وڭىردەگى سپورت باسقارماسىنىڭ مالىمەتىنشە, ارقان جولدىڭ ۇزىندىعى − 1050 مەتر. ەكى ورىندىق 70 كابيناسى بار. ءبىر ساعاتتىڭ ىشىندە 550 ادام تاسىمالدانادى. بىلتىر ارقان جولدى قۇراستىرۋعا ارنالعان قۇرال-جابدىقتار جەتكىزىلدى. شاڭعى كەشەنىنىڭ قۇرىلىسىنا بىرنەشە ينۆەستور بىرلەسىپ, 277,7 ميلليون تەڭگە جۇمساعان. «ازياپرومينجينيرينگ» جشس-ءى ماماندارى ارنايى تىرەۋلەردى ورناتقان. ينفراقۇرىلىمدىق جۇمىستار دا جۇرگىزىلگەن. قاراجار اۋىلىنان باستاپ مىرزاشوقى تاۋىنا دەيىنگى ارالىقتا ۇزىندىعى 3 شاقىرىمدىق ەلەكتر جەلىسى تارتىلىپتى.
سەربيادان شاقىرىلعان «تاۋ-شاڭعى كۋرورتىن دامىتۋدىڭ» مامانى سلاۆەنكو باديۋرانىڭ ايتۋىنشا, مىرزاشوقىدا 6 ارقاندى, 3 ورىندىقتى جول جوباسىن جاساپ, ۇزىندىعى 15 شاقىرىم شاڭعى جولىن جاساۋعا بولادى. جۇمىستار بيىلعى جىل سوڭىنا دەيىن اياقتالسا, شاڭعى كەشەنى دە پايدالانۋعا دايىن بولار ەدى.
بىراق, جەرگىلىكتى سپورت جانە تۋريزم بولىمدەرىنىڭ مالىمەتىنشە, بىلتىر مىرزاشوقىعا قار تۇسپەگەن.
كەشەن سالىندى. بىراق, تاۋدا قار جوق. كەشەن سالماس بۇرىن مىرزاشوقى تاۋىنىڭ اۋا-رايى جاعدايىن, زەرتتەپ-زەردەلەپ الۋ كەرەك پە ەدى. بىزدە جوبالار ىلعي سولاي. ورتا جولدا قالىپ جاتادى.
سوندىقتان, وبلىستىق اكىمدىك بيىلعى قار تۇسە سالىسىمەن-اق, ۋاقىتىلى جيناپ الۋ كەرەك دەگەن تاپسىرما بەرىلدى. قار تۇسپەسە, تاۋ تابيعي جاراتىلىسىن ساقتاپ, قورعاپ قالعىسى كەپ تۇرعانداي-اۋ شاماسى؟!
فاريدا بىقاي
«ەگەمەن قازاقستان»
پاۆلودار
سۋرەتتى تۇسىرگەن: ۆالەري بۋگاەۆ
