بۇگىندە وبلىستا 188 ءدىني بىرلەستىك تىركەلسە, 85 ميسسيونەر جۇمىس ىستەۋدە. ءدىني اعارتۋ باعىتىندا 2751 ءىس-شارا وتكىزىلگەن. ونىڭ ناتيجەسى دە جوق ەمەس. ماسەلەن, سالافيزم باعىتىن ۇستانعان 35 ازامات وزدەرىنىڭ ءدىني كوزقاراستارىن وزگەرتكەن. سوڭعى جىلدارى رۋحاني عيماراتتار قۇرىلىسى دا قارقىن الىپ وتىر. 2018 جىلى 20 مەشىت پەن 3 كاتوليك شىركەۋى بوي كوتەردى. الايدا, تەرىس ءدىني كوزقاراستاردىڭ سالدارىنان تۋىنداعان تۇيتكىلدەر دە بار. ماسەلەن, بيىل 21 اتا-انا ءدىني كوزقاراستارىنىڭ سالدارىنان بالالارىن ۆاكتسيناتسيالاۋدان وتكىزۋدەن باس تارتتى.
–بۇگىندە اقمولا وبلىسى اۋماعىندا 188 ءدىني بىرلەستىك پەن ولاردىڭ بولىمشەلەرى جۇمىس ىستەيدى. ولاردىڭ 89-ى يسلام ءدىنىن, 44-ءى پراۆوسلاۆ, 11-ءى كاتوليك, 43 پروتەستانت جانە بىرەۋى ءداستۇرلى ەمەس ءدىن وكىلدەرىنەن قۇرالعان. ودان قالدى مەملەكەتتىك تىركەۋدەن باس تارتىپ وتىرعان ەۆانگەليالىق حريستيان-باپتيستىك قاۋىمدى قۇرايتىن 10 بىرلەستىك بار,– وبلىستىق ءدىن ىستەرى جونىندەگى باسقارمانىڭ جەتەكشىسى بولات قاسەنوۆ.
جيىن بارىسىندا وبلىس اكىمى مالىك مىرزالين حريستيان دىنىندەگى باستى ءدىني مەيرامداردىڭ ءبىرى روجدەستۆونىڭ ءتيىستى دەڭگەيدە اتالىپ وتپەگەنىنە قاتىستى سىن ايتتى.
ناۋان حازىرەت مەشىتىنىڭ باس يمامى قۋانىش قاجى ءسابيت پەن كوكشەتاۋ جانە اقمولا وبلىسىنىڭ ەپارحي ەپيسكوپى سەراپيون سەرگەي كولوسنيتسىن جاستاردى رۋحاني-ادامگەرشىلىك باعىتتا تاربيەلەۋدە ءداستۇرلى دىندەردىڭ ءرولى تۋرالى باياندامالارىن جاسادى. جالپى, ءوڭىر باسشىسى, وبلىس اۋماعىندا ءدىني باعىتتا اتقارىلىپ جاتقان جۇمىستارعا وڭ باعاسىن بەردى. بۇگىندە مەشىتتە جاستاردى رۋحاني تۇرعىدا تاربيەلەۋ ماقساتىندا 4 باعىتتا ناتيجەلى جۇمىستار جەمىستى اتقارىلۋدا. جەرگىلىكتى بيلىك وكىلدەرىنىڭ قولداۋىمەن كوپگشىلىكتىڭ بىرقاتار ماسەلەلەرى دە وڭتايلى شەشىمىن تابۋدا.
بايقال ءبايادىل,
«ەگەمەن قازاقستان»
اقمولا وبلىسى
