قازاق ادەبيەتىنىڭ اسا كورنەكتى وكىلى ءابىش كەكىلباي ۇلىنىڭ نەمەرەسى ەلدار ءابىش ء«ا.كەكىلباەۆتىڭ شىعارماشىلىعى مەن قوعامدىق-ساياسي قىزمەتىندەگى نەوپاتريوتيزم مەن نەوكوسموپوليتيزم» تاقىرىبىندا عىلىمي جۇمىس جازىپ, وقۋشىلار اراسىنداعى رەسپۋبليكالىق بايگەدە جانە پەتەربوردا وتكەن حالىقارالىق وقۋشىلار اراسىنداعى جارىستا ءبىرىنشى ورىن الدى.
ەلدار قازىر اقتاۋ قالاسىنداعى جالپى ءبىلىم بەرەتىن №1 مەكتەپتىڭ 11-سىنىبىندا وقيدى. ەلداردىڭ عىلىمي جۇمىسىنا جەتەكشىلىك ەتىپ, باس-كوز بولىپ جۇرگەن ۇستازى – تاريح ءپانىنىڭ مۇعالىمى تامارا ستاسەنكو. «ەلدار كىشكەنتاي كۇنىنەن كىتاپقا قىزىعىپ, اتاسىنىڭ شىعارمالارىن وقىپ جۇرەتىن. اكەسىنىڭ جانىندا ءجۇرىپ, فيلم ءتۇسىرۋ جۇمىستارىنا دا قاتىساتىن. ءوزى: «اتام تۋرالى عىلىمي جۇمىس جازعىم كەلەدى» دەپ باستاما كوتەرىپ, عىلىمي جەتەكشىسى ەكەۋى العان تاقىرىپتارىن سوڭىنا دەيىن جەتكىزدى. رەسپۋبليكالىق, حالىقارالىق بايگەدەن جۇلدەلى كەلگەنىنە مەن دە ايرىقشا قۋانىپ وتىرمىن. ونىڭ ۇستىنە, جازعان جۇمىسى اتاسى تۋرالى» دەپ قۋانىشىمەن ءبولىستى اجەسى, كلارا جۇمابايقىزى.
بۇل العاشقى عىلىمي جۇمىسىن جازۋ ءۇشىن ەلدار اتاسىنىڭ شىعارمالارىن وقىپ قانا قويماي, ول تۋعان اۋىلدى, وقىعان ۋنيۆەرسيتەتىن, جۇمىس ورنىن تۇگەل زەرتتەپ, ارالاپ شىققان. تياناقتى جۇمىسىنىڭ ناتيجەسىندە ەلەۋلى جەتىستىككە جەتكەن تەكتىنىڭ تۇياعىنا ءبىز ارقاشان تىلەۋلەسپىز.
باعاشار تۇرسىنباي ۇلى,
«ەگەمەن قازاقستان»
