ماقسات – جاۋىنگەرلىك ازىرلىك دەڭگەيىن كوتەرۋ
سارسەنبى, 29 اقپان 2012 7:43
بيىل قازاقستان رەسپۋبليكاسى قارۋلى كۇشتەرىنىڭ قۇرىلعانىنا 20 جىل تولىپ وتىر. تاۋەلسىزدىكتىڭ ەلەڭ-الاڭىندا ەڭسە كوتەرگەن قازاق اسكەرى وسى جىلدار ارالىعىندا قۋاتتى ەلدىڭ قۇرىش قايراتىنا اينالدى. قارۋلى كۇشتەردىڭ الدىندا العاشقى كۇننەن جاۋىنگەرلىك دايىندىقتى نىعايتۋ مەن ونى ودان ءارى جەتىلدىرۋ تاپسىرمالارى تۇردى. قازاقستان حالقى بۇگىنگى كۇنى وزدەرىنىڭ قاۋىپسىزدىگى بەرىك قولدا ەكەنىنە سەنىمدى.
سارسەنبى, 29 اقپان 2012 7:43
بيىل قازاقستان رەسپۋبليكاسى قارۋلى كۇشتەرىنىڭ قۇرىلعانىنا 20 جىل تولىپ وتىر. تاۋەلسىزدىكتىڭ ەلەڭ-الاڭىندا ەڭسە كوتەرگەن قازاق اسكەرى وسى جىلدار ارالىعىندا قۋاتتى ەلدىڭ قۇرىش قايراتىنا اينالدى. قارۋلى كۇشتەردىڭ الدىندا العاشقى كۇننەن جاۋىنگەرلىك دايىندىقتى نىعايتۋ مەن ونى ودان ءارى جەتىلدىرۋ تاپسىرمالارى تۇردى. قازاقستان حالقى بۇگىنگى كۇنى وزدەرىنىڭ قاۋىپسىزدىگى بەرىك قولدا ەكەنىنە سەنىمدى.
قازاقستان زاماناۋي, جيناقى دا ۇتقىر, جاۋىنگەرلىك دايىندىق دەڭگەيى جوعارى ارميا قۇرۋ جولىن تاڭدادى. Cول سەبەپتى دە قارۋلى كۇشتەردىڭ جاۋىنگەرلىك ازىرلىك دەڭگەيىن كوتەرۋ مەملەكەتتىڭ اسكەري قاۋىپسىزدىك سالاسىنداعى باستى تاپسىرمالارىنىڭ ءبىرى بولىپ قالا بەرمەك.
الەمدىك قوعامداستىق سوڭعى جىلدارى ايتارلىقتاي اۋىرتپالىقتاردى باستان كەشىردى. بۇل مەملەكەتتىڭ ۇلتتىق قاۋىپسىزدىككە تونەتىن قاتەرلەرگە دەر كەزىندە توتەپ بەرىپ, وعان سىندارلى جاۋاپ بەرۋ سىناعىنا دايىندىق كەزەڭى, ەل باسشىلارى ءۇشىن داعدارىس جاعدايىندا بەلسەندىلىك پەن توزىمدىلىك قابىلەتىن كورسەتۋگە ارنالعان سىناق بولدى. قازاقستان بۇل سىناقتان دا سۇرىنبەي ءوتىپ, پروگرەستى دامۋدىڭ داڭعىل جولىنا ءتۇستى.
قازاقستان رەسپۋبليكاسى الەمدەگى قاۋىپسىزدىك پەن تۇراقتىلىق ساياساتىن ۇدايى قولدايتىن, سەنىم مەن قاۋىپسىزدىك شارالارىن نىعايتۋدى قالايتىن, جاپپاي قىرىپ-جويۋ قارۋلارىن شەكتەيتىن جانە ونى تاراتپاۋ جونىندەگى كەلىسىمدەردى ءتيىمدى ورىنداۋدى باقىلاۋعا ايرىقشا ماڭىز بەرەتىن مەملەكەت رەتىندە تانىلدى.
ەل باسشىلىعى بارلىق كۇش-جىگەرىن شەكارا پەريمەترى بويىنشا قاۋىپسىزدىك بەلدەۋىن قۇرۋعا, ۇجىمدىق قاۋىپسىزدىكتىڭ ايماقتىق جۇيەسى نەگىزدەرىن جاساۋعا, يادرولىق قاتەردى ازايتۋعا جۇمىلدىردى.
بارشاعا بەلگىلى, كەڭەس وداعى كۇيرەگەننەن كەيىن ءبىزدىڭ ەلىمىزدە قۋاتى جاعىنان الەمدەگى ءتورتىنشى يادرولىق مۇرا قالدى. سەمەي پوليگونىن جابۋ جانە يادرولىق قارۋدان باس تارتۋ تاۋەلسىز قازاقستاننىڭ ادامزاتقا بەرگەن العاشقى يگىلىگى بولدى. ءبىزدىڭ ەلىمىز الەمدەگى اۋقىمى جونىنەن ءتورتىنشى يادرولىق ارسەنالدان ەرىكتى تۇردە باس تارتتى. الەم الدىنداعى جاћاندىق جاۋاپكەرشىلىگىمىزدى سەزىنە وتىرىپ, مەملەكەتىمىز, ءومىردىڭ ءوزى كورسەتىپ بەرگەنىندەي, بىردەن-ءبىر دۇرىس شەشىم قابىلدادى. قازاقستان تمد-دا العاشقىلاردىڭ ءبىرى بولىپ يادرولىق قارۋدى تاراتپاۋ تۋرالى شارتقا جانە يادرولىق سىناقتارعا بارشانى قامتيتىن تىيىم سالۋ تۋرالى شارتقا قوسىلدى. ەلىمىزدىڭ اۋماعىنان سوڭعى يادرولىق وقتۇمسىقتار ءبىرجولاتا اكەتىلدى جانە الەمنىڭ يادرولىق دەرجاۆالارى ءبىزدىڭ ەلىمىزدىڭ قاۋىپسىزدىگىنە كەپىلدىك بەرەتىن مەموراندۋمعا قول قويدى. قازاقستاننىڭ باستاماسى بويىنشا 2006 جىلى سەمەيدە ورتالىق ازيادا يادرولىق قارۋدان ادا ايماق قۇرۋ تۋرالى شارتقا قول قويىلدى. وسىناۋ تاريحي اكتىلەر حالىقارالىق قوعامداستىققا قازاق ەلىنىڭ كۇش قولدانۋ مەن اسكەري قاتەردەن ادا بەيبىتشىلىكتى جاقتايتىنىن كورسەتىپ بەردى.
سول كەزدەگى ءبىزدىڭ ەليتانىڭ ەلەۋلى بولىگى دە يادرولىق الەۋەتتى ساقتاپ قالۋعا بەيىلدى بولدى, ولاردىڭ پىكىرىنشە, بۇل بۇعان دەيىن ەشكىمگە بەلگىسىز ەل ءاپ-ساتتە يادرولىق دەرجاۆالار قاتارىنا قوسىلار ەدى. وسىعان قاراماستان, ادامزاتتى جاپپاي قىرىپ-جوياتىن جويقىن قارۋدان ءبىرجولاتا باس تارتقان ەلىمىز بەيبىتشىلىكتىڭ بەلدەۋىنە اينالدى. ەلىمىز الەمنىڭ الپاۋىت مەملەكەتتەرىمەن تەرەزەسى تەڭ جاعدايدا ارىپتەستىك قارىم-قاتىناس ورناتتى. كەتكەنىمىز كەلدى, كەمىسىمىز تولدى, ۇلتتىق قۇندىلىقتارىمىز ۇلىقتالا باستادى.
قازاقستان پرەزيدەنتى نۇرسۇلتان نازارباەۆ ۆاشينگتوندا 2010 جىلى ساۋىردە يادرولىق قاۋىپسىزدىك جونىندەگى سامميتتە يادرولىق قارۋلاردى جالپىعا بىردەي كولبەۋ جانە تىگىنەن تاراتپاۋ تۋرالى جاڭا امبەباپ شارت جاساۋ تۋرالى باستاما كوتەرىپ, بىرىككەن ۇلتتار ۇيىمىن يادروسىز الەمنىڭ جالپىعا بىردەي دەكلاراتسياسىن قابىلداۋعا شاقىردى.
ۆاشينگتوندا وتكەن وسى يادرولىق قاۋىپسىزدىك جونىندەگى جاھاندىق سامميتتە حالىقارالىق قوعامداستىق قازاقستاننىڭ جاسامپاز ميسسياسىن مويىنداپ, ەلباسىنا بەيبىتشىلىك جانە الدىن الۋ ديپلوماتياسى سىيلىعىنىڭ تابىس ەتىلۋى قازاقستاننىڭ العاشقى كۇننەن-اق دۇرىس جولدى تاڭداعانىن دالەلدەسە كەرەك.
ەلباسى بيىلعى قازاقستان حالقىنا جولداۋىندا دا يادروسىز الەمنىڭ جالپىعا بىردەي دەكلاراتسياسىن قابىلداۋ ماسەلەسىن تاعى دا اتاپ ءوتتى. قازاقستاننىڭ بۇل باستاماسى اعىمداعى جىلعى ناۋرىز ايىندا يادرولىق قاۋىپسىزدىك ءماسەلەلەرى بويىنشا سەۋلدە وتەتىن عالامدىق سامميتتە ودان ءارى ناقتىلانىپ, ماقۇلدانارى انىق.
قازىرگى قالىپتاسىپ وتىرعان حالىقارالىق جاعدايدا جاپپاي قىرىپ-جويۋ قارۋلارىن تاراتپاۋ, قارۋ-جاراقتى باقىلاۋ جانە قارۋسىزدانۋ ماسەلەلەرى مەملەكەتتىك قاۋىپسىزدىكتىڭ قۇرامداس بولىگى بولىپ وتىر. قازاقستان رەسپۋبليكاسى سەنىم مەن قاۋىپسىزدىك شارالارىن نىعايتۋ جانە قارۋسىزدانۋ جولى ارقىلى سوعىس قاۋپىن سەيىلتۋ شارالارىنا بەلسەنە قاتىسىپ كەلەدى.
سونىمەن قاتار, ءبىزدىڭ ەلىمىز قاجەتتى قورعانىس قابىلەتىن ساقتاي وتىرىپ, ءوز قارۋ-جاراعىن قىسقارتۋعا قاتىستى دا بىرقاتار شارالار قابىلدادى.
قازاقستان رەسپۋبليكاسىنىڭ قورعانىس مينيسترلىگى ءوز قىزمەتى شەڭبەرىندە قارۋ-جاراقتى باقىلاۋ سالاسىنداعى بىرنەشە حالىقارالىق شارتتار مەن كەلىسىمدەرگە قاتىسۋشى بولىپ تابىلادى. سولاردىڭ ءبىرى ۇجىمدىق قاۋىپسىزدىك تۋرالى شارت ۇيىمى (ۇقشۇ) – تمد مەملەكەتتەرىنىڭ ۇجىمدىق قاۋىپسىزدىك شارتى نەگىزىندە قۇرىلىپ, 1992 جىلى 15 مامىردا قول قويىلعان اسكەري ساياسي وداق.
ۇقشۇ-عا قاتىسۋشى مەملەكەتتەر: ارمەنيا رەسپۋبليكاسى, بەلارۋس رەسپۋبليكاسى, قازاقستان رەسپۋبليكاسى, قىرعىز رەسپۋبليكاسى, رەسەي فەدەراتسياسى, تاجىكستان رەسپۋبليكاسى. ماقساتى – ۇجىمدىق قاۋىپسىزدىك تۋرالى شارت ۇيىمى ۇجىمدىق كۇشتەرىنىڭ جەدەل ارەكەت ەتۋ جاساقتارىنىڭ جاۋىنگەرلىك ءىس-قيمىلداردى جۇرگىزۋ دايىندىعى مەن قارۋلى قاقتىعىستاردى وقشاۋلاۋداعى ءتاجىريبەلەرى مەن شەبەرلىكتەرىن شىڭداۋ. ءبىر ءسوزبەن ايتقاندا, تەررورعا قارسى تويتارىس بەرۋ.
ۇلتتىق قاۋىپسىزدىگىمىزدى نىعايتۋدىڭ بولاشاقتاعى باسىم باعىتتارىنىڭ ءبىرى اسكەري سالادا حالىقارالىق ىنتىماقتاستىقتى دامىتۋ بولىپ تابىلادى. بۇل رەتتە ۇقشۇ-نىڭ ءوڭىرلىك حالىقارالىق ۇيىمدار – شىۇ, ەقىۇ-مەن حالىقارالىق ىنتىماقتاستىعىنىڭ ماڭىزى ارتا تۇسۋدە. مۇنداعى باستى ءمىندەتتەردىڭ ءبىرى قازىرگى زامانعى قاۋىپ-قاتەرگە, تەرروريزمگە, ەكسترەميزمگە, زاڭسىز ەسىرتكى مەن قارۋ-جاراق اينالىمىنا قارسى تۇراتىن جۇيە قالىپتاستىرۋ بولىپ تابىلادى.
ەۋروپاداعى قاۋىپسىزدىك جانە ىنتىماقتاستىق ۇيىمى (ەقىۇ) ەۋروپالىق كەڭىستىكتە داعدىلى قارۋ-جاراق تۇرلەرىن شەكتەۋ ۇدەرىستەرىندە جەتەكشى ءرول اتقارادى. ۇيىمنىڭ تىكەلەي ىقپال ەتۋىمەن قارۋ-جاراققا باقىلاۋ جاساۋعا باعىتتالعان ەۋروپاداعى داعدىلى قارۋلى كۇشتەر تۋرالى شارتقا جانە قاۋىپسىزدىك پەن سەنىم شارالارىن نىعايتۋ جونىندەگى ۆەنا كەلىسسوزدەر قۇجاتىنا قول قويىلدى. بۇل قۇجاتتار ۇيىمنىڭ قارۋ-جاراققا باقىلاۋ ورناتۋ ۇدەرىسىندەگى ەڭ باستى جەتىستىگى بولىپ تابىلادى. بۇگىندە ۇيىم قول جەتكىزىلگەن وسى كەلىسىم-شارتتاردى جەتىلدىرىپ, ولاردا كورسەتىلگەن ماسەلەلەردى ءجۇزەگە اسىرۋدا تۇراقتى جۇمىستار جۇرگىزىلىپ كەلەدى.
قازاقستان ەقىۇ-نىڭ بەلدى دە بەلسەندى مۇشەسى رەتىندە قارۋ-جاراق تۇرلەرىن شەكتەۋ جانە ولاردى باقىلاۋ ماسەلەسىن باستى نازاردا ۇستايدى. ويتكەنى, ەلىمىز باستاپقى كەزدە-اق حالىقارالىق قاۋىپسىزدىكتى قامتاماسىز ەتۋ, جاپپاي قىرىپ-جوياتىن قارۋدى تاراتپاۋ, قارۋسىزدانۋ جانە قارۋ-جاراق ءتۇرلەرىنە باقىلاۋ ورناتۋ وڭىرلىك جانە ۇلتتىق قاۋىپسىزدىكتى نىعايتۋدىڭ نەگىزگى قۇرالى ەكەندىگىن مالىمدەگەن بولاتىن. سونىمەن قاتار, قازاقستان ەرەكشە ماڭىزدى قۇجاتتار – يادرولىق قارۋدى تاراتپاۋ تۋرالى, يادرولىق سىناقتارعا تىيىم سالۋ تۋرالى, ەۋروپاداعى داعدىلى قارۋلى كۇشتەر تۋرالى, ستراتەگيالىق شابۋىل قارۋلارىن قىسقارتۋ تۋرالى شارتتاردىڭ, باسقا دا حالىقارالىق كەلىسىمدەردىڭ بەلسەندى قاتىسۋشىسى. ەلىمىز بۇگىندە ەقىۇ-نىڭ ءۇش ولشەمىنىڭ ءبىرى – ءاسكەري-ساياسي ولشەم اياسىندا, سونداي-اق اتالعان شارتتاردىڭ, باسقا دا حالىقارالىق قۇجاتتاردىڭ نەگىزىندە قاۋىپسىزدىك پەن سەنىم شارالارىن نىعايتۋ جانە قارۋ-جاراققا باقىلاۋ جاساۋ سالالارىندا بەلسەندى جۇمىستار جۇرگىزىپ كەلەدى.
قازاقستاننىڭ ەقىۇ-مەن قارۋ-جاراقتى باقىلاۋ سالاسىنداعى ىنتىماقتاستىعىنىڭ تاعى ءبىر باعىتى – 1999 جىلى قابىلدانعان قاۋىپسىزدىك جانە سەنىم شارالارىن نىعايتۋ جونىندەگى كەلىسسوزدەر تۋرالى ۆەنا قۇجاتى بولىپ تابىلادى. جالپى, ءبىزدىڭ ەلىمىز قارۋ-جاراقتى باقىلاۋعا بايلانىستى حالىقارالىق رەجىمدەردىڭ ورىندالۋىنا ەرەكشە نازار اۋدارىپ كەلەدى. ونىڭ ءتۇپ نەگىزىندە تاۋەلسىز قازاقستاننىڭ اسكەري-ساياسي مۇددەلەرىن ىلگەرىلەتۋ, وڭىرلىك جانە حالىقارالىق قاۋىپسىزدىكتى نىعايتۋ ماسەلەلەرى جاتىر. قازاقستان رەسپۋبليكاسى ۆەنا قۇجاتىندا كورسەتىلگەن مىندەتتەردى ويداعىداي ورىنداپ جانە جۇزەگە اسىرىپ كەلەدى. مىسالى, ەلىمىز جىل سايىن اسكەري ۇيىمدارمەن اسكەري كۇشتەر تۋرالى, قاتىسۋشى مەملەكەتتەر اراسىنداعى نەگىزگى قارۋلار مەن تەحنيكالار جونىندە ديپلوماتيالىق ارنالار ارقىلى اقپاراتتار الماسىپ وتىرادى.
تاعى ءبىر ايتا كەتەرلىك ەڭ ماڭىزدى شارالاردىڭ ءبىرى قازاقستانمەن شەكارالاس جاتقان رەسەي, قىتاي جانە جاڭادان قۇرىلعان ورتالىق ازيا مەملەكەتتەرىمەن اۋماقتىق كەلىسىمدەر جۇرگىزىپ, شەكارا ماسەلەسىن شەشۋ بولدى. قازاقستان, قىتاي, رەسەي, قىرعىزستان جانە تاجىكستانعا شەكاراعا قاتىستى اۋماقتىق داۋلاردى وركەنيەتتى تۇردە شەشۋگە قول جەتكىزىلدى. وسىعان بايلانىستى ساياسي, ەكونوميكالىق جانە گۋمانيتارلىق سيپاتتاعى ماسەلەلەردى شەشەتىن جاڭا مەملەكەتارالىق ۇيىم قۇرىلىمىن قۇرۋ قاجەت بولدى. تۋىنداپ وتىرعان قولايلى ساياسي احۋال نەگىزىندە, سونداي-اق, حالىقارالىق تەرروريزمنىڭ كەنەتتەن كەڭ ەتەك الۋى سەبەپتى, ورتالىق ازيا اۋماعىنداعى ەلدەردى جەكەلەپ تۇراقسىزداندىرۋ قاۋپى تۋىندادى. سول سەبەپتى قىتاي, رەسەي, قازاقستان, تاجىكستان مەن قىرعىزستان 1996 جىلى «شەكارا ماڭىندا اسكەري سەنىمدى نىعايتۋ ءجونىندەگى شارالارعا» قول قويدى. بەس سەرىكتەس-مەملەكەتتىڭ تاعدىرىنداعى بۇل وقيعا شانحايدا جۇزەگە استى. سودان بەرى جاڭا مەملەكەتارالىق قۇرىلىم «شانحاي بەستىگى» اتالىپ كەتتى.
1997 جىلى ماسكەۋدە «شانحاي بەستىگىنە» مۇشە ەلدەردىڭ سامميتىندە شەكارالىق اۋداندارداعى قارۋلى كۇشتەر مەن قارۋ-جاراقتى قىسقارتۋدى تارتىپكە كەلتىرۋ تۋرالى ماڭىزدى قۇجات قابىلداندى. بۇل قۇجات «شەكارالىق اۋداندا قارۋلى كۇشتەردى ءوزارا قىسقارتۋ كەلىسىمى» دەپ اتالادى. كەلىسىمنىڭ قابىلدانۋى مەن «شانحاي بەستىگى» ەلدەرىنىڭ ءبىر-بىرىمەن جاقىنداسا ءتۇسۋىنە, ءبىرىنشى كەزەكتە, شەكارالىق ايماقتاردىڭ قاۋىپسىزدىگىنە قاتەر ءتونۋى ءماجبۇر ەتتى.
ماڭىزدى ەكى قۇجات قابىلدانعان سوڭ, قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ باستاماسى بويىنشا «شانحاي بەستىگىنە» مۇشە ەلدەردىڭ جىل سايىن بىرلەسكەن ءسامميتىن وتكىزىپ تۇرۋ كەلىسىلدى. بۇل سامميتتەر 1998 جىلى الماتىدا, 1999 جىلى بىشكەكتە, 2000 جىلى دۋشانبەدە ءوتكىزىلدى. وتكىزىلگەن سامميتتەردە ءوزارا سەنىم مەن تاتۋلىق جايلى باسا ايتىلىپ, كەيىن ول «شانحاي رۋحى» اتالىپ كەتتى. شانحاي ىنتىماقتاستىق ۇيىمىنىڭ ورگاندارىندا شەشىمدەر بارلىق ەلدەر تۇگەلدەي قارسى بولماعاندا عانا قابىلدانۋى ءتيىس.
سوڭعى كەزدەردە اتالعان ۇيىمنىڭ حالىقارالىق قاتىناستارى ەداۋىر نىعايدى. مىسالى, سولتۇستىك كورەيا, نەپال, تاۋەلسىز مەملەكەتتەر دوستاستىعى جانە ەۋرووداقتىڭ مەملەكەتتەرى, بىرىككەن ۇلتتار ۇيىمىنىڭ دامۋ باعدارلاماسى, باسقا مەملەكەتتەر مەن ۇيىمدار شىۇ ءىس-ارەكەتىنە زور ىقىلاس قويىپ وتىر.
شىۇ قازىرگى تاڭدا ءىرى ەكونوميكالىق, قارجىلىق, تەحنولوگيالىق جانە ادامي رەسۋرستارعا باي, ايتارلىقتاي يننوۆاتسيالىق الەۋەتى بار قارقىندى دامىپ كەلە جاتقان ايماقتىق ۇيىم بولىپ ەسەپتەلەدى. قازاقستان «شانحاي ۇدەرىسىنىڭ» بەلسەندى قاتىسۋشىسى بولىپ تابىلادى جانە ۇيىمنىڭ ماقساتتارى مەن مىندەتتەرىن ىسكە اسىرۋعا, ونىڭ ءتيىمدىلىگىن ارتتىرۋ جانە شىۇ-نىڭ قازىرگى الەمدەگى ءرولى مەن ماڭىزىن نىعايتۋعا بارىنشا پەيىلدى.
ازياداعى ءوزارا ءىس-قيمىل جانە سەنىم شارالارى جونىندەگى كەڭەس قۇرۋ جونىندەگى باستامانى دا قازاقستان تاراپىنان 1992 جىلى بۇۇ باس اسسامبلەياسىنىڭ 47-ءشى سەسسياسىندا قازاقستان رەسپۋبليكاسىنىڭ پرەزيدەنتى ن.ءا. نازارباەۆ كوتەرگەن بولاتىن. ول ازياداعى بەيبىتشىلىكتى, قاۋىپسىزدىك پەن تۇراقتىلىقتى قامتاماسىز ەتۋگە باعىتتالعان ىنتىماقتاستىقتى نىعايتۋ جونىندەگى حالىقارالىق فورۋم بولىپ تابىلادى.
وعان مۇشە مەملەكەتتەر: ازەربايجان, اۋعانستان, باحرەين, ۆەتنام, مىسىر, ءۇندىستان, يراك, يران, يزرايل, يوردانيا, قازاقستان, كامبودجا, قىتاي, قىرعىزستان, موڭعوليا, واە, پالەستينا, پاكستان, رەسەي, تاجىكستان, تايلاند, تۇركيا, وزبەكستان, كورەيا رەسپۋبليكاسى. بايقاۋشىلار مارتەبەسىنە اقش, جاپونيا, ۋكراينا, يندونەزيا, مالايزيا, كاتار, بانگلادەش, فيليپپيندەر, سونداي-اق بۇۇ, امل جانە ەقىۇ يە.
2012 جىلى اقپان ايىندا الماتى قالاسىندا اتالعان كەڭەسكە مۇشە مەملەكەتتەر اسكەري-ديپلوماتيالىق ساراپشىلارىنىڭ ءبىرىنشى كەزدەسۋى ءوتتى. وعان كەڭەسكە مۇشە 15 مەملەكەتتىڭ سىرتقى ىستەر جانە قورعانىس مينيسترلىكتەرىنىڭ وكىلدەرى قاتىستى. اتالعان شارا اسكەري-ساياسي ولشەم بويىنشا ىنتىماقتاستىقتى دامىتۋ جانە نىعايتۋ جۇمىستارىن تاجىريبە جۇزىندە جانداندىرۋ ءجونىندەگى مەملەكەت باسشىسى نۇرسۇلتان نازارباەۆتىڭ تاپسىرمالارىن ورىنداۋ ماقساتىندا ۇيىمداستىرىلدى.
كەزدەسۋدە قازاقستان دەلەگاتسياسى كەڭەسكە مۇشە ەلدەرمەن اسكەري-ساياسي ولشەم شەڭبەرىندە كەيبىر سەنىم شارالارى بويىنشا ىنتىماقتاستىقتى باستاۋ جونىندە ۇسىنىس جاسادى.
وندا اسكەري لاۋازىمدى ادامداردىڭ ءوزارا ساپارىن ۇيىمداستىرۋ, مادەني سپورتتىق ءىس-شارالارعا شاقىرۋ, كەڭەسكە مۇشە مەملەكەتتەردىڭ قارۋ-جاراقتاردى باقىلاۋ بويىنشا حالىقارالىق شارتتارعا قاتىسۋى تۋرالى اقپارات الماسۋ جانە اسكەري ۆەدومستۆولاردى باسقاراتىن قۇرامنىڭ ءومىربايانى جونىندەگى مالىمەتتەرمەن الماسۋ ۇسىنىلدى.
ىنتىماقتاستىقتىڭ بۇل باعىتى 2004 جىلعى كەڭەسكە مۇشە مەملەكەتتەردىڭ سىرتقى ىستەر مينيسترلەرى قابىلداعان سەنىم شارالارى كاتالوگىن تاجىريبە جۇزىندە جۇزەگە اسىرۋ ماقساتىن كوزدەدى.
توراعالىق ەتۋشى تۇرىك تاراپى مەن كەزدەسۋگە قاتىسۋشىلار قازاقستان جاعى ۇسىنعان سەنىم شارالارىن قولدادى جانە ولاردى كەزەڭ-كەزەڭىمەن ىسكە اسىرۋعا كەلىستى.
ءوز كەزەگىندە قازاقستان ەۋروپاداعى داعدىلى قارۋلى كۇشتەر تۋرالى شارتقا جانە ۆەنا قۇجاتىنا سايكەس شەت ەلدەردىڭ اۋماعىندا دا ينسپەكتسيالىق قىزمەتتەردى ويداعىداي جۇزەگە اسىرىپ كەلەدى. مىسالى, ەلىمىزدىڭ ءاسكەري ماماندارى 2003 جىلدان باستاپ 10-نان استام مەملەكەتتىڭ اسكەري نىساندارىنا ينسپەكتسيالىق تەكسەرۋ ءجۇرگىزدى. ولاردىڭ ىشىندە ۇلىبريتانيا, گەرمانيا, بەلگيا, تۇركيا جانە فرانتسيا بار. بۇل قازاقستان قارۋلى كۇشتەرىنىڭ الەۋەتى مەن بەدەلى ساناۋلى جىلدار ىشىندە حالىقارالىق دەڭگەيگە كوتەرىلگەنىن كورسەتەدى.
باعدات مايكەەۆ, قازاقستان رەسپۋبليكاسى قورعانىس ءمينيسترىنىڭ ورىنباسارى, گەنەرال-مايور.
