كاسىپورىن كۇنىنە 8 ساعات جۇمىس ىستەگەندە جىلىنا 40 مىڭ توننا قوقىستى ىرىكتەپ, وڭدەيدى. ال ونىڭ قۋاتى ارتىپ, ءۇش اۋىسىمدىق جۇمىس كۇنىنە كوشكەندە جىلىنا 120 مىڭ توننا قوقىس تازارتىپ, يگەرە الادى. زاۋىت تولىق قۋاتىنا ءۇش ساتىلاپ قوسىلاتىن بولادى. ازىرگە كاسىپورىننىڭ العاشقى جەلىسى سالتاناتتى تۇردە ىسكە قوسىلدى. «Eko siti kz» جاۋاپكەرشىلىگى شەكتەۋلى سەرىكتەستىگىنىڭ ديرەكتورى جاندوس جاقسىباەۆتىڭ ايتۋىنشا, كەلەسى جىلدىڭ باسىندا زاۋىتتىڭ ەكىنشى ساتىسى, ياعني قوقىستى تازارتۋ, جۋ جەلىسى ىسكە قوسىلادى. ءۇشىنشى ساتىسىندا شيكىزات رەتىندە پايدالانىلاتىن پلاستيك تۇيىرشىكتەرىن وندىرەتىن بولادى.
– بۇل – ءبىزدىڭ وبلىس ءۇشىن بىرەگەي جوبا. «S.M.F. – Sistem» توقىماسىز ماتەريال فابريكاسىنىڭ الەۋەتى ۇلكەن, ولار بىزدەن ينفراقۇرىلىم جاساۋعا كومەك سۇراپ وتىر. بۇل ءبىزدى قۋانتادى, دەمەك كومپانيانىڭ جوسپارى اۋقىمدى دەگەن ءسوز. ءبىز وعان بارلىق جاعدايدا كومەك بەرەتىن بولامىز. سونىمەن قاتار قوقىستىڭ وڭدەلۋى قورشاعان ورتانىڭ ەكولوگياسىن جاقسارتادى, بۇل دا جاقسى نىشان, – دەدى زاۋىتتىڭ سالتاناتتى ىسكە قوسىلۋىنا قاتىسقان وبلىس اكىمى ارحيمەد مۇحامبەتوۆ.
بۇل جوبانىڭ العاشقى جەلىسىنىڭ قۇنى 300 ميلليون تەڭگەنى قۇرادى. قوقىس وڭدەيتىن زاۋىت ءوزىنىڭ قۇرىلتايشىسى «S.M.F. – Sistem» توقىماسىز ماتەريال فابريكاسىن شيكىزاتپەن قامتاماسىز ەتەتىن بولادى. قايتا وڭدەلگەن قوقىستان فابريكا 80 ءتۇرلى زات وندىرەدى. ونىڭ اراسىندا گازعا, سۋعا, كابەلگە, تاعى باسقا دا قاجەتكە پايدالانىلاتىن قۇبىرلار, تاسجول توسەنىشى سەكىلدى جاڭا تەحنولوگيامەن وندىرىسكە پايدالانىلاتىن ماتەريالدار دا بار. قوقىس وڭدەۋ كەشەنىنىڭ بارلىق ساتىسى ىسكە قوسىلۋعا دەيىن 3 ميلليارد تەڭگە جۇمسالادى. ونىڭ ەكى ميلليارد تەڭگەسى جەكە قازاندىق ورناتۋعا پايدالانىلادى.
– قازاندىق سالىناتىن بولسا, كەرەكتى جىلۋ ءتاريفىن 40 پايىزعا ارزانداتار ەدىك, – دەيدى «S.M.F. – Sistem» توقىماسىز ماتەريال فابريكاسىنىڭ ديرەكتورى مارات سادۋاقاسوۆ. جاڭا ءىرى جوبا قوقىستى تاسۋشى, ىرىكتەپ, تازالاۋشى جانە ودان جاڭا زاتتار جاساپ شىعارۋشى ءۇش كومپانيانىڭ كونسورتسيۋم قۇرۋى ارقىلى جۇزەگە اسىرىلماق. مارات فازىلجان ۇلىنىڭ ايتۋىنشا, مۇندا نەگىزىنەن پلاستيك پەن پوليەتيلەننەن جاسالعان شولمەكتەر, قالتالار سەكىلدى قوقىس تۇرلەرىنە كوڭىل بولىنەدى. ويتكەنى توقىماسىز ماتەريال فابريكاسى وسى قوقىس تۇرلەرىن ەكىنشى رەت وڭدەۋمەن اينالىسادى. ولار وسى كۇنگە دەيىن شيكىزاتتى سىرتتان ساتىپ الىپ وتىردى. ەگەر قوقىس ساپالى تازارتىلىپ, وزدەرىنە قاجەتتى شيكىزات الىپ وتىرسا, فابريكا قۋاتى قازاقستانداعى بارلىق وسىنداي قالدىقتىڭ جارتىسىن وڭدەۋگە جەتەدى. قوقىس تازارتاتىن جاڭا كاسىپورىن ازىرگە جىلىنا 40 مىڭ توننا قوقىس ىرىكتەپ, تازارتاتىنىن ايتتىق. سونىڭ توقىماسىز ماتەريال فابريكاسى شيكىزاتقا الاتىن 1200-1500 تونناسى پلاستيك زاتتار بولادى ەكەن. ولار الداعى ۋاقىتتا بۇل كورسەتكىشتى 2800 تونناعا جەتكىزۋدى ويلاستىرىپ وتىر. ازىرشە فابريكا بارلىق شيكىزاتتىڭ 30 پايىزىن ءبارىبىر ساتىپ الۋعا ءماجبۇر. الداعى ۋاقىتتا مەتالل, اعاش, قاعاز سەكىلدى باسقا دا زاتتار وڭدەلەتىن بولادى. ال ۋلى, قاۋىپتى قالدىقتار قاراعاندىداعى ارنايى كاسىپورىنعا جىبەرىلىپ, ورتەلىپ, جويىلادى.
قوقىستى جويىپ, اينالانى تازارتۋ جانە ونى وڭدەۋ قازىر وزەكتى ماسەلەنىڭ ءبىرى. بۇل ورايدا مارات سادۋاقاسوۆ جاپوندىقتاردىڭ تاجىريبەسىنەن ۇيرەنۋ قاجەتتىگىن ايتتى. ول ءۇشىن قالالار مەن اۋىلداردا ارنايى ورىندارعا قوقىستاردى ىرىكتەپ سالاتىن كونتەينەرلەر قويۋ قاجەت. توقىماسىز ماتەريال فابريكاسى كونتەينەرلەردىڭ ۇلگىسىن دە جاساپ كورسەتىپ قويىپتى.
– قوقىستاردى ىرىكتەپ جيناۋ تاجىريبەسىن ەنگىزۋ ءۇشىن ەڭ الدىمەن تۇرعىنداردىڭ ساناسى كوتەرىلۋى, ادەتكە اينالدىرۋى ءتيىس. وعان دا بىرتە-بىرتە كەلەرمىز. قوقىس ىرىكتەلىپ جينالسا, وعان جۇمسايتىن قارجى شىعىنى ازايادى, اينالا تازارادى, ودان كۇندەلىكتى پايدالاناتىن جانە وندىرىسكە قاجەتتى ەكىنشى رەت وڭدەلگەن زاتتار وندىرىلەدى. پايدادان باسقا زيانى جوق, – دەيدى مارات فازىلجان ۇلى.
ادامزاتقا قوقىستىڭ قاسىندا ءومىر جوق. سوندىقتان قوستانايدا ىسكە كىرىسىپ جاتقان جاڭا كاسىپورىننىڭ بولاشاعى ۇلكەن.
ءنازيرا جارىمبەت,
«ەگەمەن قازاقستان»
قوستاناي
