلەس قوسىپ كەلە جاتقان ساياسي ينستيتۋت الدىنا تىڭ مىندەتتەر جۇكتەدى. «قازاقستاندىق تولەرانتتىلىقتى نىعايتۋ – ءبارىنەن بۇرىن, قازاقستان حالقى اسسامبلەياسىن نىعايتۋ مەن دامىتۋ. بىزگە اسسامبلەيانىڭ وڭىرلەردەگى جۇمىسىن ساپالىق تۇرعىدا كۇشەيتۋ قاجەت. ولاردا تاجىريبەلى جانە بەدەلدى كادرلار جۇمىس ىستەۋى كەرەك», دەپ اتاپ كورسەتتى ەلباسى.
وبلىستىق قازاقستان حالقى اسسامبلەياسىنىڭ XVII سەسسياسىن ۇيىمداستىرۋشىلار پرەزيدەنتتىڭ تالابىن جان-جاقتى ەسكەرگەنى بايقالدى. وبلىس اكىمى, وبلىستىق قازاقستان حالقى اسسامبلەيانىڭ توراعاسى سەرىك ءبىلالوۆ ءوز بايانداماسىنا بىرلىكتىڭ بەرەكەلى بەسىگىنە اينالعان, ءالىمساقتان قالىپتاسقان وڭىرلىك ۇلتارالىق تاتۋلىق پەن دوستىقتىڭ تامىرلى تاجىريبەلەرىن ارقاۋ ەتە وتىرىپ, تۇراقتىلىق, بىرلىك, جاڭعىرتۋ ۇعىمدارىن ۇندەستىرۋ, ۇيلەستىرۋ, مەملەكەتىمىزدىڭ تىرەگى سانالاتىن قاسيەتتى قۇندىلىقتاردى ورنىقتىرۋ ماسەلەلەرىنە كەڭىنەن توقتالىپ ءوتتى. وبلىستا ەكونوميكالىق, الەۋمەتتىك سالالار بويىنشا اتقارىلىپ جاتقان اۋقىمدى شارالار مەن ۇدەمەلى ۇدەرىستەردى تىلگە تيەك ەتتى. يندۋستريالاندىرۋ كارتاسى اياسىندا 2014 جىلعا دەيىن 30 ينۆەستيتسيالىق جوبا جۇزەگە اساتىن بولادى. ولاردىڭ قۇنى 43 ميلليارد تەڭگەنى قۇرايدى. وسىلايشا جولداۋ قاعيداتتارىنا ەرەكشە باسىمدىق بەرىلىپ, تۇرعىنداردىڭ ءومىر ساپاسىن, تۇرمىس-تىرشىلىگىن جاقسارتۋ قاشاندا باستى مىندەت بولىپ قالا بەرەدى, دەدى ايماق باسشىسى.
جيىندا ءتىلدىڭ ۇشتۇعىرلىعى, ونىڭ ىشىندە بارشا قازاقستاندىقتاردى بىرىكتىرەتىن مەملەكەتتىك ءتىل جايى, ەلباسى ۇسىنعان مالايزيا تاجىريبەسىن كەڭىنەن پايدالانۋ توڭىرەگىندە تۇششىمدى ويلار ءوربىدى. وبلىستىق اسسامبلەيا قۇرامىنداعى “ۆيدەرگەبۋرت” نەمىس ەتنومادەني بىرلەستىگى مەن قازاقستاننىڭ ورىس, سلاۆيان جانە كازاك ۇيىمدارى جەرگىلىكتى قاۋىمداستىعىنىڭ وزگە ۇلت وكىلدەرىنە قازاق ءتىلىن ۇيرەتۋدەگى تاجىريبەسى قولداۋ تاپتى. جاستاردىڭ ءبىلىم الۋى, لايىقتى قوعامدىق جۇمىسقا ارالاسۋى, ەڭبەك ەتۋى, قولجەتىمدى باسپاناعا يە بولۋى, سپورتپەن شىنىعۋى ماسەلەلەرى حاقىندا دا كەلەلى ويلار ايتىلدى. 11 ەتنومادەني ءبىرلەستىك قۇرامىندا جاستار كلۋبتارىنىڭ قۇرىلۋى ءالى دە ازدىق ەتەدى. بۇل ورايدا “جاس وتان” جاستار قاناتىن الدا ىرگەلى ىستەر كۇتىپ تۇر.
سەسسيادا سويلەۋشىلەر ىشىندە حالىقارالىق «قازاق ءتىلى» قوعامى وبلىستىق ۇيىمىنىڭ ءتوراعاسى كارىباي مۇسىرماننىڭ ءۇنى جالىندى شىقتى. ءتىل جاناشىرى القالى كەڭەستەردە قازاقشا سويلەۋدى قالىپتى داستۇرگە اينالدىراتىن كەز جەتكەنىن, تىلدىك ورتا وسىنداي قادامداردان باستالاتىن, وبلىس اكىمى پەتروپاۆل قالاسى مەن اۋدانداردا قازاق مەكتەپتەرىنىڭ سانىن كوبەيتۋگە تاپسىرما بەرگەنىن, ەندىگى بەلسەندىلىك وزىمىزگە, الدىمەن قازاقتارعا بايلانىستى ەكەنىن ەسكە سالسا, مەملەكەتتىك ءتىلدىڭ ءمارتەبەسىن كوتەرۋگە قاتىستى ۇسىنىستاردى پەتروپاۆل قالالىق ارداگەرلەر كەڭەسىنىڭ ءتوراعاسى گريگوري كۋحار, №17 ۇلتتىق وركەندەۋ مەكتەپ-كەشەنىنىڭ ارميان ءتىلىنىڭ مۇعالىمى سيلۆا اسلانيان دا قۋاتتادى. ازەربايجان ەتنومادەني بىرلەستىگى جانىنداعى جاستار كلۋبىنىڭ جەتەكشىسى تامام مامەدوۆا جاستاردى مەملەكەتتىك ءتىلدى مەڭگەرۋگە ۇندەدى. پارلامەنت ءماجىلىسىنىڭ دەپۋتاتى ەگور كاپپەلدىڭ ءسوزى ەلباسى تاپسىرمالارىن ورىنداۋ بارشامىزدىڭ مىندەتىمىز دەگەن پىكىرلەرمەن ساباقتاستى.
سەسسيادان كەيىن بىرقاتار ازاماتتار پرەزيدەنتتىڭ جارلىعىنا سايكەس “قازاقستان حالقى اسسامبلەياسىنىڭ قوعامدىق ء“بىرلىك” التىن مەدالىمەن ماراپاتتالدى. العىس حاتتار تابىس ەتىلدى. سەسسياعا قاتىسۋشىلار وبلىس تۇرعىندارىنا ارناپ ۇندەۋ قابىلدادى.
وبلىستىق قازاقستان حالقى اسسامبلەياسى توراعاسىنىڭ ورىنباسارى بولىپ “ۆيدەرگەبۋرت” نەمىس ەتنومادەني بىرلەستىگىنىڭ ءتورايىمى ەلۆيرا كوۆزەل سايلاندى.
ءومىر ەسقالي,
“ەگەمەن قازاقستان”.
سولتۇستىك قازاقستان وبلىسى.
