قىسقاشا ايتقاندا, وتكەن سەسسيانىڭ كەلەسى ناتيجەلەرىن اتاپ وتكىم كەلەدى.
بىرىنشىدەن, ۇيىمنىڭ باستى قۇجاتتارى – ۇجىمدىق قاۋىپسىزدىك تۋرالى شارتقا, ۇقشۇ جارعىسىنا, پروتسەدۋرا ەرەجەلەرى مەن جارعىلىق ورگانداردىڭ ەرەجەلەرىنە, سونداي-اق ۇيىمىمىزدىڭ مارتەبەسى تۋرالى كەلىسىمگە ۇقشۇ-نىڭ بىرنەشە باعىتتاعى قىزمەتىن جاڭارتقان وزگەرتۋلەر ەنگىزىلدى.
ەكىنشىدەن, حالىقارالىق ىنتىماقتاستىقتىڭ ءىس-جۇزىندەگى قۇرالدارى ىسكە قوسىلدى. ول − حالىقارالىق ىنتىماقتاستىقتى ودان ءارى دامىتۋعا ۇلەس قوسۋعا جانە ۇقشۇ-نىڭ اشىق جانە بەيبىتشىلىكسۇيگىش ۇيىم رەتىندەگى ءيميدجىن نىعايتۋعا مۇمكىندىك بەرەتىن ۇقشۇ-نىڭ بايقاۋشى جانە سەرىكتەس مارتەبەسى.
ۇشىنشىدەن, ۇقشۇ داعدارىسقا قارسى ارەكەت ەتۋ ورتالىعى سياقتى ۇجىمدىق جۇيەنىڭ باستى ەلەمەنتى ىسكە قوسىلدى.
تورتىنشىدەن, اسكەري ىنتىماقتاستىقتى دامىتۋ شەڭبەرىندە باسقارۋ ورگاندارىن بىرلەسىپ دايارلاۋعا جانە ۇقشۇ ۇجىمدىق قاۋىپسىزدىك جۇيەسىنىڭ كۇشتەرى مەن قۇرالدارىن قالىپتاستىرۋعا, اسكەري جانە بىتىمگەرلىك كونتينگەنتتەردى, ارنايى كۇشتەر مەن قۇرالداردى ورنالاستىرۋعا, اسكەري جوسپارلاۋعا قاتىستى بەس قۇجات قابىلداندى.
بەسىنشىدەن, حالىقارالىق تەرروريزمگە قارسى تۇرۋعا باعىتتالعان جۇمىستىڭ شەڭبەرىندە بۇۇ الاڭىندا قازاقستان باستاماسىمەن تەرروريزمنەن ازات الەمگە قول جەتكىزۋ ءتارتىبىنىڭ كودەكسى قابىلدانىپ, ىسكە اسىرىلۋدا. ونىڭ باستى ماقساتى – بۇۇ-نىڭ ءجۇز جىلدىعىنا وراي 2045 جىلعا دەيىن الەمدى تەرروريستىك قاۋىپ-قاتەردەن تولىعىمەن بوساتۋ.
جالپى العاندا, مەملەكەت باسشىلارى ءسامميتتىڭ كۇن تارتىبىندەگى بارلىق 20 جوبالىق قۇجاتتى قاراپ, قول قويدى. ۇجىمدىق قاۋىپسىزدىك كەڭەسىنىڭ قورىتىندى دەكلاراتسياسى ۇقشۇ ۇقج سەسسياسىنىڭ نەگىزگى ساياسي قۇجاتى بولدى. وندا ۇقشۇ-عا مۇشە مەملەكەتتەردىڭ ۇيىم قىزمەتىنىڭ باسىم باعىتتارىن, سونىڭ ىشىندە قازاقستاننىڭ ۇقشۇ-عا توراعالىق ەتۋ كەزەڭىندە بەلگىلەگەن باعىتتارىن ىسكە اسىرۋدى جالعاستىرۋعا دەگەن جالپى كوڭىل كۇيى كورسەتىلگەن. سيرياداعى احۋالدى تۇراقتاندىرۋ ۇدەرىسىندەگى رەسەي مەن قازاقستاننىڭ شەشۋشى ءرولى اتالدى.
دەكلاراتسيا حالىقارالىق قۇقىقتىڭ جالپىعا ورتاق قابىلدانعان نورمالارى مەن قاعيداتتارىن جانە قازاقستان باستاماشىلىق ەتكەن تەرروريزمنەن ازات الەمگە قول جەتكىزۋ ءتارتىبىنىڭ كودەكسىن ساقتاۋعا نەگىزدەلگەن بۇۇ-نىڭ قامقورلىعىمەن تەرروريزمگە قارسى ەڭ اۋقىمدى كواليتسيانى قۇرۋعا شاقىرادى.
سونىمەن قاتار ۇقشۇ-عا مۇشە مەملەكەتتەردىڭ 2025 جىلعا دەيىنگى زاڭسىز كوشى-قونعا قارسى ارەكەت ەتۋدىڭ ۇجىمدىق جۇيەسىن دامىتۋ جونىندەگى ءىس-قيمىل جوسپارى جانە ۇقشۇ-عا مۇشە مەملەكەتتەردىڭ مۇددەسىندە ۇيلەستىرىلگەن اقپاراتتىق ساياساتتى ازىرلەۋ جونىندەگى ءىس-قيمىل جوسپارى بەكىتىلدى.
ۇقشۇ ۇجىمدىق كۇشتەرىنىڭ ۇيىمدىق جانە باسقارۋشىلىق الەۋەتىن كۇشەيتۋ ءۇشىن كەڭەس ۇقشۇ ۇجىمدىق جەدەل ارەكەت ەتۋ كۇشتەرىنىڭ اسكەري كونتينگەنتتەرى قۇرامى مەن ارنايى كۇشتەردى قالىپتاستىرۋ تۋرالى, سونداي-اق ۇقشۇ اسكەري باسقارماسىن ۇيىمداستىرۋعا قاتىستى وزگەرتۋلەر ەنگىزۋ تۋرالى شەشىمدەرگە قول قويدى.
سونىمەن بىرگە «حالىقارالىق تەرروريستىك ۇيىمدار جاعىندا قارۋلى قاقتىعىستارعا قاتىسقان ادامدارعا قاتىستى ۇيلەستىرىلگەن شارالار تۋرالى» بىرلەسكەن مالىمدەمە قابىلداندى.
سەسسيانىڭ كۇن تارتىبىنەن تىس ۇقشۇ-نىڭ جاڭا باس حاتشىسىن تاعايىنداۋ ماسەلەسى قارالدى. وعان بايلانىستى مەملەكەت باسشىلارى 2018 جىلعى
6 جەلتوقساندا سانكت-پەتەربۋرگتە بولاتىن كەزدەسۋدە تالقىلاۋدى جالعاستىرۋعا كەلىستى.
ءسامميتتىڭ قورىتىندىلارى بويىنشا ۇيىمداعى بەلگىلەنگەن تارتىپكە سايكەس ۇقشۇ-داعى توراعالىق 2019 جىلى قىرعىز رەسپۋبليكاسىنا ءوتتى. بارلىق تاراپتار وسى ەلدىڭ پرەزيدەنتى سوورونباي جەەنبەكوۆتىڭ ۇيىم قىزمەتىنىڭ الداعى كەزەڭىنە ۇسىنعان باسىم باعىتتارىنا قولداۋ كورسەتتى. ۇقج كەزەكتى سەسسياسىن قىرعىزستاندا وتكىزۋ تۋرالى كەلىسىمگە قول جەتكىزىلدى.
ۇقج سەسسياسىنىڭ قارساڭىندا وتكەن سىرتقى ىستەر مينيسترلەرى كەڭەسىنىڭ, قورعانىس مينيسترلەرى كەڭەسىنىڭ, ۇقشۇ قاۋىپسىزدىك كەڭەستەرى حاتشىلارى كوميتەتىنىڭ بىرلەسكەن وتىرىسى بارىسىندا سەرىكتەستەردىڭ نازارى حالىقارالىق قاۋىپسىزدىك ماسەلەلەرى جونىندەگى ارنايى جوعارى دەڭگەيدەگى كەزدەسۋدى (اقش – رەسەي – قحر – ەو) ۇيىمداستىرۋ تۋرالى مەملەكەت باسشىسىنىڭ باستاماسىن بىرلەسە ازىرلەۋ قاجەتتىلىگىنە اۋدارىلعانىن اتاپ وتكىم كەلەدى.
قايرات ءابدىراحمانوۆ,
سىرتقى ىستەر ءمينيسترى
