«كىسىدەگىنىڭ كىلتى اسپاندا» دەگەندەي, رەسەي تاراپى سوڭعى جىلدارى ءوز جەرىنەن توعان سانىن كوبەيتىپ جىبەردى. ءتىپتى باستاۋىن سول جاقتان الاتىن قوس وزەن سارقىلىپ, اياقتاعى ەل سۋدان تارىعىپ قالاتىن كەزى دە ءجيى كەزدەستى. ادامدار سۋدى اشىق وزەندەردەن ىشۋگە ءماجبۇر بولدى. تازا سۋ – دەنساۋلىق كەپىلى ەكەن. اشىق-شاشىق سۋ ىشكەن ەل ىشىندە ءارتۇرلى اۋرۋ كوبەيە باستادى.
جاڭاقالادا تازا سۋ ماسەلەسى 2012 جىلدان ايتىلا باستادى. ارنايى زەرتتەۋ ورىندارى قۇلشىق ەلدى مەكەنىندە مول جەراستى سۋ قورى بار ەكەنىن انىقتادى.
ەلباسى ن.ءا.نازارباەۆ «قازاقستان-2050» ستراتەگياسىندا كەلەشەكتەگى ەلگە تۇسەر ناۋبەت – اۋىز سۋ جەتىسپەۋشىلىگى بولاتىنىن كورەگەندىكپەن اتاپ كورسەتىپ, ۇكىمەتكە ونى شەشۋ جولدارىن قازىردەن باستاپ قولعا الۋ كەرەكتىگى جونىندە ناقتى تاپسىرما بەرگەن بولاتىن. پرەزيدەنتتىڭ اۋىز سۋ ماسەلەسىن شەشۋ تۋرالى ناقتى تاپسىرماسى الىستاعى اۋىل تۇرعىندارىنىڭ كەۋدەسىنە ءۇمىت وتىن جاقتى. تۇرعىنداردىڭ ەرتەڭىنە سەنىم پايدا بولعاننان كەيىن قۇلشىق ەلدى مەكەنىنەن سۋ تارتۋ جونىندە اۋدان ازاماتتارىنىڭ اتىنان پارلامەنتكە بىرنەشە مارتە حات جولداندى.
ەلباسى تاپسىرماسىنا وراي وڭىرىمىزگە كەلگەن پرەمەر-مينيستر وبلىسىمىزدىڭ وڭتۇستىك ايماعىنداعى جارتىلاي شولەيتتى وڭىرگە ورنالاسقان جاڭاقالا اۋدانى تۇرعىندارىنىڭ اۋىز سۋعا مۇقتاجدىعىن مۇقيات ەسكەرىپ, ناتيجەلى شارالار قابىلداعان ەدى.
مىنە, ۇكىمەتتەن بولىنگەن 2 ميلليارد تەڭگەگە جۋىق قارجىنى مەردىگەر تياناقتى يگەرىپ, جۇمىستى بيىل قىركۇيەك ايىندا مەرزىمىنەن بۇرىن اياقتاپ شىقتى. وسىلايشا ەلباسىمىزدىڭ حالىققا دەگەن قامقورلىعى ناقتى كورىنىس تاپتى!
ناتيجەسىندە 143 شاقىرىمدىق توپتىق سۋ قۇبىرى تابيعاتتىڭ قولايسىز شاقتارىنا قاراماستان قارقىندى جۇرگىزىلىپ, جاڭاقالا اۋدانىنىڭ 10 اۋىلى مەن ەلدى مەكەنى تازا اۋىز سۋمەن قامتاماسىز ەتىلدى. ەلباسىنا حالىقتىڭ ريزاشىلىعى شەكسىز. سەبەبى جاڭاقالا گازبەن قامتىلعان, جولى جوندەلگەن اۋدان بولاتىن. تازا اۋىز سۋ ءار ۇيگە قۇبىرمەن كىرىپ كەلگەندە قالا مەن اۋىلدىڭ ايىرماشىلىعى بولماي قالدى. مەملەكەت باسشىسىنىڭ ءوزى قالالىقتار مەن اۋىلدىقتاردىڭ ءومىر ءسۇرۋ دەڭگەيىنىڭ اراسىنداعى تەڭسىزدىكتى جويۋ جونىندە تاپسىردى ەمەس پە؟ مىنە, بۇل ورىندالدى.
جاڭاقالا توپتىق سۋ قۇبىرىنىڭ اشىلۋ سالتاناتىندا ءوڭىر تۇرعىندارى اتىنان سويلەگەن توقساننىڭ تورىنە شىققان ابىز اقساقال ب.ساپاروۆ, زەينەتكەر-ۇستاز ر.كەنجەكەەۆالار ەلباسىمىزعا, ۇكىمەتكە ريزاشىلىقتارىن ءبىلدىرىپ, شەكسىز العىس ايتتى. بۇل جاڭاقالالىقتاردىڭ شىنايى كوڭىلى ەدى.
زاكاريا سيسەنعالي,
جاڭاقالا اۋداندىق ءماسليحاتىنىڭ حاتشىسى
باتىس قازاقستان وبلىسى
