قورعانىس كەشەنىندەگى قوعامداستىق
جۇما, 21 قىركۇيەك 2012 7:49
2003 جىلعى ناۋرىز ايىندا ۇكىمەت قاۋلىسىمەن «قازاقستان ينجينيرينگ ۇك» اكتسيونەرلىك قوعامى قۇرىلعان بولاتىن. قازىر بۇل كومپانيا حولدينگتىك قۇرىلىم رەتىندە بىرنەشە قورعانىس ونەركاسىبى كەشەندەرىنىڭ باسىن بىرىكتىرىپ وتىر. ونىڭ قۇرامىنا 29 ەنشىلەس جانە تاۋەلدى كاسىپورىن كىرەدى. بۇلاردىڭ 17-ءى قارۋ-جاراق پەن اسكەري تەحنيكا, سونداي-اق مۇناي-گاز, تەمىر جول, اگرووندىرىس, جىلۋ-ەنەرگيا كەشەندەرىنە ارنالعان ونىمدەردى شىعارىپ, ولارعا جوندەۋ جاسايتىن مۇمكىندىككە يە.
جۇما, 21 قىركۇيەك 2012 7:49
2003 جىلعى ناۋرىز ايىندا ۇكىمەت قاۋلىسىمەن «قازاقستان ينجينيرينگ ۇك» اكتسيونەرلىك قوعامى قۇرىلعان بولاتىن. قازىر بۇل كومپانيا حولدينگتىك قۇرىلىم رەتىندە بىرنەشە قورعانىس ونەركاسىبى كەشەندەرىنىڭ باسىن بىرىكتىرىپ وتىر. ونىڭ قۇرامىنا 29 ەنشىلەس جانە تاۋەلدى كاسىپورىن كىرەدى. بۇلاردىڭ 17-ءى قارۋ-جاراق پەن اسكەري تەحنيكا, سونداي-اق مۇناي-گاز, تەمىر جول, اگرووندىرىس, جىلۋ-ەنەرگيا كەشەندەرىنە ارنالعان ونىمدەردى شىعارىپ, ولارعا جوندەۋ جاسايتىن مۇمكىندىككە يە.
«قازاقستان ينجينيرينگ ۇلتتىق كومپانياسى» اق رەسەي تاراپىمەن اسكەري تەحنيكالىق ىنتىماقتاستىق تۋرالى ماسەلەلەردى رەسەي فەدەراتسياسى مەن قازاقستان رەسپۋبليكاسى اراسىنداعى ىنتىماقتاستىق جونىندەگى ۇكىمەتارالىق كوميسسيا جانىنداعى اسكەري-تەحنيكالىق ىنتىماقتاستىق جونىندەگى شاعىن كوميسسيانىڭ شەڭبەرىندە شەشەدى. ونىڭ كەزەكتى ونىنشى وتىرىسى ماسكەۋ قالاسىندا بيىلعى 25 قازاندا وتكىزىلمەك.
سونداي-اق, كومپانيا قازاقستان رەسپۋبليكاسى ۇكىمەتى مەن رەسەي فەدەراتسياسى ۇكىمەتى اراسىنداعى ۇزاق مەرزىمدى ەكونوميكالىق ىنتىماقتاستىق باعدارلاماسىنىڭ جەكەلەگەن ءىس-شارالارىن جۇزەگە اسىرۋعا اتسالىسادى. ۇستىمىزدەگى جىلى رەسەي فەدەراتسياسىنان ءونىم الۋ ءۇشىن كومپانيانىڭ توعىز كاسىپورنى («س.م.كيروۆ اتىنداعى زاۋىت» اق, «پزتم» اق, «811 اۆتو جوندەۋ زاۋىتى كي» اق, «زەنيت» ورال زاۋىتى» اق, «تىنىس» اق, «ومەگا»پريبور جاساۋ زاۋىتى» اق, «زيكستو» اق, «س.م. كيروۆ اتىنداعى ماشينا جاساۋ زاۋىتى» اق پەن «سەمەي ينجينيرينگ» اق) ءوتىنىم بەردى. ولاردى جابدىقتاۋعا رەسەيدىڭ 100-دەن استام كاسىپورىندارى ىقىلاس تانىتىپ وتىر. ال رەسەي كاسىپورىندارىن جابدىقتاۋشى رەتىندە «زەنيت» ورال زاۋىتى» اق پەن «تىنىس» اق الدا تۇر. بۇل ازىرشە از. دەگەنمەن, بولاشاقتا «قازاقستان ينجينيرينگ» اق ەكسپورتتاۋشىلارىنىڭ سانى مولايا تۇسەتىنىنە ءۇمىت بار.
قازاقستان مەن رەسەي ءوڭىرلەرىنىڭ 18-19 قىركۇيەكتەگى پاۆلودار قالاسىندا وتكەن حالىقارالىق كورمەسى كومپانيانىڭ رەسەيلىك كاسىپورىندارمەن قورعانىس ونەركاسىبى سالاسىنداعى ىنتىماقتاستىعىن بۇدان دا جوعارى كورسەتكىشتەرگە جەتكىزەتىندىگىن كورسەتتى. ولاي دەيتىنىمىز اسكەري-تەحنيكالىق ىنتىماقتاستىقتى دامىتۋعا ارنالعان بىرقاتار قۇجاتتارعا قول قويىلعان. ماسەلەن, «نپك «ۋرالۆاگونزاۆود» جاق-پەن ىنتىماقتاستىق كەڭەيە ءتۇسۋدە. ەگەر بۇرىن تەك بروندى تانككە بوسالقى بولشەكتەر جاسالسا, ال قازىرگى كەزدە جاۋىنگەرلىك ماشينالاردى جانە كۇردەلى ينجەنەرلىك تەحنيكالاردى «سەمەي ينجينيرينگ» اق-تى قۇراستىرىپ, جيناۋ قاراستىرىلۋدا. وسىعان بايلانىستى پاۆلودارداعى فورۋمدا ىنتىماقتاستىق تۋرالى قاجەتتى مەموراندۋمعا قول قويىلدى.
رەسەيدىڭ «يجەۆسكي راديوزاۆود» ااق, «روسسيسكي ينستيتۋت موششنوگو راديوستروەنيا» جاق, «نپف «ميكران» جانە باسقا جەتەكشى كاسىپورىندارىمەن اراداعى ىنتىماقتاستىقتا «س.م. كيروۆ اتىنداعى زاۆود» اق ۇلكەن تاجىريبە جيناقتادى دەۋگە بولادى. بۇل ىقپالداستىقتىڭ ءناتيجەسىندە تەمىرجولدىڭ قاۋىپسىزدىگىن قامتاماسىز ەتەتىن لوكوموتيۆ قۇرىلعىلارىن, ازاماتتىق جانە اسكەري راديوستانسالاردى, قر قورعانىس مينيسترلىگى ءۇشىن اۆتوماتتاندىرىلعان مەتەورولوگيالىق كەشەندى بىرلەسىپ شىعارۋ جۇزەگە اسىرىلدى. رەسەيدىڭ باسقا دا بىرقاتار كاسىپورىندارىمەن ىنتىماقتاسىپ, جاڭا ءونىمدەر شىعارۋ تۋرالى كەلىسىمدەر بار.
جالپى, رەسەيلىك كاسىپورىندارمەن بىرلەسىپ جۇمىس ىستەۋدىڭ بولاشاعى زور. وعان نەگىز بولاتىن ءارتۇرلى بايلانىستاردى ءورىستەتۋگە اسكەري-تەحنيكالىق ىنتىماقتاستىق جونىندەگى قر جانە رف اراسىنداعى كەلىسىم مەن اسكەري-تەحنيكالىق ىنتىماقتاستىقتى دامىتۋدىڭ 2013-2015 جىلدارعا ارنالعان بىرلەسكەن باعدارلاماسى مۇمكىندىك تۋدىرماق. ونىڭ جوباسىنا «قازاقستان ينجينيرينگ» اق قازىردىڭ وزىندە بەلسەنە قاتىسۋدا.
سونىمەن قاتار, دامىعان ەلدەردىڭ تاجىريبەسى كورسەتىپ وتىرعانداي, قورعانىس ونەركاسىبى كەشەنىن تەك مەملەكەتتىڭ كۇشىمەن دامىتۋ جەتكىلىكسىز. بۇل بيۋدجەتكە قوسىمشا سالماق تۇسىرەدى. قورعانىس ونەركاسىبىن دامىتۋدا مەملەكەتتىك-جەكەمەنشىك ارىپتەستىگىن قالىپتاستىرۋ ماڭىزدى. ونىڭ ىشىندە شەتەلدىك جانە وتاندىق ينۆەستيتسيالاردى تارتا وتىرىپ, جاڭا قورعانىس كاسىپورىندارىن قۇرۋدىڭ قاجەتتىلىگىن ءبولىپ ايتۋعا بولادى.
مەملەكەت باسشىسى – قارۋلى كۇشتەردىڭ جوعارعى باس قولباسشىسى ن.ءا. نازارباەۆتىڭ ساياساتىن باسشىلىققا الا وتىرىپ, ەلىمىزدىڭ قورعانىس ونەركاسىبى كەشەنىن قازاقستاننىڭ ماشينا جاساۋ سالاسىنداعى لوكوموتيۆىنە اينالدىرۋ قاجەت. بۇل دەگەنىمىز مەتاللۋرگيا, ماشينا جاساۋ, حيميا, اقپاراتتىق تەحنولوگيا مەن تەلەكوممۋنيكاتسيالاردىڭ بارلىق سپەكترى سىندى بىرنەشە سالانى بىرگە دامىتۋ دەگەن ءسوز. قازاقستان ينجينيرينگ وسى باعىتتىڭ العاشقى قارلىعاشى. پاۆلوداردا وتكەن وڭىرارالىق فورۋمدا ءبىز مۇنى ايقىن بايقاعانداي بولدىق. وعان كومپانيانىڭ سونداعى كورمەدە قويىلعان تەحنيكالارى انىق دالەل.
ءجۇنىس ومار,
قازاقستان رەسپۋبليكاسى
قورعانىس مينيسترلىگىنىڭ
باسقارما باستىعى,
پولكوۆنيك.
