قاراعاندىدا قارا فونعا سالىنعان كارتينالار كورمەسى اشىلدى

ونەر • 16 قاراشا، 2018

قاراعاندىدا قارا فونعا سالىنعان كارتينالار كورمەسى اشىلدى

182 رەت كورسەتىلدى

قاراعاندى وبلىستىق بەينەلەۋ ونەرى مۇراجايىندا سۋرەتشى پيوتر كيشكيستىڭ «قارا فونداعى جۇمىستار-1» دەپ اتالعان جەكە كورمەسى اشىلدى. كورەرمەن نازارىنا قىلقالام شەبەرىنىڭ كارتينالارى كەسكىندەلگەن قارا ءتۇستى 42 قاعاز پاراعى ۇسىنىلعان. «فوننىڭ قارا ءتۇسى تەرەڭدىك پەن كەربەزدىك سىيلايدى»، دەيدى اۆتوردىڭ ءوزى. سۋرەتشىنىڭ ەرەكشەلىگى دە سول، ول ءوزىنىڭ تۋىندىلارىن تەك قانا قارا ءتۇستى فونعا سالادى.

Egemen Qazaqstan

جالپى، بۇل سۋرەتشى جوسپارىنداعى ءۇش كورمەنىڭ العاشقىسى. ەكىنشى كورمەنىڭ اتاۋى – «ونەردەگى قارىنداش». ال سىناق جۇمىستارىنان قۇرالعان ءۇشىنشى كورمە «ەنەرگيا» دەپ اتالادى.

كورمە اۆتورىنىڭ يدەياسى بويىنشا، كورەرمەندەر سۋرەتشىنىڭ شەبەرحاناسىندا جۇرگەندەي اسەر الۋى كەرەك. مۇنى ول كورمەگە كەلۋشىلەرمەن جۇرگىزىلگەن ويىن دەپ اتايدى. ءتىپتى سۋرەتشى كارتينالارانىڭ اتاۋىن دا جازباعان. مۇنداي ءتاسىل كورەرمەنمەن سەنىمدى قارىم-قاتىناس قۇرۋعا سەپتىگىن تيگىزەدى دەپ سانايدى شەبەر.

– ونىڭ ەڭبەكقورلىعى، شەبەرلىگى، شىعارماشىلىق قيالى وتە زور، ءستيلدى سەزىنە الۋى ەرەكشە. مۇنداعى جۇمىستارىنىڭ ءبىر دە بىرىندە ەتيكەتكا جوق، ول ءوزىنىڭ ويىن ەشكىمگە ماجبۇرلەمەيدى. بارلىعى قارا فوندا، ءبارىمىز عارىشقا سۇڭگىگەندەي اسەر الامىز. ونىڭ تۋىندىلارىنا قاراپ، تۇڭعيىققا شومۋعا بولادى. قۇددى ءبىر گالاكتيكا، – دەگەن پىكىر ءبىلدىردى وبلىستىق بەينەلەۋ ونەرى مۇراجايى ديرەكتورىنىڭ ورىنباسارى الەكساندر گەحت.

پيوتر كيشكيس تەك قارا فونعا سۋرەت سالىپ قانا قويمايدى. سونىمەن قاتار ول ءتۇرلى عيماراتتاردىڭ ىشكى كورىنىسىن بەزەندىرۋمەن دە اينالىسادى.

– مەن كەز كەلگەن ستيل بويىنشا جۇمىس ىستەي بەرەمىن. دەگەنمەن، كەسكىندەمەدە اناعۇرلىم شىنشىلمىن. مەنىڭ العاشقى كوركەم سۋرەتىم جاڭا مايقۇدىقتىڭ مادەنيەت ۇيىندە تۇر. ودان كەيىن «ينتەرفۋد» كافەسىندە سۋرەت سالدىم. سونداي-اق ءۇش جىل بويى جەزقازعاندا شىركەۋ ءىشىن بەزەندىرۋمەن اينالىستىم، – دەيدى پيوتر كيشكيس.

قايرات ءابىلدا،

«ەگەمەن قازاقستان»

قاراعاندى