– 2018 جىل پارلامەنت سەناتى ءۇشىن ءونىمدى جىلداردىڭ ءبىرى بولىپ, كوپتەگەن زاڭ قابىلداندى. ونىڭ ىشىندەگى ەڭ ماڭىزدىلارىنىڭ ءبىرى – الداعى ۇشجىلدىق بيۋدجەت. بۇل بيۋدجەتتى الەۋمەتتىك بيۋدجەت دەپ نىق سەنىممەن ايتا الامىن. ويتكەنى, بيۋدجەتتىڭ 47 پايىزعا جۋىعى الەۋمەتتىك سالاعا باعىتتالدى. اتاپ ايتقاندا, بيىلدان باستاپ مۇعالىمدەردىڭ جالاقىسى جانە كوپتەن بەرى ايتىلعانىمەن, ىسكە اسپاي كەلگەن ەڭ تومەنگى جالاقى مولشەرىن كوتەرۋگە قول جەتكىزدىك. بۇل كورسەتكىش بويىنشا ەلىمىز سوڭعى جىلدارى كەيىندەپ قالعان ەدى. ەندى ۇشجىلدىق بيۋدجەتتە ەلىمىزدەگى ەڭ تومەنگى جالاقى 28280 تەڭگەدەن 42 مىڭ تەڭگەگە دەيىن كوبەيتىلەدى.
سونىمەن قاتار ەلىمىزدەگى جوعارى ءبىلىمنىڭ ساپاسىنا بايلانىستى دا ايتىلعان سىندار ۇدەپ كەتكەن بولاتىن. ونىڭ سىرى مىنادا – وقۋ ورىندارىنداعى پروفەسسورلىق-وقىتۋشىلار قۇرامىنىڭ جالاقىسى دا كوپ جىل بويى وزگەرىسسىز قالىپ كەلدى. ەندى بۇل ولقىلىقتىڭ دا ورنى تولاتىن بولدى. ماسەلەن, 2019 جىلدىڭ بيۋدجەتى بويىنشا عالىمداردىڭ عىلىم دوكتورى دارەجەسىنە ەندى 34 ايلىق ەسەپتىك كورسەتكىش كولەمىندە ۇستەمە قوسىلادى. ال عىلىم كانديداتى اتاعى ءۇشىن 17 اەك تولەنەدى. ەڭ باستىسى, بيىلعى بيۋدجەتتە زەينەتاقىنى ءار سانات بويىنشا كوتەرۋگە دا قارجى قارالدى. مىنە, الەۋمەتتىك بيۋدجەتتىڭ جەمىسى – وسى. قازىر اقش پەن رەسەي, اقش پەن قىتاي اراسىنداعى ساۋدا سوعىستارى ءبىزدىڭ ەلىمىزگە وڭايعا سوعىپ وتىرعان جوق. بۇل كيكىلجىڭدەر دامۋشى مەملەكەتتەرگە تەرىس اسەرىن تيگىزۋدە. وسىنداي قيىندىقتارعا قاراماستان, ەلباسىنىڭ باستاماسىمەن ەلىمىزدە الەۋمەتتىك سالاعا كوڭىل ءبولىنىپ, حالىقتىڭ ءال-اۋقاتىن ارتتىرۋعا باعىتتالعان قىرۋار ءىس اتقارىلۋدا. تابالدىرىقتان اتتاعان 2019 جىلى دا ءبىزدىڭ حالقىمىز مەملەكەت باسشىسىنىڭ باستاۋىمەن جاڭا ىرىزدىقتارعا قول جەتكىزبەك. جاڭا جىلدا ۇمىتتەرىمىز اقتالا بەرسىن!
مۇرات باقتيار ۇلى,
پارلامەنت سەناتىنىڭ دەپۋتاتى
