«ەگەمەن قازاقستان» گازەتى وقىرمان ۇدەسىنەن شىعۋ ماقساتىندا كۇندەلىكتى ءومىر تىنىسىن ءدوپ باسىپ, ءوڭىر جاڭالىقتارىن, ەلىمىزدىڭ ادەبي-مادەني ءومىرىن, الەۋمەتتىك-ەكونوميكالىق جاعدايلار تۋرالى اقپاراتتاردى قالت جىبەرمەي نازاردا ۇستاپ كەلەدى. بۇگىندە ەل ءومىرىن «ەگەمەننەن» تانىپ-ءبىلىپ وتىراتىن وقىرماندار اياسى كوبەيۋدە. تارالىمى جاعىنان ءباسپاسوز ايدىنىندا كوش باستاپ تۇرعان ەل گازەتىنە 2019 جىلعا جازىلۋ ناۋقانى دا قارقىنمەن باستالىپ كەتتى.
گازەتكە كەلەسى جىلعا العاشقى بولىپ جازىلعان وقىرمان رەداكتسيامىزعا كەلىپ, الماتىداعى شاعىن ۇجىممەن كەزدەسىپ, جۇرەكجاردى پىكىرىن ءبىلدىردى. روزا جونسىزباەۆا گازەتتى وتىز جىلعا جۋىق تۇراقتى جازدىرىپ كەلەدى. كوپتەگەن جىلدار «قازپوشتادا», كەيىننەن اۋديتورلىق كومپانيادا قىزمەت اتقارعان روزا باياحمەتقىزى گازەت-جۋرنالداردى جازدىرىپ الىپ وقۋدى داستۇرگە اينالدىرعان. وسىناۋ وتباسىلىق يگى ءىستىڭ جاناشىرى – قارجى سالاسىندا, قالالىق اكىمشىلىكتە كوپتەگەن جىلدار ەڭبەك ەتىپ, بۇگىندە زەينەت جاسىنا شىققان وتاعاسى اسىلبەك شىمشىقباي ۇلى. گازەتتىڭ ءار ءنومىرىن مۇقيات قاراپ, گازەت تىگىندىسىنىڭ تولىققاندى بولۋىن ءوزى قاداعالاپ وتىرادى. تىپتەن, گازەت بەتىندەگى ماقالالار جايىندا جاقىندارىمەن وي بولىسكەندى ۇناتادى.
قالىپتاسقان ءداستۇر بويىنشا گازەت قىزمەتكەرلەرى رەداكتسياعا كەلگەن روزا باياحمەتقىزىنا ارنايى سىي-سياپات ۇسىنىپ, العىس ءبىلدىردى.
وسى ورايدا رەداكتسيا مەن وقىرمان اراسىنداعى دانەكەر, 25 جىلدىق تاريحى بار «قازپوشتا» ۇجىمىنىڭ ەڭبەگى زور ەكەنىن ايتا كەتكەن ابزال. الماتىپوشتامت ديرەكتورى ەرجان تاسمۇحاننىڭ ايتۋىنشا, «قازپوشتانىڭ» بۇگىندە وڭتۇستىك استانادا جۇزدەن استام بولىمدەرى جۇمىس ىستەيدى. ال جاقىندا «Grand Park» ساۋدا ورتالىعىندا اشىلعان بولىمشەسىندە «جازىلۋشىلار كۇنى» ۇيىمداستىرىلىپ, پوشتا قىزمەتىنىڭ زاماناۋي ۇلگىلەرى تانىستىرىلدى. جاڭا زامانعى ۇدەرىستەرگە وراي «قازپوشتا» جىلدام ءارى سەنىمدى تاسىمالداۋشى رەتىندە نارىقتاعى جوعارى سۇرانىسقا يە كومپانيا مارتەبەسى ءۇشىن ارقاشان قىزمەت ساپاسىن جەتىلدىرىپ, تۇتىنۋشىلارعا قولايلى جاعدايلار تۋعىزىپ وتىرۋدى ماقسات ەتىپ كەلەدى.
ەلۆيرا سەرىكقىزى,
«ەگەمەن قازاقستان»
الماتى
