باقىتتى شاڭىراق اياسىندا
سەنبى, 19 مامىر 2012 8:35
دالانى جايناتىپ, قۇستاردى سايراتقان كوگىلدىر كوكتەممەن ءار ادامنىڭ مەرەيىن اسقاقتاتاتىن, قۋانىشقا بولەيتىن, پەيىل-نيەتتەرىن بىرىكتىرەتىن مەرەكەلەر دە بىرگە كەلەدى. وسى مەزگىلدە كوكتەن التىن كۇن شاپاق شاشسا, حالىق تا دۋماندى ءساتتى اسقاق رۋحپەن وتكىزىپ, شات-شادىمان بولاتىنى بار. ارينە, وعان – ەلىمىزدەگى بەيبىتشىلىك پەن تىنىشتىق, ەتنوستار اراسىنداعى جىبەك جىپتەي جالعاسقان ءوزارا دوستىق پەن ىنتىماق التىن ارقاۋ.
سەنبى, 19 مامىر 2012 8:35
دالانى جايناتىپ, قۇستاردى سايراتقان كوگىلدىر كوكتەممەن ءار ادامنىڭ مەرەيىن اسقاقتاتاتىن, قۋانىشقا بولەيتىن, پەيىل-نيەتتەرىن بىرىكتىرەتىن مەرەكەلەر دە بىرگە كەلەدى. وسى مەزگىلدە كوكتەن التىن كۇن شاپاق شاشسا, حالىق تا دۋماندى ءساتتى اسقاق رۋحپەن وتكىزىپ, شات-شادىمان بولاتىنى بار. ارينە, وعان – ەلىمىزدەگى بەيبىتشىلىك پەن تىنىشتىق, ەتنوستار اراسىنداعى جىبەك جىپتەي جالعاسقان ءوزارا دوستىق پەن ىنتىماق التىن ارقاۋ.
قازاقستان حالقىنىڭ بىرلىگى كۇنىن جەتىسۋلىقتار دا جىل سايىن قۋانىشپەن قارسى الاتىن ءداستۇر بار. سولاردىڭ قاتارىندا كوكسۋ اۋدانىندا تۇراتىن ازەربايجان ۇلتىنىڭ وكىلدەرى – كۋليەۆتەر وتباسى سوناۋ 1930-شى جىلدارى جەر اۋدارىلىپ كەلگەندەردىڭ ءبىرى. ەلىمىز ولار ءۇشىن قۇتتى قونىسقا اينالىپ, بىرنەشە ۇرپاق الماسىپ, وتباسى ءوسىپ-ءوندى. ولار حالقىمىزدىڭ قوناقجاي, دوستىق پەيىلىنە ساي اركەز ەگەمەن ەلدىڭ تىلەۋىن تىلەپ, بولاشاعى بۇگىننەن دە جارقىن بولۋىنا اتسالىسىپ كەلەدى.
وتان – وتباسىنان باستالادى. مەملەكەتتە بەرەكە-بىرلىك بولۋى ءۇشىن ءاربىر وتباسىندا تاتۋلىق, تۇسىنىستىك بولۋى قاجەت دەپ ەسەپتەيدى. ولار كورشىلەرىمەن تاتۋ, وكپەلەسكەن كەزدەرى بولماپتى. ماڭايىندا قازاق, ورىس, نەمىس, تاتار ۇلتىنىڭ وكىلدەرى تۇرادى. داستارقاندارى جينالماي, ءبىر-ءبىرىن قۇتتىقتاپ, ەلدەگى ىنتىماققا سىنا تۇسپەسىن دەپ تىلەيدى.
– قازاقستاندا ومىرگە كەلىپ, وسىنداعى بەيبىت كۇندەردى باستان كەشىرگەنىمە قۋانامىن. الەمدەگى ەرتەڭىنە سەنىمدى, تۇراقتى ەل ەكەنى انىق. بۇگىندە الەمنىڭ ءبىر جەرىندە سوعىس, ءبىر جەرىندە ءتوڭكەرىس ورىن الىپ جاتىر. بىزدە تىنىشتىق. ەلباسى نۇرسۇلتان نازارباەۆ ەگەمەن ەلىمىزدەگى بەيبىتشىلىكتى ساقتاپ, ۇلتىنا قاراماستان, ءبىر شاڭىراق استىنا بىرىكتىرىپ, تەڭ قۇقىلى كۇن كەشۋدەمىز, دەيدى گۇلحارا كۋليەۆا.
وتكەنسىز بۇگىنگىنى بولجاي المايمىز. بۇل اكسيومانى كۋليەۆتەر وتباسى جاقسى تۇسىنەدى. اتا-بابالارىن اش-جالاڭاش كەلگەندە قۇشاق جايا قارسى العان قازاقتاردىڭ قوناقجايلىلىعىن ءالى دە ەرتەگىدەي ايتادى ۇلكەندەر. اعا بۋىن «قازاق حالقىنان اينالايىن» دەۋى وسىدان. بۇل اۋلەتتىڭ ءار مۇشەسى تاريحي وتان, ەكىنشى وتان دەگەن ءسوز تىركەستەرىن مۇلدە قولدانبايدى. ولار ادامدا ءبىر عانا وتان بولۋى كەرەك, دەپ تۇجىرىمدايدى. ويتكەنى, ءوسىپ-ونگەن جەرى قازاقستاننىڭ بولاشاعىنىڭ بەرىك بولۋىن قالايدى. ەلدىڭ وركەندەۋىنە وزدەرى دە ۇلەس قوسۋعا ۇمتىلىپ, ءبىلىم الۋدا.
– قازاقستان – مەنىڭ وتانىم. ونى جۇرەگىمدە ماڭگى ساقتايمىن. وسى حالىقتىڭ كەڭدىگى ارقاسىندا مەنىڭ اتالارىم وسى مەكەنگە تۇراقتادى. دەمەك, مەن ءۇشىن قازاقتان اسقان ۇلت, بۇل جەردەن ارتىق مەكەن جوق. مىنە, ءۇي سالدىق, اعاش وتىرعىزدىق. ءبىلىم الدىق. قىزمەتىمىز دە بار. ەندى ەل دامۋى ءۇشىن تەر توگىپ, ەلباسىنىڭ ساياساتىن جۇزەگە اسىرۋعا ۇلەس قوسامىز, – دەيدى ساعيب كۋليەۆ اڭگىمەگە ارالاسىپ.
قانداي قۋانىشتا بولماسىن كۋليەۆتەر تۇگەل قاراشاڭىراققا جينالادى. ءبىرىن ءبىرى قۇتتىقتاپ, ۇلكەندەر بۇگىنگى تىرلىكتەرىنە ءشۇكىرلىك جاسايدى. جاستارعا ەل ىشىندەگى اۋىزبىرلىك پەن ىنتىماقتى ناسيحاتتاۋعا كەڭەس بەرەدى. مۇنداي ساياسي-ەكونوميكالىق تۇراقتى ەل جوق, دەگەندى ءجيى ەسكە سالادى.
كوكسۋ اۋدانىندا 2000-نان اسا ازەربايجان ۇلتىنىڭ وكىلى تۇرسا, ولاردىڭ كوڭىلىندە ەلگە, جەرگە دەگەن رياسىز كوڭىلدى كورەسىڭ. ولار وزگە ۇلت وكىلدەرىمەن قاتار تاتۋ-ءتاتتى عۇمىر كەشۋدە.
كۇمىسجان بايجان,
«ەگەمەن قازاقستان».
الماتى وبلىسى.
