– بۇگىنگى كۇنى سۇحبات جانرىنداعى تەلەباعدارلامالار از ەمەس. ال ەندى «ەرەكشە كوزقاراستىڭ» وسى تەكتەس وزگە حابارلاردان ەرەكشەلىگى نەدە؟
– ەرەكشەلىگى – بولعان وقيعاعا وزگەشە وي-پىكىردىڭ ايتىلاتىندىعىندا. ەلىمىزدە, جالپى الەمدە بولىپ جاتقان جاڭالىقتار كوبىنە اقپاراتتىق مازمۇندا عانا ايتىلىپ, كورسەتىلىپ جاتادى. تاقىرىپتى جەكە الىپ, جان-جاقتى تالداۋ جاعى كەمشىندەۋ. ال, «ەرەكشە كوزقاراس» باعدارلاماسى – بەدەلدى ساراپشىلاردى قاتىستىرا وتىرىپ, ەڭ وزەكتى ماسەلەلەردى اشىق تالقىلايتىن پىكىرتالاس الاڭى. مۇندا ماسەلە سان قىرىنان سارالانىپ, ءتۇرلى كوزقاراستىڭ ايتىلۋىنا مۇمكىندىك بەرىلەدى. قازىر قوعامعا ەرەكشە پىكىر ايتىلاتىن باعدارلامالار قاجەت.
- تاقىرىپتى قالاي تاڭدايسىزدار؟
تاقىرىپ اپتانىڭ ماڭىزدى ۋاقيعاسىنا نەگىزدەلەدى. ونى شىعارماشىلىق ۇجىم بولىپ تاڭدايمىز. بەلگىلى-ءبىر ۋاقيعانى الىپ, سوعان قاتىستى وي-پىكىرگە كەزەك بەرەمىز. ماسەلەن, ءبىزدىڭ العاشقى حابارىمىز دوللار باعامىنىڭ شارىقتاۋىنا ارنالدى. ءدال سول كۇندەرى شەتەل ۆاليۋتاسى كۇرت قىمباتتاپ كەتكەن ەدى. بەلگىلى ەكونوميستەن دوللاردىڭ كەلەشەگى جايىندا سۇرادىق. سول سەكىلدى بۇدان باسقا ساراپشىلاردىڭ جەمقورلىق, جۇمىسسىزدىق, ءدارى-دارمەك باعاسى تۋرالى دا كوزقاراستارىن بىلدىك. جاقىندا عانا ءبىر حابارىمىزدى مۇعالىمدەر مارتەبەسىنە ارنادىق.
- ستۋدياعا كەلەتىن قوناقتار نەگىزىنەن كىمدەر؟ شەنەۋنىكتەرمەن عانا شەكتەلەسىزدەر مە, الدە...
- ءسوزىڭىزدىڭ توركىنىن ءتۇسىندىم. باعدارلامانىڭ باستى ەرەكشەلىكتەرىنىڭ تاعى ءبىرى – ءدال وسى سۇحبات بەرۋشىلەرگە قاتىستى. اتاپ ايتقاندا, سۇحبات بەرۋگە قوعام وكىلدەرى كوبىرەك شاقىرىلادى. ادەتتە, ماسەلەنى تەرەڭنەن كورە بىلەتىندەر دە, جەرىنە جەتكىزە ايتاتىنار دا سولار. ال, باعدارلامامىزدىڭ اتى ايتىپ تۇرعانداي, حابارعا نەگىزىنەن بەلگىلى-ءبىر ماسەلەگە وزىندىك وي-پىكىرى بار قوناقتى شاقىرۋعا تىرىسامىز. وقيعا قاي سالادا بولسا, سول سالانىڭ مامانىن سويلەتۋدى ماقسات تۇتامىز. باستىسى – ايتارى بولۋى ءتيىس. سوندا سۇحبات تا قىزىقتى شىعادى.
- قانشا كۇيىپ تۇرعان ماسەلە بولسا دا سۇحبات كەزىندە سابىرلى قالپىڭىزدان اسا بەرمەيسىز. سەبەبى نەدە؟
- ول – راس. ءبىز تەلەۆيزيا – تاربيە قۇرالى ەكەندىگىن مويىنداۋىمىز جانە ەستەن شىعارماۋىمىز كەرەك. تاربيە قۇرالى بولعاندا ەشكىم ەفيردە وتىرىپ الىپ «مىناۋ – دۇرىس, مىناۋ دۇرىس ەمەس» دەپ اقىل ايتپايدى. ەفيردەن ءوتىپ جاتقان دۇنيە كورەرمەندى ءوزى تاربيەلەيدى. ياعني, تەلەديداردان كورسەتىلەتىن حابارلاردىڭ قوعامعا تيگىزەر ىقپالى ۇلكەن. سۇحبات بەرىپ وتىرعان ادامنىڭ ءسوزىن قايتا-قايتا ءبولىپ, سۇراقتارمەن جاعاسىنان الۋ – مەنتاليتەتىمىزگە دە, مادەنيەتىمىزگە دە جات نارسە. قوناقتى ءسوزىن تىڭداۋ ءۇشىن شاقىردىڭ. البەتتە, ويى شاشىراپ بارا جاتسا ايتىلىپ وتىرعان اڭگىمەگە قاقپايلاپ الىپ كەلەسىڭ. وڭدى سويلەپ وتىرسا ءسوزىن ءبولىپ نە كەرەك؟ ال, وتكىر ساۋالدى سىپايى قويۋعا دا بولادى.
- جۋرناليستيكانى الەۋمەتتىك جەلى ىعىستىرىپ بارادى دەگەن پىكىرگە كوزقاراسىڭىز قانداي؟
- بۇل – مۇمكىن ەمەس نارسە. سەبەبى, ەكەۋى ەكى بولەك دۇنيە. ءبىر-ءبىرىن ەشۋاقىتتا الماستىرا المايدى. ارقايسىسىنىڭ ءوز ورنى بار.
- تارقاتىپ ايتساڭىز...
- ماسەلەن, جۋرناليستيكا ناقتى ءبىر فاكتىگە نەگىزدەلەدى. جاۋاپكەرشىلىك بار. تالداۋ بار. ال, ماتىنىندە قاتەلەر ءورىپ جۇرەتىن الەۋمەتتىك جەلىدە بۇل ولشەمدەر بولا بەرمەيدى. سۋرەتتەپ ايتار بولساق, ەلدىڭ ءبارى كولىك جۇرگىزگەنمەن بارلىعى بىردەي رالليگە قاتىسا المايتىنى سەكىلدى, ءماتىن جازا العاننىڭ ءبارى جۋرناليست بولا المايدى.
- اڭگىمەڭىزگە راقمەت!
اڭگىمەلەسكەن گۇلنۇر دوسبول
«حابار 24» ارناسىنان ءار جۇما ساعات 21:30-دا «ەرەكشە كوزقاراس» باعدارلاماسىن تاماشالاڭىزدار.
