تۋعان جەردى تۇلەتۋ – اركىمنىڭ ازاماتتىق پارىزى
بەيسەنبى, 26 ءساۋىر 2012 7:17
اقتوبە وبلىسىنىڭ اكىمى ارحيمەد مۇحامبەتوۆ جىل باسىندا ءوڭىردىڭ الەۋمەتتىك ءماسەلەلەرىن شەشۋدىڭ سونى جولدارىن ىزدەستىرۋ قاجەتتىگىن العا تارتا كەلىپ, وسىعان بايلانىستى ءوز ءىسىن اشىپ, جاعدايىن تۇزەگەن, ءار جەردە ءجۇرگەن قارجىلى كاسىپكەرلەردى, قالتالى ازاماتتاردى وزدەرى وسكەن اۋىلدارعا قولداۋ كورسەتۋگە شاقىردى. وسىلاي 2012-2015 جىلدارعا ارنالعان «كوركەيە بەر, تۋعان جەر» وبلىستىق اكتسياسى ومىرگە جولداما العان بولاتىن.
بەيسەنبى, 26 ءساۋىر 2012 7:17
اقتوبە وبلىسىنىڭ اكىمى ارحيمەد مۇحامبەتوۆ جىل باسىندا ءوڭىردىڭ الەۋمەتتىك ءماسەلەلەرىن شەشۋدىڭ سونى جولدارىن ىزدەستىرۋ قاجەتتىگىن العا تارتا كەلىپ, وسىعان بايلانىستى ءوز ءىسىن اشىپ, جاعدايىن تۇزەگەن, ءار جەردە ءجۇرگەن قارجىلى كاسىپكەرلەردى, قالتالى ازاماتتاردى وزدەرى وسكەن اۋىلدارعا قولداۋ كورسەتۋگە شاقىردى. وسىلاي 2012-2015 جىلدارعا ارنالعان «كوركەيە بەر, تۋعان جەر» وبلىستىق اكتسياسى ومىرگە جولداما العان بولاتىن.
يگى باستاما حالىقتان كەڭ قولداۋ تاپتى. باستاما كوتەرىلگەن بويدا شالقار اۋدانىنىڭ ىسكەر ازاماتتارى باسقوسىپ, وزدەرى تۋىپ-وسكەن تۋعان اۋىلدارىندا الەۋمەتتىك نىسانداردى جاڭعىرتۋعا جانە جاڭادان سالۋعا ۇلەس قوساتىندىقتارىن ءبىلدىرىپ, ۇيىمشىلدىقتىڭ ۇلگىسىن تانىتتى. «كوركەيە بەر, تۋعان جەر» اكتسياسىن وتكىزۋ باستاماسىن ىلە-شالا مۇعالجار, ىرعىز اۋداندارى دا قولداي جونەلدى. قالعان اۋدانداردا وسى باعىتتا جۇمىستار جۇرگىزۋدە.
جاقىندا اكتسيانى قولداۋعا بايلانىستى العا اۋدانى اكىمدىگى ۇيىتقى بولعان ۇلاعاتتى شاراعا قاتىسۋدىڭ ءساتى ءتۇستى. عازيزا جۇبانوۆا اتىنداعى وبلىستىق فيلارمونيادا وتكەن بۇل شاراعا وسى ءوڭىردەن تۇلەگەن ىسكەر ازاماتتار مەن قارجىلى كاسىپكەرلەر شاقىرىلىپتى. اۋەلى جينالعاندارعا اۋداننىڭ تاۋەلسىزدىك العان كەزدەگى جانە بۇگىنگى ەكونوميكالىق-الەۋمەتتىك جاعدايى سالىستىرىلا باياندالاتىن بەينەفيلم كورسەتىلدى. سودان كەيىن باستالعان اۋدان كوركەمونەرپازدارى كونتسەرتىنىڭ شىمىلدىعى احمەت جۇبانوۆتىڭ «بي كۇيى» جانە قۇرمانعازى بابامىزدىڭ «اداي» كۇيلەرىمەن اشىلدى.
ساحناعا كوتەرىلگەن اۋدان اكىمى ايبەك ساعيەۆ جەرلەستەرىنە جىلى لەبىزىن, سالماقتى ءسوزىن ارنادى. ول اۋىل – ءاركىمنىڭ التىن بەسىگى, تۋعان جەر تۇعىرى ەكەنىنە توقتالا كەلىپ, «كوپ كوتەرگەن جۇك جەڭىل» بولاتىنىن جەتكىزدى. سوندىقتان, وسى وڭىردەن ءتۇلەپ-ۇشقان كاسىپكەرلەر مەن باسشىلىق قىزمەتتە جۇرگەن ازاماتتاردى «كوركەيە بەر, تۋعان جەر» اكتسياسىنا ءبىر كىسىدەي ۇيىمشىلدىقپەن قاتىسۋعا ۇندەدى. سىزدەردىڭ قولداۋ-كومەكتەرىڭىزبەن اۋىلدارداعى الەۋمەتتىك نىسانداردى جاڭعىرتۋ مەن جاڭادان سالۋدىڭ قىرۋار شارۋالارىن بىرلەسىپ, يىقتاسا ءجۇرىپ اتقاراتىنىمىزعا سەنىمدىمىن, دەپ قورىتتى ويىن اۋدان باسشىسى.
ىسكەر ازاماتتاردىڭ اراسىنان ءسوز العان «رەيىمقۇل» جشس-ءنىڭ ديرەكتورى سامات قالدىعۇلوۆ بۇل اكتسيانى اتاقونىس, تۋعان جەردى كوركەيتۋدىڭ ءۇش جىلدىق باعدارلاماسى رەتىندە باعالاي كەلىپ, كەسىمدى وي, كەسەك تۇجىرىمىن ءمالىم ەتتى. ول ءوزى تۋىپ-وسكەن قارابۇلاق اۋىلدىق وكرۋگىنە قاراستى امانگەلدى اۋىلىنا جالپى الاڭى 420 شارشى مەتر مادەنيەت ءۇيىن جانە اۋماعى 1 گەكتار ساياباق سالىپ بەرەمىن دەگەندە زالداعىلار دۋ قول سوعىپ, قوشەمەت كورسەتتى.
فويەگە قويىلعان ۇسىنىستار كىتابىنا «كوركەيە بەر, تۋعان جەر» اكتسياسىن قولداۋعا جانە ونى وتكىزۋگە بايلانىستى وسى شاراعا قاتىسقان العالىق ىسكەر ازاماتتار مەن قالتالى كاسىپكەرلەر ءوز وي-پىكىرلەرىن قالدىرىپ جاتتى.
ساتىبالدى ءساۋىرباي.
اقتوبە وبلىسى.
