وسى ورايدا, «سپۋتنيك» ستاديونىنىڭ قايتا جاڭارتۋ جۇمىستارىنان كەيىن الماتىدا بالالار مەن جاسوسپىرىمدەرگە ارنالعان سۋ جاڭا «جاس قىران» فۋتبول ورتالىعى اشىلدى.
جاڭا زامان تالابىنا ساي جابدىقتالعان ستاديوندا 800 ادامعا ارنالعان تريبۋنا بوي تۇزەگەن. وعان قوسا جاتتىقتىرۋشىلار مەن سپورتشىلار ءۇشىن ارنايى بولمەلەر دە بار. يتاليادان اكەلىنگەن سوڭعى ۇلگىدەگى فيفا-مەن سەرتيفيكاتتاندىرىلعان درەناجدى جۇيەسى بار جاساندى فۋتبول الاڭى ورتالىقتىڭ كەلبەتىنە وزگەشە كورىك قوسىپ تۇر. ەلۋ بىلىكتى باپكەر ءتالىم بەرەتىن ورتالىقتا 500-دەن استام فۋتبولشىنىڭ ەركىن جاتتىعۋىنا قولايلى جاعداي جاسالعان. ەسكى ورتالىقتىڭ قايتا جوندەۋ جۇمىستارى قالا اكىمدىگى مەن «بالالار مەن جاسوسپىرىمدەر فۋتبول ورتالىعى «جاس قىران» جشس اراسىنداعى ۇزاق مەرزىمدەگى كەلىسىم شارت ناتيجەسىندە جۇزەگە اسقان.
– وزدەرىڭىز بىلەتىندەي, سپۋتنيكتىڭ تاريحى وتە باي. كوپتەگەن فۋتبول جۇلدىزدارى وزدەرىنىڭ كاسىبي مانساپتارىن وسى جەردەن باستاعان بولاتىن. بۇل جاستارعا جاڭا شابىت سىيلاپ, كوپتەگەن دارىنداردىڭ جولىن اشادى دەپ سەنەمىن بۇنىڭ بارلىعى ەلباسىمىزدىڭ سپورتتى دامىتۋ ساياساتىنىڭ ارقاسىندا جۇزەگە اسىرىلۋدا, – دەيدى قازاقستان فۋتبول فەدەراتسياسىنىڭ پرەزيدەنتى ادىلبەك جاقسىبەكوۆ.
جىل باسىنان بەرى قالادا «سپورت مەنىڭ اۋلامدا» جوباسى اياسىندا 18 مىڭ ادامنىڭ سپورتپەن شۇعىلدانۋىنا جول اشىلعان. سونداي-اق, جەكە سپورتتىق مەكەمەلەردىڭ قولداۋىمەن «باتىل بول» جوباسى ىسكە قوسىلدى. بۇل جوبا جاعدايى تومەن وتباسىلارعا سپورتپەن شۇعىلدانۋعا مۇمكىندىك سىيلاپ وتىر.
شاھار باسشىسىنىڭ سوزىنشە, بۇگىنگى تاندا الماتى ۆەلوترەگىنىڭ جاڭارتۋ جۇمىستارى اياقتالۋعا جاقىن, ال كەلەر جىلى مەگاپوليستە 5 مىڭ ادامعا ارنالعان جابىق جەڭىل اتلەتيكا ستاديونى سالىناتىن بولادى.
ارمان وكتيابر,
«ەگەمەن قازاقستان»
الماتى
