سونىمەن قاتار ەلىمىزدە ءتۇرلى دەڭگەيدەگى ازاماتتاردىڭ دا «جامباسپۇل تولەپ, جاتاقتا جۇرگەنى» بەلگىلى. وسى ورايدا ءاربىر ازاماتتىڭ باسپانالى بولۋىنا مۇمكىندىك رەتىندە ەلباسى «7-20-25» باعدارلاماسىن ۇسىندى. اتالعان باعدارلامانىڭ كوپتىڭ كوكەيىنە ءۇمىت ۇيالاتىپ, ولاردىڭ بولاشاققا دەگەن سەنىمىن نىقتاي تۇسكەنى انىق.
ەلباسىنىڭ تاپسىرماسىن جۇزەگە اسىرۋ ماقساتىندا جامبىل وبلىسىندا دا جۇيەلى جۇمىس جۇرگىزىلىپ كەلەدى. اسىرەسە حالىقتى مەملەكەتتىك باعدارلاما شەڭبەرىندە تۇرعىن ۇيمەن قامتۋ دا ايتارلىقتاي جۇزەگە اسۋدا. ۇلتتىق بانكتىڭ جامبىل وبلىستىق فيليالىنىڭ ديرەكتورى ەۆگەني شارىگيننىڭ ايتۋىنشا, «7-20-25» ءاربىر وتباسىنا باسپانا الۋدىڭ جاڭا مۇمكىندىكتەرىن بەرەتىن يپوتەكالىق باعدارلاماسى جۇزەگە اسىرىلا باستاعان التى اي ىشىندە وڭىردەگى بانكتەردە جالپى سوماسى 721 ميلليون تەڭگەنى قۇرايتىن نەسيە قاراجاتى بويىنشا 80-نەن استام ءوتىنىم قابىلدانعان ەكەن. ونىڭ ىشىندە 400 ميلليون تەڭگە كولەمىندەگى 45 ءوتىنىم ماقۇلدانىپ, 35 ازاماتقا 300 ميلليون تەڭگە نەسيە بەرىلىپتى.
سوڭعى جىلدارى تاراز قالاسىنىڭ ساۋلەتىن كەلتىرىپ, كوركىن ارتتىرعان نىساندار اراسىندا «اراي» جانە 15-شاعىن اۋدانى بار. وسى ۋاقىتقا دەيىن شاھار توسىنەن بوي كوتەرگەن جاڭا تۇرعىن ۇيلەردەن مىڭداعان اۋليەاتالىقتىڭ پاتەر الىپ, قونىس تويىن تويلاعانى ەستە. ەندى الداعى ۋاقىتتا وبلىس ورتالىعىنان 14-شاعىن اۋدانى بوي كوتەرەدى دەپ كۇتىلۋدە. ال بۇگىنگى تاڭدا جەرگىلىكتى اكىمدىك پەن ۇلتتىق بانك فيليالىنىڭ بىرلەسۋى ناتيجەسىندە «7-20-25» باعدارلاماسىن جۇزەگە اسىرۋ كەزەڭىندە ونىڭ تالاپتارىن ءتۇسىندىرۋ, وڭىردەگى باسپانا نارىعىنىڭ باستاپقى نىساندارى تۋرالى اقپارات بەرۋ سياقتى بىرقاتار جۇمىس اتقارىلىپ وتىر. وسى ورايدا «تاراز» الەۋمەتتىك-كاسىپكەرلىك كورپوراتسياسى عيماراتىنىڭ ءبىرىنشى قاباتىنان «7-20-25» باعدارلاماسىن ءتۇسىندىرۋ بويىنشا اقپاراتتىق ورتالىق اشىلعانىن ايتا كەتۋ كەرەك. ەندى بۇل جەردەن بانك-سەرىكتەستەردەن باعدارلاما شەڭبەرىندە تۇرعىن ءۇي الۋ بويىنشا تولىق كەڭەس الۋعا بولادى. سونىمەن قاتار اتالعان ورتالىقتا وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ وكىلدەرى دە «نۇرلى جول» باعدارلاماسى اياسىندا «اراي» شاعىن اۋدانىنان بوي كوتەرگەن تۇرعىن ۇيلەردىڭ وتكەرىلۋى جۇمىستارىمەن اينالىسۋدا.
«بۇگىندە اتالعان شاعىن اۋداندا ساتىلۋعا ۇسىنىلعان 100 پاتەردىڭ ىشىنەن بىرەۋىن تاڭداپ الۋعا نيەتتىلەردىڭ سانى شامامەن 53 بىرلىكتى نەمەسە 50 پايىزدى قۇراپ وتىر. ولاردىڭ 25 پايىزى بويىنشا قالالىق تۇرعىن ءۇي-كوممۋنالدىق شارۋاشىلىق ءبولىمى تاراپىنان الەۋەتتى قارىزگەرلەردىڭ تولەم قابىلەتتىلىگىن باعالاۋ جانە تەكسەرۋ ءۇشىن بانك-سەرىكتەستىكتەرگە جولداما بەرىلدى», دەيدى فيليال ديرەكتورى.
جامبىل وڭىرىندە باعانىڭ جوعارعى شەگى 25 ميلليون تەڭگە. بۇل رەتتە ەۆگەني شارىگين «بانكتسەنتركرەديت», «اتف بانك», «حالىق بانكى», «تسەسنا بانك», «ەۋرازيالىق بانك» جانە «فورتە بانك» فيليالدارىنىڭ بەلسەندى ءارى تۇراقتى تۇردە جۇمىس اتقارىپ وتىرعانىن ايتتى.
حاميت ەسامان,
«ەگەمەن قازاقستان»
جامبىل وبلىسى
