قوعامدىق دامۋ ءمينيسترى دارxان كالەتاەۆ بىلتىر قاراشادا «ەل ەرتەڭى – بولاشاق جاستاردىڭ قولىندا» جول كارتاسىنىڭ جوباسى ازىرلەنگەنىن حابارلاعان ەدى. اتالعان مينيسترلىك جانىنان قۇرىلعان جاستار جانە وتباسى ىستەرى كوميتەتىنىڭ باسشىسى اسحات رازدىق ۇلى: «جول كارتاسىندا مينيسترلىكتەردەن باستاپ, بارلىق مۇددەلى مەملەكەتتىك مەكەمەلەردىڭ, جەرگىلىكتى اكىمدىكتەردىڭ, جاستار ساياساتىمەن اينالىستان ۇكىمەتتىك ەمەس ۇيىمداردىڭ ۇسىنىستارى مەن جوبالارى قامتىلدى. سونىمەن قاتار قوعامداعى پىكىرلەر مەن الەۋمەتتىك ساۋالنامالاردىڭ ناتيجەلەرى دە ەسكەرىلدى. جول كارتاسىنىڭ نەگىزگى ماقساتى – ءار ساناتتاعى جاستارعا قولداۋ كورسەتۋ. ونىڭ ىشىندە 14-18 جاس ارالىعىنداعى مەكتەپ وقۋشىلارى دا, كوللەدج, ينستيتۋت, باسقا دا جوو ستۋدەنتتەرى, جاس وتباسىلار, كاسىپكەرلەر مەن جۇمىسسىز جاستار دا بار», دەيدى.
مەملەكەت باسشىسى: «جاستار جانە وتباسى ينستيتۋتىن قولداۋ مەملەكەتتىك ساياساتتىڭ باسىمدىعىنا اينالۋى ءتيىس», دەگەن ەدى. سونىڭ دالەلى, وتكەن جىل جاستارعا ارنالعان جوبالاردىڭ قارقىندى قولعا الىنۋىمەن ەرەكشەلەندى. ناقتى تىلگە تيەك ەتەتىنىمىز: قىركۇيەك ايىنان باستاپ 20 000 گرانت ءبولىندى. 2022 جىلعا دەيىن 75 مىڭ ادامعا ارنالعان جاتاقحانالار سالىنادى. بۇل – وسىنشاما وتباسىنا كومەك دەگەن ءسوز. ويتكەنى تەگىن ءبىلىم, ستيپەنديا الىپ, جاتىن ورىنمەن قامتاماسىز ەتىلىپ, وقۋىن ءتامامداپ, تابىس تاپقان ءاربىر ادام ءوز وتباسىنا قولداۋ كورسەتىپ, تىرەك بولۋ مۇمكىندىگىن يەلەنەدى.
سونداي-اق جاستار جانە وتباسى ىستەرى كوميتەتى ءوز جۇمىسىن باستادى. بۇل دا جاستارعا جۇيەلىلىك جاعىنان ۇلكەن قولداۋ. ء«بىزدىڭ ماقساتىمىز – جاستارعا ارنالعان الەۋمەتتىك ليفت پلاتفورماسىن كەڭەيتۋ. بىزدە جۇيە قالىپتاسقان, بالا مەكتەپتى بىتىرگەن سوڭ, ۇبت ارقىلى گرانت يەلەنە الادى, ەگەر ونى قالاماسا نەمەسە مۇمكىندىگى بولماسا, 2 جىل تەگىن وقىتاتىن كاسىپتىك كوللەدجدەرگە بارا الادى. مىنە, بۇل دا الەۋمەتتىك ليفت», دەيدى كوميتەت باسشىسى.
كوميتەت وكىلىنە «جاستار جىلى جالاۋلاتۋمەن ءوتىپ كەتپەي مە؟» دەگەن قوعامدا تۋىنداعان سۇراقتى قويدىق. ول: «جول كارتاسى ناقتى ينديكاتورلارعا تولى بولادى دەگەن سەنىم بار. ۇكىمەت قاۋلىسىمەن بەكىتىلگەن مەملەكەتتىك باعدارلامالارعا ءار باعىتتاعى جاستار ينديكاتورىن ەنگىزۋدى ۇسىنىپ جاتىرمىز. ۇكىمەتتىك ەمەس ۇيىمدارمەن تىعىز بايلانىستامىز, سولارمەن بىرلەسكەن جۇمىس رەتىندە ءارى قوعامداعى الاڭداۋشىلىقتى ەسكەرىپ, پايداسىز جيىندار, فورۋمدار مەن دوڭگەلەك ۇستەلدەردەن گورى بىزدەگى سۋيتسيد, ناشاقورلىق, بۇزاقىلىق سەكىلدى وزەكتى ماسەلەلەردىڭ الدىن الۋ ماقساتىندا جاستارعا ماڭىزدى ءارى قىزىقتىراتىن اكتسيالاردى, مارافونداردى, جاڭا فورماتتاعى جۇمىستاردى ۇيىمداستىرۋ جوسپاردا بار», دەيدى.
شالعايداعى جاستاردى دا نازاردان تىس قالدىرماۋ قاجەت دەگەن وي تاعى بار. مەملەكەت باسشىسى بىلتىرعى جولداۋىندا اۋىلدىق جەرلەردىڭ الەۋمەتتىك ورتاسىن جاڭعىرتۋ كەرەكتىگىن ايتقان ەدى. سوعان ساي, «اۋىل – ەل بەسىگى» اتتى جوبانى جۇزەگە اسىرۋدى دا تاپسىرعان. بۇل رەتتە اۋىل شارۋاشىلىعى مينيسترلىگى مەن وزگە دە مەكەمەلەردىڭ باستاۋىمەن ارنايى جول كارتاسى دايىندالماق.
ستاتيستيكا كوميتەتىنىڭ مالىمەتىنشە, قازىر ەلىمىزدە 3 900 834 جاس بار. 4 ميلليونعا جۋىق جانعا جاستار جىلى بەرەكەلى بولسىن!
ايدانا شوتبايقىزى,
«ەگەمەن قازاقستان»
