سۋرەتتە: بايقاۋ جەڭىمپازى يۋري تكاچەۆسكي
وعان قازاقستان رەسپۋبليكاسى ءبىلىم جانە عىلىم مينيسترلىگىنىڭ عىلىم كوميتەتى, ا.بايتۇرسىنوۆ اتىنداعى ءتىل ءبىلىمى ينستيتۋتى قولداۋ كورسەتتى. بۇل قاناتقاقتى جوباعا قانداستارىمىز رەسەيدىڭ ورىنبور, ساراتوۆ, ومبى, استراحان, التاي, ماسكەۋ, ەكاتەرينبۋرگ, چەليابى, ياروسلاۆل سەكىلدى ءار شالعايىنان قاتىسىپ, اباي ولەڭدەرىن وقىدى. بايقاۋدىڭ شارتى بويىنشا, ولار اباي ولەڭدەرىن بەينەتاسپاعا جازىپ, كوپشىلىككە ۇسىنىپ وتىردى.
– بۇل بايقاۋعا قاتىسقان ءار قازاقتى «ابايدى وقىماي قازاقپىن دەمە...» دەگەن نامىس جەتەلەدى. مۇنداي جارىس رەسەي قازاقتارى اراسىندا بۇرىن-سوڭدى بولعان ەمەس. ونىڭ ەكى ەرەكشەلىگىن اتاپ ايتقىم كەلەدى. الدىمەن, ءبىز بۇرىنعىداي قارجى, ۋاقىت شىعىنداپ, ءبىر قالاعا جينالعان جوقپىز, وركەنيەتتىڭ جەتىستىگىن پايدالاندىق. كەڭ بايتاق رەسەيدىڭ تۇكپىر-تۇكپىرىندە تۇرىپ جاتقان اعايىندار ابايدىڭ ولەڭدەرىن بەينەتاسپاعا جازىپ, جىبەردى. ونى رەسەيلىك جانە ودان تىس جەردەگى قازاقتار ينتەرنەت ارقىلى كورىپ وتىردى. ەكىنشىدەن, قانداستارىمىز كوپتەپ شوعىرلانعان ورىنبور, ساراتوۆ, ومبى سەكىلدى وبلىستاردان قازاقتار بەلسەنە قاتىستى, اركىم ءار جاققا تارتپاي, اۋىزبىرشىلىك تانىتتى. جاستاردىڭ, بالالاردىڭ كوپ قاتىسۋى كوڭىلدى دەمدەدى. قازىلار القاسى دا قورىتىندى شىعاراردا تەلەفون بايلانىسى ارقىلى كوپشىلىكتىڭ پىكىرىن ءبىلىپ, ولاردى ەسكەرە وتىرىپ, جەڭىمپازدى انىقتادى, – دەيدى ساۋلە سوۆحوزقىزى.
ياروسلاۆل وبلىسىنداعى پوشەحونە سەلوسىنا قازاقستاننان قونىس اۋدارعان يۋري تكاچەۆسكي دەگەن جىگىت اباي ولەڭىن وقىعاندا ۇلى اقىننىڭ قانداستارىنان اسىپ ءتۇستى. «بالا كەزىمدە ابايدىڭ ولەڭدەرىن اتام ەرەكشە ۇناتاتىن ەدى. مەن ۇيقىعا جاتاردا اباي ولەڭدەرىمەن كوز ىلەتىن ەدىم», دەپ ول اقىننىڭ ولەڭدەرىن مۇلتىكسىز وقي جونەلدى. بايقاۋ قورىتىندىسىندا ماسكەۋ قالاسىندا تۇراتىن اقىن جارقىن وتەشەۆا باس بولعان قازىلار القاسى ءيۋريدى ۇزدىك دەپ تانىدى.
– رەسەي قازاقتارى ءۇشىن بۇل ونەر جارىسىنىڭ ماڭىزى ەرەكشە بولدى. بۇل ءبارىمىزدىڭ جەڭىسىمىز! وسىلاي, ءبىر كىسىنىڭ بالاسىنداي ءار ءىستى بىرگە تىندىرساق, ءبىز المايتىن قامال جوق. باۋىرلارىم, ءبىز مىقتىمىز! ءبىز انا ءتىلىمىزدى سۇيەمىز! وسىلاي العا ۇمتىلا بەرەيىك! ابايدىڭ تىلىنە قۇرمەت كورسەتكەن, اباي ولەڭدەرىن ءسۇيىپ وقىعان يۋري, سەن دە قازاعىمنىڭ ءبىرىسىڭ, باۋىرىمسىڭ! – دەپ اقىن اعايىنعا اقجارما قۋانىشىن جازىپ جاتتى.
ورىنبور وبلىسى قازاقتارىنىڭ كوشباسشىسى ساۋلە تايكەشەۆانىڭ ايتۋىنشا, الداعى ۋاقىتتا بۇل جوبا جالعاسىن تاباتىن بولادى. ەندىگى كەزەك «باتىرلار جىرى» ەپوستارىنا بەرىلەدى. حالقىمىزدىڭ اۋىز ادەبيەتى مارجاندارىنان ءۇزىندى جاتتاپ, ونى بەينەتاسپاعا جازۋ, ونى كورەرمەنگە ۇسىنۋ ءبىر اي بويى جۇرەدى.
ءنازيرا جارىمبەت,
«ەگەمەن قازاقستان»
قوستاناي
