- تاۋەلسىزدىك العان 27 جىل ارالىعىندا قازاقستاندا مىقتى شاحمات مەكتەبى قالىپتاستى. اسا ءىرى جارىستارعا قاتىسقان سايىن مەنىڭ سوعان انىق كوزىم جەتتى. قازىرگى كەزدە جانسايا ابدىمالىكتىڭ ەسىمى ەرەكشە اتالۋدا. الەم كۋبوگى جولىنداعى جارىستا ول تاماشا ويناپ, ۇزدىكتەر ساناتىنا قوسىلدى. دينارا سادۋاقاسوۆا جايىندا دا جىلى لەبىز ايتۋعا بولادى. مەن قازاقستاندىق جانكۇيەرلەرگە تولاعاي تابىس تىلەيمىن, ولار زياتكەرلىك دەڭگەيىن ارتتىرۋ ماقساتىندا ءوز بالالارىنىڭ شاحمات مەكتەپتەرىنە كوپتەپ بەرۋلەرى كەرەك. سولاردىڭ اراسىنان دارالانعاندارى ۋاقىت وزا حالىقارالىق ارەنادا قازاقستاننىڭ سپورتتىق داڭقىن ارتتىرادى, – دەيدى الەكساندر مويسەەنكو.
راسىندا دا قازىر قازاقستاندا شاحمات جاقسى دامىپ كەلەدى. اسىرەسە, ايەلدەر اراسىنداعى سايىستاردا ءبىزدىڭ سۇلۋلارىمىز اۋىز تولتىرىپ ايتارلىقتاي تابىستارعا قول جەتكىزىپ ءجۇر. جۋىردا عانا رەسەيدىڭ حانتى-مانسيسك قالاسىندا وتكەن الەم چەمپيوناتىندا بارشا كورەرمەندەر جانسايا ابدىمالىكتىڭ ورەلى ونەرىنە قۇلشىنا قول سوقتى. اتاعى الىسقا جايىلعان ويىنشىلار باس قوسقان جارىستىڭ شيرەك فينالىنا دەيىن جەتكەن قازاقتىڭ قىزى جەر جاھانداعى ۇزدىك سەگىز شاحماتشىنىڭ قاتارىنا قوسىلدى. سول سەكىلدى دينارا سادۋاقاسوۆا دا ءوزىن جاقسى قىرىنان كورسەتىپ, ەكىنشى كەزەڭدە باق سىناۋ قۇرمەتىنە يە بولدى.
ايەلدەردىڭ الەمدىك رەيتينگىندە جوعارىدا ەسىمدەرى اتالعان قازاقتىڭ قوس قىزى قازىرگى كەزدە «توپ-20» ويىنشىنىڭ ساناتىندا. بۇل تىزىمدە 22 جاستاعى دينارا سادۋاقاسوۆا 18 ورىندا تۇرسا, 18 جاسار جانسايا ابدىمالىك 20 ساتىعا جايعاستى. بۇل جاس سپورتشىلار ءۇشىن, ارينە, وتە جاقسى كورسەتكىش. ال ەلىمىزدىڭ تاعى ءبىر دارىندى شاحماتشىسى 27 جاستاعى گ ۇلىسحان ناقباەۆا ۇزدىكتەر تىزىمىندە 95 ورىنعا تابان تىرەدى.
الەمدىك رەيتينگتىڭ كوشباسشىلار جايىندا ايتار بولساق, بۇل رەتتە قىتاي قىزدارىنىڭ قارقىنى وتە كۇشتى. اسپاناستى ەلىنىڭ قوس وكىلى ءبىرىنشى جانە ەكىنشى ورىنداردى ءوزارا بولىسۋدە. ولار – 24 جاستاعى حوۋ ينفان مەن 27 جاستاعى تسزيۋي ۆەنتسزيۋن. ءۇشىنشى ورىندا – 28 جاستاعى ۋكراينانىڭ شاحماتشى اننا مۋزىچۋك. رەسەيلىك ەكاتەرينا لاگنو (28 جاستا) مەن ۇندىستاندىق حامپي كونەرۋ (31 جاستا) ءتورتىنشى جانە بەسىنشى ورىنداردى يەلەنۋدە. سونداي-اق, ۋكراينالىق اننا مۋزىچۋك (26 جاستا), رەسەيلىك الەكساندرا كوستەنيۋك (34 جاستا), گرۋزيالىق نانا دزاگنيدزە (31 جاستا) جانە قىتايلىق تان چجۋني (27 جاستا) ۇزدىك وندىقتىڭ قاتارىندا.
ال «توپ-20» ويىنشىنىڭ قاتارىنا مىنالار ەنىپ وتىر: 11. ۆالەنتينا گۋنينا (29 جاستا, رەسەي), 12. حاريكا دروناۆاللي (27 جاستا, ءۇندىستان), 13. ەليزابەت پەتتس (33 جاستا, گەرمانيا), 14. انتوانەتا ستەفانوۆا (39 جاستا, بولگاريا), 15. چجاو سيۋە (35 جاستا, قىتاي), 16. بەلا حوتەناشۆيلي (30 جاستا, گرۋزيا), 17. ماري سەباگ (32 جاستا, فرانتسيا), 18. دينارا سادۋاقاسوۆا (22 جاس, قازاقستان). 19. ساراسادات حادەمالشارەح (21 جاستا, يران).
بايىپتاپ قارساڭىزدار, الەمنىڭ ەڭ ۇزدىك 20 شاحماتشىسى قاتارىنداعى ەڭ جاسى ءبىزدىڭ جانسايا ابدىمالىك ەكەن. ال دينارا سادۋاقاسوۆانىڭ جاسى تەك ءوزىنىڭ كوماندالىق ارىپتەسى مەن يراندىق ساراسادات حادەمالشارەحتەن عانا ۇلكەن. ولاي بولسا, الداعى ۋاقىتتا قازاق قىزدارى وزدەرىنىڭ باستى قارسىلاستارىنىڭ ءبىرازىن باسىپ وزىپ, بۇگىنگىدەن دە بيىك بەلەستەرگە كوتەرىلەتىنى انىق.
عالىم سۇلەيمەن,
«ەگەمەن قازاقستان»
