تىڭنىڭ ەپيتسەنتى بولىپ, قازاقى بولمىس قاعاجۋ قالعان وڭىردە الاشتىڭ اسىپ تۋعان پەرزەنتى – ابىلاي حاننىڭ ەسكەرتكىشى ەل ەڭسەسىن كوتەرۋگە سەپتىگىن تيگىزبەك. بۇل دا ەلدىڭ رۋحاني جاڭعىرۋىنىڭ, وتكەنىنىڭ ونەگەلى جولدارىن ىزدەپ, تىلسىم تاريحتىڭ تۇڭعيىعىنداعى تاريحي تۇلعالاردىڭ قايتا تۇلەگەن سونىدان جاڭعىرعان سوقپاعى دەۋگە ابدەن بولادى.
ۇلى حاننىڭ ەسكەرتكىشىنىڭ اشىلۋىنا اۋدان تۇرعىندارى كوپتەپ جينالدى. شاشۋ شاشىلىپ, اق تىلەكتەر ايتىلدى. التى الاشتىڭ بالاسىنىڭ بولاشاعى ءۇشىن ات جالىندا عۇمىر كەشكەن ابىلاي حاننىڭ ايبارلى كەسكىنى قىلاۋلاپ جاۋعان اق قاردىڭ استىندا وزگەشە رەڭمەن تارتىمدى بولىپ كورىنەدى ەكەن. قياعا كوز تىككەن كەمەڭگەر حان تاۋەلسىز ەلىنىڭ بولاشاعىن باعىپ تۇرعانداي. ءوزى مۇرات ەتكەن كەمەل كەلەشەكتىڭ كەسىمدى شەشىمىن ايتاتىنداي.
بۇل ءبىر اق تۇيەنىڭ قارنى جارىلعان كۇن بولدى. نەگىزىنەن, جەرگىلىكتى ۇلت ازداۋ قونىستانعان اۋدان جاڭا جاڭالىقپەن قاناتتانىپ, رەسپۋبليكا جۇرتشىلىعى ءۇشىن ەڭ قاسيەتتى مەرەكەنىڭ بارىسىندا كەنەن جاقسىلىقپەن جارىلقانىپ, ءبىر جاساپ قالدى.
بايقال ءبايادىل,
«ەگەمەن قازاقستان»
شورتاندى اۋدانى
