30 مىڭداي تۇرعىنى بار اۋىلدا بۇعان دەيىن مادەنيەت وشاعى اتىمەن بولماعان. ەلدىمەكەندە ونەرگە قانات قاققان جاستاردىڭ تالابىن شىڭداپ, ءتۇرلى مەرەكەلەردە حالىققا رۋحاني ازىق سىيلاۋ ماقساتىندا 2 قاباتتان تۇراتىن, 600 شارشى مەترلىك مادەنيەت وشاعى بوي كوتەردى. ساۋلەتى كەلىسكەن مادەنيەت وشاعىندا بارلىق ءتيىستى جاعدايلار جاسالعان, جىلۋ, سۋ جۇيەسى ورتالىقتاندىرىلعان. كورەرمەن زالى, حورەوگرافيا ءبولىمى, ءتۇرلى ۇيىرمە كابينەتتەرى, كىتاپحانا, ادىستەمەلىك كابينەت, قازاق ۇلتتىق اسپاپتار وركەسترى سىندى جۇمىس جاسايتىن 10 ۇيىرمە دە كەرەكتى جابدىقتارمەن قامتاماسىز ەتىلگەن.
– بيىل ءبىز «بولاشاققا باعدار:رۋحاني جاڭعىرۋ» ماقالاسى اياسىندا اۋدان بويىنشا 3 اۋىلدىق كلۋب اشتىق, ياعني زەلەنىي گاي, نوۆويشيمكا, جانە بۇگىن اشىلىپ جاتقان قوسشى مادەنيەت ءۇيى. بارلىق مادەنيەت ۇيلەرىندە 51 شىعارماشىلىق ۇيىم بار,ونىڭ 3 «حالىقتىق» دەگەن اتقا يە, تاعى دا 3 ۇجىم وسى اتاقتى الۋ ءۇشىن مينسترلىكتىڭ شەشىمىن كۇتىپ وتىر. قولدانىسقا بەرىلىپ جاتقان قوسشى كلۋبىنان ەلدىڭ مادەنيەتىنە ۇلەس قوسار جاستار شىعادى دەگەن ۇمىتتەمىز ءبارىمىز,–دەدى تسەلينوگراد اۋدانىنىڭ اكىمى مالعاجدار تاتكەەۆ.
بۇگىنگى تاڭدا تسەلينوگراد اۋدانىنا قاراستى 23 مادەنيەت نىسانى بار, ونىڭ 19 مەملەكەتتىك, 13-ءى بەلسەندى. قوسشى اۋىلىندا لەنتاسى كەسىلگەن بۇل عيمارات 24-ءشى بولىپ تىركەۋگە الىندى. اۋدان مادەنيەت ۇيلەرىنىڭ ماتەريالدىق-تەحنيكالىق بازاسىن نىعايتۋ ءۇشىن اۋداندىق بيۋدجەتتەن 26,3 ميلليون تەڭگە بولىنگەن بولاتىن. اتقارىلىپ جاتقان وسى ىسپەتتەس اۋقىمدى جوبالار ءوز ناتيجەسىن بەرىپ كەلە جاتىر, اتاپ ايتاتىن بولساق تسەلينوگراد اۋدانى سوڭعى ءۇش جىلدى «اقمولا جۇلدىزدارى» وبلىستىق حالىق شىعارماشىلىعى بايقاۋىنىڭ ۇزدىكتەرى اتانىپ ءجۇر.
ەلىمىزدىڭ ستراتەگيالىق ماقساتتارىنىڭ ءبىرى – ەلدىڭ ىشكى جالپى ونىمىندەگى شاعىن جانە ورتا بيزنەستىڭ ۇلەسى 2050 جىلعا قاراي كەم دەگەندە 50 پروتسەنت بولۋىن قامتاماسىز ەتۋ بولسا, بۇل ماقساتقا قول جەتكىزۋ ءۇشىن «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» جاڭا باعدارلاماسى بەكىتىلگەن بولاتىن. وسى باعدارلامالار اياسىندا قوسشى اۋىلىندا «قازىنا-SR» سەرىكتەستىگى كومپانياسىنىڭ جيھاز تسەحى قولدانىسقا بەرىلدى. تەك جەرگىلىكتى تۇرعىندار عانا ەمەس, كورشىلەس ەلدىمەكەندەردەن كەلگەن باس-اياعى 60 ادام قىزمەت اتقارادى, كومپانيا جۇمىسشىلاردى تۇرعىن ۇيمەن وزدەرى قامتاماسىز ەتەدى.
–بۇل تسەح تولىعىمەن اۆتوماتتاندىرىلعان رەجيمدە جۇمىس اتقارادى. ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىن وقىعان كەزدە ءبىزدىڭ ەل مۇنداي قادامدارعا ءالى دايىن ەمەس دەپ ويلاعان بولاتىنمىن, ءبىراز ۋاقىت وتكەننەن كەيىن ويىمنىڭ ولقى ەكەنىن ءتۇسىندىم. ءسويتىپ, وسى جۇمىستى قولعا الىپ, جيھاز تسەحىن اشىپ وتىرمىز. اۆتوماتتاندىرىلعان رەجيمدە جۇمىس جاساۋ ارقىلى ءبىز ەڭ ءبىرىنشى تاۋاردىڭ ساپاسىن جاقسارتامىز ءارى ۋاقىتتى ۇنەمدەۋگە تيگىزەر پايداسى مول,– «قازىنا - sr» سەرىكتەستىگىنىڭ ديرەكتورى سايرا ماتايباەۆا.
شىن مانىندە, شاعىن جانە ورتا كاسىپكەرلىك – ەل ەكونوميكاسىنىڭ ۇتقىر ءارى ناتيجەلى سەكتورىنىڭ ءبىرى. ىشكى جالپى ءونىمنىڭ ەلەۋلى بولىگىن ءوندىرۋ سولاردىڭ ۇلەسىندە.
بايقال ءبايادىل,
«ەگەمەن قازاقستان»
اقمولا وبلىسى
