قۇمداعى قىزىل شوق
دۇيسەنبى, 21 مامىر 2012 0:58
قوي قىرقۋدان حالىقارالىق جارىستاردا الدىنا جان سالماعان مويىنقۇم ءوڭىرىنىڭ تۇلەگى شوتاي تايباعاروۆتىڭ اتى ەلدە ءالى كۇنگە دەيىن اڭىز بوپ ايتىلادى…
ول بۇگىندەرى ورتامىزدا جوق. بۇرىنعى بۇكىلوداقتىق ءبىرىنشىلىكتىڭ ەكى دۇركىن جەڭىمپازى, ەكونوميكالىق ءوزارا كومەك كەڭەسىنە مۇشە ەلدەر قىرىقتىقشىلارى جارىسىنىڭ ءابسوليۋتتى چەمپيونى جانە قازاقستاننىڭ جەتى مارتە باس جۇلدەگەرى شوتاي تايباعاروۆ 1982 جىلى 37 جاسىندا مۇلدەم كەزدەيسوق كولىك اپاتىنا ۇشىراعان-دى…
دۇيسەنبى, 21 مامىر 2012 0:58
قوي قىرقۋدان حالىقارالىق جارىستاردا الدىنا جان سالماعان مويىنقۇم ءوڭىرىنىڭ تۇلەگى شوتاي تايباعاروۆتىڭ اتى ەلدە ءالى كۇنگە دەيىن اڭىز بوپ ايتىلادى…
ول بۇگىندەرى ورتامىزدا جوق. بۇرىنعى بۇكىلوداقتىق ءبىرىنشىلىكتىڭ ەكى دۇركىن جەڭىمپازى, ەكونوميكالىق ءوزارا كومەك كەڭەسىنە مۇشە ەلدەر قىرىقتىقشىلارى جارىسىنىڭ ءابسوليۋتتى چەمپيونى جانە قازاقستاننىڭ جەتى مارتە باس جۇلدەگەرى شوتاي تايباعاروۆ 1982 جىلى 37 جاسىندا مۇلدەم كەزدەيسوق كولىك اپاتىنا ۇشىراعان-دى…
وكىنىشتىڭ ورنى تولمايدى. بىراق, قوي باققان مويىنقۇم ادامدارى ءۇشىن عانا ەمەس, بارشا تۋعان جۇرتىنا سۇيكىمدى قالپىمەن ۇناعان جىگىتتىڭ تورەسىن ءالى ۇمىتا قويعان جوقپىز.
جاباعى ءجۇن قىرىققان قازاق از با؟ قول قايشىسىمەن-اق وتار-وتار قويدى الدارىنان وتكەرگەن داۋىردەن ەلەكتر قايشىسى زىرىلداعان زامانعا دا جەتكەنبىز. ول باعاسى باسەڭ بەينەت قانا بولىپ كورىنىپ كەلسە, بەرتىندە الىمدى قىز-جىگىتتەردىڭ كادۋىلگىدەي دۇرىلدەگەن ونەر باسەكەسى جانە دەڭگەيى دۇنيەجۇزىلىك بولىپ تانىلا باستادى. بابىن تاپ سپورتشىداي ءتىلەيتىن بولسا دا ءبىزدىڭ جىگىتتەرگە ءاپ-ساتتە جاپىرىپ جىبەرەتىن جۇمىس تۇرىندەي سەزىلەتىن. شىن كىرىسىپ ەدى, تۇكپىردەگى قازاق جىگىتى تورتكۇل دۇنيەگە تەز تانىلدى. مىڭنىڭ بىرەگەيى شوتاي 23 جاسىندا شوقتاي جاندى. قاراكول قويدىڭ ۇستىنەن ءجۇنىن نەبارى 1 ءمينوت 15 سەكونتتە “سىپىرىپ” الاتىن ول ءبىر بيازى ءجۇن قويدى 2 مينوتكە جەتكىزبەي-اق “تازالاپ” جىبەرەتىن بولدى. ون كۇندىك ماۋسىمدا 4500 قويعا دەيىن قىرقىپ شىعارىپتى. تاڭعالاتىنداي-اق دەرەك. وسى ۇمىتىلماس شاق كىمدى دە بولسىن قىزىقتىراتىنى انىق. ءبىزدى سول داڭققا بولەگەن شوتاي اعانىڭ زايىبى جاڭىل جۇماحانقىزىنىڭ اسەرلى اڭگىمەسىنەن كەيىن, ءاربىر ىستىق كۇندەر ساتىنە قايتا ۇڭىلە تۇسكەندەي بولدىق.
مۇنىڭ الدىندا مويىنقۇمعا ىزدەپ بارعانبىز. تاپپادىق. جاڭىل جەڭەشە الماتىداعى ۇلكەن ۇلى باقىتجان مەن كەلىنى, نەمەرەلەرىمەن بىرگە تۇرۋعا كوشىپ كەتكەن ەكەن. ال, باقىتجانمەن ءبىز كەزدەيسوق كەزدەسىپ, اناسىن باققان پەرزەنتىنىڭ شاڭىراعىندا بولدىق.
– شوتايدىڭ اناسى ءماريا ەنەم وسىدان ەكى جىل بۇرىن 83 جاسىندا قايتىس بولدى. اياۋلى اپامنىڭ ورنىن كۇتتىم, پارىز بەن اتا ءداستۇرىن وتكەردىم, — دەدى جاڭىل جەڭەشە قازاق ايەلىنە ءتان مىنەزبەن. – بالالارىم – ەكى ۇلىم مەن قىزىم الماتى مەن استانادا قىزمەتكە ارالاسا باستادى. سولاردىڭ قاسىندا بولىپ, ءتىلەۋىن تىلەيىن دەپ كەلدىم. جاسىرىپ نەعىلايىن, اۋىلدان قالاعا قاراي كوشۋ ماعان وڭاي تيگەن جوق. قيماسام دا 12 بولمەلى ءزاۋلىم ءۇيدى قالدىرىپ, بالالارىمنىڭ قولىنا كەلگەن جايىم بار. شۇكىر, ايتەۋىر, قالاعا دا ۇيرەنىپ ءجۇرمىز. قوس ق ۇلىنشاق نەمەرەم بار, ەرمەگىم دە سولار, ولارعا اتالارىنىڭ التىن مەدالدارى مەن ساعىنىشتى سۋرەتتەرىنەن وزىمشە سىر عىپ ايتام. ول داۋرەندى جىلدار قايتىپ ەستەن شىعا قويسىن, مەن شوتاي قاتىسقان بارلىق جارىسقا دا كۋا بولىپ, قۇددى ءبىر باپكەرى سياقتى ءبىر ەلى قالماي, قاسىندا ءجۇردىم. اتاقتى قىرىقتىقشىلاردىڭ ءبارىن جاقسى بىلەمىن. ارالاس-قۇرالاس, دوس بولدىق…
مۇراسىن مەيلىنشە ۇقىپتى ساقتاعانى بىردەن بايقالدى.
ءبىر ساندىقشا تولى مەدال, القىزىل لەنتا-جەڭىمپاز بەلگىسى, ەسكەرتكىش بويتۇمار, فوتوسۋرەتتەر, جان-جاقتان كەلگەن حاتتار جانە شوتاي حاقىندا جازىلعان ماقالالاردىڭ قيىندىلارى. بارىنە دە مۇقيات زەر سالىپ, تانىسىپ وتىرمىز. ال, مىناۋ… قوي قىرقاتىن “قۇدىرەتتى” قايشى. سول شوتايدىڭ قولىندا زىر قاققان قۇرال. الماس پىشاعى مەن ءجۇزى قايتپاس تاراعى. قايراۋى ەش مۇقالمايدى ەكەن.
شىنىندا دا قوي قىرقۋداعى ادام سەنبەس شاپشاڭدىق اۋىل بالاسىنا قالايشا ءتان بولعان دەرسىڭ-اۋ. ءور تۇلعالى, وتكىر كوزدى جىگىتتىڭ تۇلا بويىندا قاينار بۇلاقتاي كۇش-قايرات جانە تالانت بولماسا, قولدان كەلە قويار ما؟
ەس ءبىلىپ, ەرجەتكەلى شۋ مەن مويىنقۇم اتىرابىنان ونشالىقتى الىسقا ۇزاماعان شوتاي 1968 جىلى تۇڭعىش رەت وداقتىق جارىسقا (مۇنداي بايقاۋ 1967 جىلدان باستاپ وتكىزىلگەن) قاتىسىپ كورەدى. بۇعان دەيىن جاڭازەلانديالىق جانە ورىنبورلىق ادىسپەن قوي قىرقۋعا ماشىقتانباعاندىقتان ءال-ازىرگە ۇشتاي تۇسەتىن شەبەرلىك پەن ەپتىلىك قىرىنا اجەپتاۋىر قانىعىپ قايتقان. وعان 197 قىرىقتىقشىنىڭ اراسىنان 21-ءشى ورىن ءتيىپتى. وكىنە قويعان جوق, ويتكەنى كورمەگەنىن كوردى, بىلمەگەنىن بىلۋگە قۇشتارلىق سەزىمى باۋرادى. قامشىلايتىن قىزۋقاندى شاپشاڭدىقتى دا شامالاپ قايتتى. ءار الۋان جۇيرىك الىنە قاراي كوسىلەدى عوي, شوتاي ايتەۋىر شوقيتىپ قوي قىرىققاندى ۇناتا قويمادى, ودان گورى قازاقي ءادىستى– جامباستاپ جاتقىزىپ قىرقۋدىڭ ارتىق امالىن ءجون كوردى.
كۇتكەنى كەلەسى سىن بولاتىن. لۋگوۆوي, مەركىدە ءبىراز ۋاقىت جاتتىعۋ – ازىرلىكتە بولدى. بيازى ءجۇندى قويدىڭ بەرەكەسى وسى ءوڭىر ەدى. 1969 جىلى حەرسون وبلىسىنا 11 وداقتاس رەسپۋبليكادان 116 قىرىقتىقشى توعىسىپ, ءاي, ءبىر ءوزارا بايگەنى قىزدىرىپ جىبەردى. قازاقستاننان “نە بەل كەتەدى, نە بەلبەۋ كەتەدى” دەپ ءتاستۇيىن بارعان 20 قىرىقتىقشى اراسىنان شوتاي الدىنا جان سالمادى. ول ءار قويدى 2 ءمينوت 12 سەكونتتە (بارلىعى 10 قوي) قىرقىپ, كسرو-نىڭ مىقتىسى دەلىنەتىن ن.حولود, س.بايرامقۇلوۆ, ل.گيديون سياقتى تارلانداردى ارتقا تاستادى. رەكوردتىق كورسەتكىشكە ءبىر-اق سەكىردى. قوي ۇستىنەن ءبىر قىلتاناق قالماي ءجۇننىڭ توگىلىپ-تۇتاسىپ ءتۇسۋى جانە ۇيلەسىمدى قىرقۋى ونىڭ قاتال تورەشىلەر سارابىنان سۇرىنبەي, 100 مۇمكىندىكتەن 100 بالل جيناۋىنا اسەر ەتتى.
مويىنقۇم جىگىتى كسرو چەمپيونى بولىپ وزعاندا 23 جاستا ەدى. بۇعان تاڭداناتىن ەشتەڭە جوق. قازاققا قايشى ۇستاۋ تورتكۇل مال بىتكەلى باعزى عاسىردان بەرى ءتان كاسىپ. بىراق, ول نەگە جاڭازەلانديالىقتارشا قىرىقپادى ەكەن, دەگەن سۇراق تۋىنداعان. ونىڭ ءادىسىنىڭ ءوزى جەدەل ءادىس پە؟ كەڭەستەر وداعىنا كەلگەن دۇنيە ءجۇزى چەمپيونى, جاڭازەلانديالىق گودفري بوۋەننىڭ ەرەجەسى بويىنشا قويدى قۇيرىعىمەن شوقيتىپ وتىرعىزۋ كەرەك ەدى. بىراق, قاتىپ-سەمىپ قالعان ەشنارسە بولماس, قۇيرىعى جوق قويعا شەتەلدىك ءادىس جاراسار, قۇيرىقتى سەمىز قويدى قىرقۋ ءۇشىن قازاقي ءتاسىل كەرەك, شوتايدىڭ شيرىقسا, بەل جازباي كوسىلدىرەتىن شەبەرلىگى شاشاسىنا شاڭ جۇقتىرمايتىنىن سىرت كوز – ارىپتەستەرى وسى جولى بىلگەن.
ءبىز دە اۋىل بالاسىمىز. قويدىڭ اياعىن بايلاپ قىرقاتىن. تالاس – سارىسۋ وڭىرىندە مومىن ىدىرىسوۆ, ءابىل اعىباەۆ, ەسەنتاي بالابەكوۆ, امانكەلدى توكەشوۆ, ءابدىر مىلتىقباەۆ سىندى قىرىقتىقشىلاردىڭ ونەرىنىڭ ءوزىن اۋىلداستارى كادىمگىدەي كەرەمەت سانايتىن. سولاردىڭ ءوزى جەتپىسىنشى جىلدارى قويدىڭ اياعىن بايلامايتىن ءتاسىلدى شوتاي سىندى جامبىلدىق تارلاندار وڭ جامباسىنا كەلتىرگەنىن ەستىپ, تاڭعالىپ ەدى.
تانىس كورىنىس قايتالانادى: سول جامباسىمەن جاتقان قويدان ماشينكا بىرەر سىرعىپ وتكەندە باۋىرداعى, سانداعى ءجۇنى جاباعىمەن قوسىلىپ سىپىرىلىپ قالادى. قويدى ءبىر اينالدىرعاندا ارقاسى, موينى, قۇيرىعى دا جۇننەن “تازالانىپ” شىعا كەلەدى. زامانىندا تاسقا باسىلعان دەرەكتەردى كەلتىرسەك, شوتاي 1967 جىلى 5 ساعات ىشىندە 185 قويدى قىرقىپتى. بۇل رەسپۋبليكامىزدا ەش بولماعان وقيعا. ال, ودان كوپ بۇرىن اناسى– ءماريا, اكەسى – شوپان ايقوجا وتاعاسىنىڭ كوز الدىندا قول قايشىمەن 50 قوي قىرقۋشى ەدى, دەيدى اۋىلداستارى. جۇعىستى جول بار ەكەن عوي. كەلەسى جىلى ول رەسپۋبليكا بىرىنشىلىگىنە قاتىسىپ كورىپ, ءۇشىنشى ورىندى الادى. سەمەيلىك سابىر جاقسىبەكوۆ پەن قىز-كەلىنشەكتەر اراسىندا الماتىلىق بازاركۇل اسقاروۆا ۇشقىر قيمىلداپ, وتە شاپشاڭ قىرقاتىن شەبەرلىگىنە قايران ەتەدى. بيازى ءجۇن قويدى قىرقۋمەن تىم سيرەك اينالىسقانى (مويىنقۇمدا بيازى ءجۇن قوي ءوسىرىلمەيدى) سالقىنىن تيگىزگەنىن شوتايدىڭ ءوزى دە سەزەدى. سوعان قاراماستان قازاقستاندىق قۇراماعا ەنىپ, 1969 جىلعى كسرو چەمپيوناتىندا جەڭىمپاز اتانعانىن ءسۇيسىنىپ ايتپاسقا بولماس…
شوتاي جىگىت جاسى 25-كە كەلگەندە ەكى مارتە سوتسياليستىك ەڭبەك ەرى, داڭقتى اتاسى جازەكەڭ – جازىلبەك قۋانىشباەۆتىڭ قاسىنان ءبىر ەلى قالمايتىن. بۇل دالا اكادەميگىنىڭ اكەلىك مەيىرىمى ءارى ماقتان ەتۋگە تاتيتىن ۇلعا قامقورلىعىنداي ىقىلاسى ىستىق ەكەن. قاي اۋىلعا بارسا دا “انە, قولى قولىنا جۇقپايتىن شوتايىڭ وسى!” دەيتىن شاقتا كوڭىلى قۇلاي سۇيگەن كوكتەرەكتىڭ بويجەتكەن قىزى جاڭىلمەن بىرگە جۇبايلىق ءومىر جولىنا قوسىلعان-دى. جازەكەڭ جانە ەڭبەك ەرى, شوپان اپاسى ءدىلداش يتباسوۆا ءتارىزدى مويىنقۇم ءوڭىرى سول زاماندا كەرەمەت داڭققا كەنەلگەن داۋرەنى بولعان. ادال ەڭبەك ادامدارى وسىلار عوي! نەسىن ايتاسىز, 1970 جىلى بەلگورود وبلىسىنىڭ “سترانا سوۆەتوۆ” كولحوزىندا وتكەن كسرو بىرىنشىلىگىندە باس جۇلدەدەن ۇمىتكەر رەسەيلىك قىرىقتىقشىلار ن.حولود پەن س.بايرامقۇلوۆتى قازاقتىڭ ءبىر جىگىتى تاعى دا تاقىرعا وتىرعىزدى. كەۋدەسىنە تۇڭعىش رەت اركىم-اق ارماندايتىن “التىن جاباعى” التىن مەدالىن تاقتى. مەركىلىك دوسى ساعىنتاي ماماەۆ پەن الماتىلىق مارات ابدىقادىروۆ ارىپتەسى ۇزەڭگى قاعىستىراتىن ءۇمىتتى وتىن ۇرلەگەن ساتتە: ء“پالى, شوتاي ەندى ەشكىمدى شاق كەلتىرمەيدى”,– دەپ ۇنەمى اعىنان جارىلعان تىلەكتەرىن نامىسقا تەليتىن. ەكەۋىنىڭ ايتقانى كەلەدى. بۇدان كەيىن التىنشى مارتە قازاقستان جەڭىمپازى بولىپ, بۇكىلوداقتىق ىرىكتەۋ سىنىندا ول 75 قىرىقتىقشى اراسىندا جارىسقا تۇسەدى دە قىرعىزستاندىق ل.گيديون, كراسنودارلىق ن.كاليتادان كەيىن ءۇشىنشى ورىندا تۇرادى. ستاۆروپولدىك م.بوتاشەۆ تورتەۋى چەركاسسك قالاسىندا پولشا, گدر, ۆەنگريا, بولگاريا, مونعوليا جانە چەحوسلوۆاكيانىڭ دۇلدۇلدەرىمەن تۇڭعىش حالىقارالىق باسەكەگە قاتىسىپ, ءۇشىنشى ورىندى يەلەنەدى.
شوتايدىڭ ادۋىن داۋىل قيمىلى 1979 جىلى بولگاريانىڭ تولبۋحين قالاسىنداعى حالىقارالىق بايقاۋدا كورىنەدى. ول 100 مۇمكىندىكتەن 95,11 بالل جيناپ, چەمپيون اتانادى. 10 قويدى 29,27 مينوتتە وتە ساپالى قىرقۋىمەن باسىمدىققا يە بولىپتى.
ەڭبەگى ەرەكشە ەلەنگەن. قاراپايىم قىرىقتىقشى ەڭبەك قىزىل تۋ, قۇرمەت بەلگىسى وردەندەرىمەن ماراپاتتالىپ رەسپۋبليكا جوعارعى كەڭەسىنە دەپۋتات بولىپ سايلانادى. جاڭىل جەڭەشەنىڭ ايتۋىنشا, 1972 جىلى اعا مەن جەڭگەم بىرگە دىنمۇحاممەد قوناەۆتىڭ قابىلداۋىندا بولعاندا جۇزىنەن جىلىلىق توگىلگەن ەلاعاسى: “كەل, شوتاي باۋىرىم, سەن تۋرالى اڭىز كوپ ايتىلادى. قانە, ءوز اۋزىڭنان ەستيىنشى! كەلىن قاراعىم, قانشا بالالارىڭ بار؟ ”– دەپ وتە جىلى قارسى الادى. شوتايدىڭ قولىن قىسىپ تۇرىپ, “قارۋلى جىگىت ەكەنسىڭ, باسە!”– دەپتى. از-كەم تىلدەسەدى.
– كۇنىنە قانشا قوي قىرقاسىڭ؟ – دەپتى.
– 400-500 قوي…
– بريگادا قۇرىپ, ءبىر اۋداننىڭ قويىن باسقانى جابىلتپاي-اق وزدەرىڭ قىرىقساڭدار قالاي بولار ەدى؟
– اۋداندا سولاي بولىپ جاتىر. ءبىر اپتادا كەڭشاردىڭ بارلىق قويىن قىرقىپ بەرەمىز, – دەپ شوتاي پەرنەباي بەكبولاتوۆ پەن تولەگەن قىرىقباەۆ سەكىلدى اۋىلداس قىرىقتىقشىلارىنىڭ بريگاداسىن اڭگىمەلەپ بەرەدى.
قوشتاساردا ديمەكەڭ جوعارعى كەڭەس تورالقاسىنىڭ توراعاسى س.نيازبەكوۆكە قاراپ: “مويىنقۇم – بەرەكەلى ءوڭىر بولدى. مىنا باتىر جىگىتكە تەمىر تۇلپار “نيۆا” مىنگىزەيىك, اۋداندا “فۋرمانوۆ” پەن “كوكتەرەك” كەڭشارى وزىپ تۇر ەكەن, سولاردىڭ جۇمىسشى-مالشىلارىنا 2 اۆتوبۋس بەرىڭدەر”,– دەيدى…
ديمەكەڭ 90-شى جىلدارى مويىنقۇمعا جولى ءتۇسىپ بارعاندا: “شوتاي بالام قايدا؟” دەپ سۇراپتى. ونىڭ ومىردەن كەنەتتەن ەرتە وتكەنىن ەستىپ, قاتتى وكىنىپتى…
ءبىز كەيدە داڭقتى ءبىر ساتتىك قانا دەپ ۇعارلىق قالىپ تانىتىپ جاتامىز. اتاقتى ازامات ەسىمى اۋدان كوشەسىنە بەرىلگەندە ىلىنەر تاقتايشاسىن جاڭىل جەڭەشەم ءوزى جاساتقان جاعداي دا بولعان. شوتاي مۇراسىنىڭ ءبىرقاتارىن كەزىندە رەسپۋبليكا اۋىل شارۋاشىلىعى مينيسترلىگىنە مۇراجايعا قويامىز دەپ الىپ كەتكەن. قازىر ونىڭ ءبارى ءىزىم-قايىم جوعالعان با, ءبىز دە سۇراستىرىپ تابا المادىق.
ديمەكەڭنىڭ ءبىر عانا ۇلاعاتىنا بايلانىستى ايتىپ جاتقانىمىز عوي…
ول 1976 جىلدان باستاپ جۇگەرى ەگىپ, ديقانگەرلىككە قۇلاي بەرىلەدى. بۇعان اناسىنىڭ: “قاراعىم, سەنى نارەستە كەزىڭدە جۇگەرى نارىمەن اۋىزداندىرىپ ەدىم”,– دەگەن ءبىر اۋىز ءسوزى سەبەپ بولادى. “جۇگەرى نارىنەن قۋات السام, سارعىش تارتقان القاپتى جاسىل جەلەكتەي جايقالدىرامىن”,– دەپ كوكسەگەنى ورىندالىپ, كۇزدە 100 گەكتار ەگىستىكتەن رەكوردتىق ءونىم الىپتى.
ءبىراز مالىمەتتەر مەن جازبالاردان بىلگەنىمىز: شوتاي دۇنيەجۇزىنىڭ چەمپيونى جاڭازەلانديالىق گودفري بوۋەنمەن بەلگورود وبلىسىنىڭ “سترانا سوۆەتوۆ” ۇجىمشارىندا ءىV وداقتىق جارىسقا كەلگەنىندە كەزدەسەدى. بۇل اتىشۋلى قىرىقتىقشى انگلياداعى حالىقارالىق باسەكەدە 9 ساعات ىشىندە 559 قوي قىرقىپ, ءار قويدى تىپتەن 58 سەكونتتە قىرقىپ ەرلەگەن مىقتى بولاتىن. بوۋەن سول جولى شوتايدىڭ ونەرىن كورىپ, شەبەرلىگىنە ءتانتى بولعانى سونشالىقتى, ونى اۆستراليا مەن جاڭازەلاندياعا شاقىرادى. ەكەۋى ءدال سول ارادا ەر جىگىتتەرشە ءباس تىككەندەي جارىسىپ بايقايدى. مىنە, قىزىق! شوتاي ءبىر قويدى 1 ءمينوت 15 سەكونتتە, ال, گ.بوۋەن 1 ءمينوت 35 سەكونتتە قىرقىپ بىتەدى. بوۋەن شوتايدىڭ ارقاسىنان قاعىپ: “ەگەر ءسىز بەن ءبىزدى 9 ساعاتتىق جارىسقا سالسا, قالايشا رەكورد بولماسىن”,– دەپتى. بىراق, ول ارمان ورىندالمادى. ءساتى كەلمەدى… گودفريدىڭ تۋعان ءىنىسى ايۆور 9 ساعاتتا 572 قوي قىرقىپ, الەم رەكوردىن جاڭارتا ءتۇسىپتى. شوتاي دا ءبىر كۇندە كەيدە شىنداپ كۇش سالسا 600 قويعا دەيىن قىرقاتىن بولعان. سول 9 ساعات شاماسى بولسا كەرەك.
بىراق اعايىندى بوۋەندەر كوپ ۋاقىت شوتايدىڭ ءبىر ءمينوت ىشىندە سونشاما ىستىق اسەر قالدىرعانىن ەلدەرىنە بارعاندا تەبىرەنە جازىپتى دەسەدى.
قوي قىرقۋ “قىزىعى” قازىر اۋىزعا دا الىنبايدى. بۇعان ونەر دەپ قارايتىن كوزقاراس تا جەتىسپەيدى. وسىنداي شاقتا شوتاي ۇستاعان قايشى سىرىلى ساعىنىش بوپ ەستىلەدى…
مەيرامبەك تولەپبەرگەن,
“ەگەمەن قازاقستان”.
الماتى.
22 ناۋرىز 2001 جىل.
