شىمكەنت قالاسىنان پارلامەنت سەناتى دەپۋتاتتارىنىڭ سايلاۋىنا بارلىعى 6 كانديدات قاتىستى, زاڭعا سايكەس, ونىڭ ەكەۋىن قالالىق ءماسليحات, تورتەۋى ءوزىن-ءوزى ۇسىندى. داۋىس بەرۋگە 29 تاڭداۋشىنىڭ, 26-سى قاتىستى.
ورتالىق سايلاۋ كوميسسياسىنىڭ رەسمي سايتىندا جاريالانعان الدىن-الا ناتيجە بويىنشا 2017 جىلعى 28 ماۋسىمدا سايلانعان دەپۋتاتتاردىڭ وكىلەتتىك مەرزىمىنە 22 داۋىسپەن نۋرلان بەكنازاروۆ, ال 2014 جىلعى 1 قازاندا سايلانعان دەپۋتاتتاردىڭ وكىلەتتىك مەرزىمىنە 21 داۋىس جيناعان دارحان ساتىبالدى سايلاندى.
سايلاۋ پروتسەسىن ەۋرازيا ۇلتتىق ۋنيۆەرسيتەتىنىڭ ساياساتتانۋ ماماندىعىنىڭ ماگيسترانتتارى مەن ءباسپاسوز وكىلدەرى ورتالىق سايلاۋ كوميسسياسىنىڭ رەسمي سايتىنان ەلەكتروندى باقىلادى.
«زاڭعا سايكەس ءماسليحات دەپۋتاتتارى تاڭداعان 2 كانديداتتىڭ ءبىرى 2020 جىلعا دەيىن, ەكىنشىسى 2023 جىلعا دەيىن سايلانادى جانە وزدەرىڭىز كورىپ وتىرعانداي, وسى جىلى دا سايلاۋ پروتسەسىن ەلەكتروندىق سۇيەمەلدەۋ قىزمەتى قولجەتىمدى. بۇل - ساياسي پروتسەستىڭ حالىق الدىنداعى اشىقتىعىن كورسەتەتىن جۇيە. ەستەرىڭىزدە بولسا, سايلاۋشىلاردى ەلەكتروندى تىركەۋ الدىڭعى جىلى 28 ماۋسىمدا وتكەن سەنات دەپۋتاتتارىنىڭ سايلاۋىندا العاش قولدانىلعان ەدى» - دەدى وسك سايلاۋ ءبولىمىنىڭ مەڭگەرۋشىسى ماقساتحان اناپين.
زاڭ بويىنشا, پارلامەنت دەپۋتاتىنىڭ وكىلەتتىگى ونى رەسپۋبليكانىڭ ورتالىق سايلاۋ كوميسسياسى پارلامەنت دەپۋتاتى رەتىندە بەكىتكەن ساتتەن باستالادى.
ەسكە سالا كەتەيىك, بۇگىنگى سايلاۋ قازاقستان رەسپۋبليكاسى پرەزيدەنتىنىڭ 2018 جىلعى 9 تامىزداعى №731 جارلىعىمەن تاعايىندالعان.
قارلىعاش قۇرامىس,
«ەگەمەن قازاقستان»
